ދުނިޔޭގެ ދެވަނައަށް އެންމެ ބޮޑު ޖަވާހިރު ބޮޓްސްވާނާއިން ހޯދައިފި
މި ޖަވާހިރަކީ 1905 ވަނަ އަހަރު ދެކުނު އެފްރިކާއިން ފެނުނު 3،106 ކެރެޓް ހުރި ޖަވާހިރަށް ފަހު ދުނިޔޭން ފެނުނު އެންމެ ބޮޑު ޖަވާހިރު ކަމަށް ރިޕޯޓްތައް ބުނެއެވެ.
ދުނިޔޭގެ އެންމެ ބޮޑު ޖަވާހިރު
ދުނިޔޭގެ ދެވަނައަށް އެންމެ ބޮޑު ޖަވާހިރު ބޮޓްސްވާނާއިން ހޯދައިފިއެވެ.
2،492 ކެރެޓް ހުރި މި ޖަވާހިރު ހޯދީ ކެނެޑާގެ މައިނިންގ ކުންފުނި "ލުކާރާ ޑައިމަންޑް" އިން އެކްސްރޭ ޑިޓެކްޝަން ޓެކްނޮލޮޖީ ބޭނުން ކޮށްގެން ކަމަށް އެ ކުންފުނިން ބުރާސްފަތި ދުވަހު ނެރުނު ބަޔާނެއްގައި ބުނެފައިވެއެވެ.
މި ޖަވާހިރަކީ 1905 ވަނަ އަހަރު ދެކުނު އެފްރިކާއިން ފެނުނު 3،106 ކެރެޓް ހުރި ޖަވާހިރަށް ފަހު ދުނިޔޭން ފެނުނު އެންމެ ބޮޑު ޖަވާހިރު ކަމަށް ރިޕޯޓްތައް ބުނެއެވެ.
ލުކާރާ ބޮޓްސްވާނާގެ މެނޭޖިންގ ޑައިރެކްޓަރ ނަސީމް ލަހްރީ ވަނީ އަތްތިލައިގެ ބޮޑުމިނުގެ މި ޖަވާހިރު ބޮޓްސްވާނާގެ ރައީސް މޮކްވެޓްސީ މަސީސީގެ އޮފީހުގައި ބުރާސްފަތި ދުވަހު ދައްކާލާފައެވެ.
ބުރާސްފަތި ދުވަހު މި ހޯދުން އިޢުލާނުކުރުމުގެ ކުރިން، ބޮޓްސްވާނާއިން ފެނުނު އެންމެ ބޮޑު ޖަވާހިރަކީ 2019 ވަނަ އަހަރު އެ ގައުމުން ހޯދި 1,758 ކެރެޓްގެ ޖަވާހިރެވެ. މި ޖަވާހިރަށް ދީފައިވާ ނަމަކީ ސެވެލޯއެވެ.
މި ކުންފުނިން ބޮޓްސްވާނާ އިން ޖަވާހިރު ހޯދަން ފެށީ 2012 ވަނަ އަހަރުއެވެ. އޭގެ ފަހުން މިހާތަނަށް 216 ޖަވާހިރު އެ ގައުމުން ހޯދާފައިވާއިރު އެއިން ކޮންމެ ޖަވާހިރެއް ވިއްކާފައިވަނީ 1 މިލިއަން ޑޮލަރަށްވުރެ ބޮޑު އަގެއްގައެވެ. އަދި އޭގެ ތެރެއިން 11 ޖަވާހިރު ވިއްކާފައިވަނީ ކޮންމެ އެއްޗެއް 10 މިލިއަން ޑޮލަރަށްވުރެ ބޮޑުކޮށް ކަމަށް އެ ކުފުންފުނިން ނެރުނު ބަޔާނުގައި ވެއެވެ.
ފައިނޭންޝަލް ޓައިމްސް ނޫހުން ރިޕޯޓުކުރި ގޮތުގައި ލަފާކުރެވޭ ގޮތުގައި ބޮޓްސްވާނާ އިން ބުރާސްފަތި ދުވަހު އިއުލާން ކުރި ޖަވާހިރުގެ އަގު 40 މިލިއަން ޑޮލަރަށްވުރެ މަތިވެދާނެއެވެ.
ބޮޓްސްވާނާއަކީ ދުނިޔޭގައި އެންމެ ގިނައިން ޖަވާހިރު އުފައްދާ ޤައުމުތަކުގެ ތެރެއިން އެއް ޤައުމެވެ. އިންޓަނޭޝަނަލް މަނިޓަރީ ފަންޑުގެ ތަފާސްހިސާބުތަކުން ދައްކާގޮތުގައި ޖަވާހިރަކީ އެ ޤައުމުގެ މައިގަނޑު އާމްދަނީގެ ވަސީލަތެވެ. އެ ޤައުމުގެ ޖީޑީޕީގެ 30 އިންސައްތަ އަދި އެކްސްޕޯޓުގެ 80 އިންސައްތަ ހިއްސާކުރަނީ ޖަވާހިރެވެ.
2.5 މިލިއަން މީހުންގެ އާބާދީ އެއް އޮންނަ ބޮޓްސްވާނާ އަކީ، 1966 ގައި އިނގިރޭސިންގެ ކިބައިން މިނިވަންކަން ލިބުނުފަހުން ފަގީރު ގައުމެއްގެ ގޮތުގައި ބެލެވޭ ގައުމެކެވެ.
ބޮޓްސްވާނާ އިން ބޭރުގެ ގައުމުތަކުގެ މައިނިންގ ކުންފުނިތަކުން ހޯދާ ޖަވާހިރުން އެ ގައުމަށް ރޯޔަލްޓީގެ ގޮތުގައި ލިބެނީ އެ އެއްޗެއްގެ އަގުގެ 10 އިން ސައްތަ އެވެ.
