އިންތިޚާބުތަކުގެ ނަތީޖާ ދައްކާގޮތުން ރައްޔިތުންނަށް އެންމެ ރަނގަޅީ ބަރުލަމާނީ ނިޒާމުކަން ހާމަވޭ: މެންބަރު ޒިޔާދު
ނިޒާމުގެ ވޯޓަކަށް ދިޔަ ނަމަވެސް ބަރުލަމާނީ ނިޒާމު ކާމިޔާބުވުމަކީ ދުރުގައި އޮތް ކަމެއް
ފަލަސުރުހީ ޕްރޮގްރާމްގައި ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވާހަކަދައްކަވަނީ
ރާއްޖޭގައި މިހާރު ބާއްވާ އިންތިޚާބުތަކުގެ ނަތީޖާ ދައްކާގޮތުން ރައްޔިތުންނަށް އެންމެ ރަނގަޅީ ބަރުލަމާނީ ނިޒާމުކަން ހާމަވާ ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި މެންބަރު ޒިޔާދު ވިދާޅުވީ އެއްވެސް އިރެއްގައި ބަރުލަމާނީ ނިޒާމަށް ތާއީދު ނުކުރާ ކަމަށެވެ. ނަމަވެސް އިންތިޚާބުތަކުގެ ނަތީޖާތަކަށް ބަލާއިރު، ރައްޔިތުންނަށް އެންމެ ރަނގަޅީ ބަރުލަމާނީ ނިޒާމުކަން ހާމަވާ ކަމަށް އޭނާ ވިދާޅުވިއެވެ. އަދި ވިދާޅުވީ ބަރުލަމާނީއޭ ބުނުމުން ބައެއް ރައްޔިތުން އެކަމާ ހިތްހަމަ ނުޖެހޭ ކަމަށާއި، ނިޒާމުގެ ވޯޓަކަށް ދިޔަ ނަމަވެސް ބަރުލަމާނީ ނިޒާމު ކާމިޔާބުވުމަކީ ދުރުގައި އޮތް ކަމެއް ކަމަށެވެ.
މެންބަރު ޒިޔާދު ވިދާޅުވީ މިހާރު ރައީސުލްޖުމްހޫރިއްޔާ އިންތިޚާބު ކުރުމަށްފަހު ރައީސްއަށް ދެބާރު ހިބަކޮށް ދެނީ ރައްޔިތުން ކަމަށެވެ. އަދި ރައްޔިތުންގެ މަޖިލީހުގެ މެޖޯރިޓީ ދިނުމުން ޖުޑިޝަރީ ވަކިން ނޯންނާނެ ކަމަށާއި، މިނިވަން މުއައްސަސާތަކުގެ މިނިވަންކަމާ މެދުވެސް ސުވާލު އުފެދޭ ކަމަށް މެންބަރު ޒިޔާދު ވިދާޅުވިއެވެ.
މީގެ އިތުރުން މެންބަރު ޒިޔާދު ވިދާޅުވީ މިދިޔަ ދެދައުރުގައި ވެސް މަޖިލިސް މެޖޯރިޓީ ސަރުކާރަށް ލިބުނު ކަމަށެވެ. އަދި އެމްޑީޕީގެ ސަރުކާރުގައި މަޖިލިސް މެޖޯރިޓީ ލިބުނު ނަމަވެސް އިދިކޮޅު މެންބަރުންނަށް ވަރަށް ބޮޑަށް ފުރުސަތު ދީފައިވާ ކަމަށާއި، މިނިސްޓަރުންނާއި، މިނިވަން މުއައްސަސާތަކުގެ ބޭފުޅުން ހާޒިރުކޮށް ސުވާލުކޮށް، މަޝްރޫއުތައް ކުރިއަށްދާ ގޮތްތައް ބަލައި، ފެންމަތިވާ މައްސަލަތައް ބެލުމުގެ ފުރުސަތު ވެސް ދީފައިވާ ކަމަށެވެ. ނަމަވެސް މިގޮތަށް މިކަން ހިނގާނީ އެ އޮންނަ ސަރުކާރެއްގެ އިހުލާސްތެރިކަމެއްގެ ސަބަބުން ކަމަށް އޭނާ ވިދާޅުވިއެވެ.
ރައްޔިތުންގެ މަޖިލީހުގެ އިންތިޚާބާ ގުޅިގެން ކުރިއަށް ގެންދިޔަ ކެންޕެއިންތަކަށް އިޝާރާތް ކުރައްވައި މެންބަރު ޒިޔާދު ވިދާޅުވީ ރައީސް ވެސް ރަށްރަށަށް ވަޑައިގަންނަވާ އެރަށެއްގެ ތަރައްގީގެ މަޝްރޫއުތައް ކުރިއަށް ގެންދެވޭނީ ސަރުކާރުގެ ކެންޑިޑޭޓުން ހޮވުމުން ކަމަށް ވިދާޅުވަމުން ގެންދަވާ ކަމަށެވެ. އެސަބަބާ ގުޅިގެން ރަށުގެ ތަރައްގީއަށް ވިސްނާ ގިނަ ރައްޔިތުން ސަރުކާރު ކެންޑިޑޭޓަށް ވޯޓުދީފައިވާ ކަމަށް އޭނާ ވިދާޅުވިއެވެ. ނަމަވެސް މިއުސޫލު ބަދަލުކުރަންޖެހޭ ކަމަށާއި، އެކަން ކުރެވޭނީ ރައްޔިތުންނަށް ކަމަށް ވެސް މެންބަރު ޒިޔާދު ވިދާޅުވިއެވެ.
