ގާ ހުދުވާތީ ޕްރޮޖެކްޓުތައް ހުއްޓާލިނަމަވެސް، ސަރުކާރުން ބޭނުންވާ މަޝްރޫއުތަކަށް ހުއްދަދޭ
23 މެއި 2024 | ބުރާސްފަތި 07:17ސަރުކާރުން ވަކި ޕްރޮޖެކްޓުތަކަކަށް ހުއްދަދެމުންދާތީ ގިނަ ބަޔަކު ދަނީ އެކަމަށް ފާޑުކިޔަމުން
ގުޅިފަޅުން ހިއްކާފައިވާ ސަރަޙައްދެއް
ގާހުދުވުމާއި (ކޮރަލް ބްލީޗިންގ) ގުޅިގެން ފަރުތަކަށް ކުރާ ނޭދެވޭ އަސަރު ކުޑަކުރުމުގެ ގޮތުން މަޝްރޫއުތައް ހުއްޓާލިނަމަވެސް، ސަރުކާރުން ކުރިއަށް ގެންދަން ބޭނުންވާ ޕްރޮޖެކްޓުތަކަށް ހުއްދަދެމުންދާކަން ހާމަވެއްޖެއެވެ.
ފަރުތަކަށް ކުރާ ނޭދެވޭ އަސަރު ކުޑަކުރުމުގެ ގޮތުން މެއި މަހުގެ މަހުގެ 9 ވަނަ ދުވަހުން ފެށިގެން ޖޫން މަހުގެ 10 ވަނަ ދުވަހުގެ ނިޔަލަށް ފިޔަވަޅުތަކެއް އެޅުމަށް ނިންމާ އެކަން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)ން ވަނީ އިއުލާނުކޮށްފައެވެ. އެގޮތުން ރާއްޖޭގައި ފުޅާ ދާއިރާއެއްގައި ކުރެވުމުންދާ ފަޅު ފުންކުރުމާއި ބިން ހިއްކުމުގެ މަސައްކަތްތަކާއި، ބީޗް ނަރިޝްމަންޓް މަސައްކަތްތަކަކީ، މި މަސައްކަތްތަކުގެ ސަބަބުން ފަރުތަކުގެ މާހައުލަށް ނޭދެވޭ އަސަރުތަކެއް ކުރަމުންދާ ކަންކަންކަމަށްވާތީ އެކަންކަން ހުއްޓާލަން އޮތީ އަންގާފައެވެ.
އެކަމާ ގުޅިގެން ބިން ހިއްކުމާއި ބަނދަރު ފުންކުރުން ފަދަ ރަށްރަށުގެ ގިނަ މަޝްްރޫއުތަކެއްވެސް އޮތީ ހުއްޓިފައެވެ.
އެހެންނަމަވެސް، ގާހުދުވުމުގެ މައްސަލައާ ގުޅިގެން ފަޅުތައް ހިއްކުން ހުއްޓުވާފައި ވަނިކޮށް ޚާއްސަ ހުއްދައިގެ ނަމުގައި ބައެއް ފަރާތްތަކަށް ހުއްދަ ދީގެން މަސައްކަތްތައް ކުރިއަށް ގެންދާކަމުގެ އަޑުތައް ގަދަވެފައިވާތީ ބުރާސްފަތި ދުވަހު އޮތް ނޫސްވެރިންގެ ބައްދަލުވުުމުގައި ނޫސްވެރިއަކު ވަނީ އެކަމާ ސުވާލުކޮށްފައެވެ.
އެ ސުވާލަށް ޖަވާބު ދެއްވަމުން އެންވަޔަރމަންޓް މިނިސްޓަރ ތޯރިޤް އިބްރާހިމް ވިދާޅުވީ، ޚާއްސަ ހުއްދައެއް އެއްވެސް ބަޔަކަށް ނުދޭ ކަމަށާއި، ނަމަވެސް ވަކިވަކިން ބަލާފައި ހުއްދަތައްވެސް ދެމުންގެންދާ ކަމަށެވެ. އެއީ ޚާއްސަ ހުއްދައެއް ނޫންކަމަށްވެސް މިނިސްޓަރ ވިދާޅުވިއެވެ.
ދުނިޔޭގެ ކަނޑުގެ ފިނިހޫނުމިން އެނަލައިޒްކޮށް، ގަވާއިދުން އާންމުކުރާ "ކޮރަލް ރީފް ވޮޗް"ގެ ވެބްސައިޓުގައިވާ ގޮތުގައި، ރާއްޖޭގައި ގާ ހުދުވުން އެންމެ ނުރައްކާތެރި ދަރަޖަ އަށް އަރަން ފެށީ އޭޕްރީލް މަހުގެ 26 ވަނަ ދުވަހު އެވެ. އެ ދުވަހުން ފެށިގެން ރާއްޖެ އޮތީ "އެލާޓް ލެވަލް 1"ގަ އެވެ.
މިހާރު އެ ލެވެލްގައި އޮތީ މެދުރާއްޖެތެރެ އާއި ދެކުނުގެ އަތޮޅުތަކެވެ.
"ކޮރަލް ރީފް ވޮޗް" އިން ލަފާކޮށްފައިވާ ގޮތުގައި ކުރިއަށް އޮތް ފަސް ވަރަކަށް ހަފުތާގެ ތެރޭގައި މުޅި ރާއްޖެ "އެލާޓް ލެވަލް 2" ނުވަތަ އެންމެ ނުރައްކާތެރި ދަރަޖަ އަށް އަރާނެއެވެ.
މިއީ 2016ގެ ފަހުން ރާއްޖޭގައި ގާ ހުދުވުމުގެ މައްސަލަ އެންމެ ބޮޑު އަހަރަށް ވުމުގެ ފުރުސަތު ބޮޑު ކަމަށް ސައިންސްވެރިން ވެސް ވަނީ މި ފަހުން ލަފާކޮށްފައެވެ.
އެހެންނަމަވެސް ސަރުކާރުން ވަކި ޕްރޮޖެކްޓުތަކަކަށް ހުއްދަދެމުންދާތީ ގިނަ ބަޔަކު ދަނީ އެކަމަށް ފާޑުކިޔަމުންނެވެ.
