ތިމާވެއްޓަށް އަސަރުކޮށްގެން މަޝްރޫއެއް ހުއްޓާލާ ޙާލަތުގައި ބަދަލުދޭން ނުޖެހޭ ފަދަ މާއްދާއެއް ދައުލަތުން ހިމަނަންޖެހޭ: ހުސްނުއްސުއޫދު
15 މެއި 2024 | ބުދަ 07:49މައުޟޫއީ މައްސަލަ ކޯޓުގައި އޮއްވައި ގުޅީފަޅު ބިން ހިއްކުން ވަނީ ނިމިފައި
ސުޕްރީމް ކޯޓުގައި ކުރިއަށްދިޔަ އަޑުއެހުމުގެ ތެރެއިން
ބިން ހިއްކުން ފަދަ މަޝްރޫއުތަކާ ގުޅޭ ބޮޑެތި އެއްބަސްވުންތައް ހަދާއިރު، ތިމާވެއްޓަށް އަސަރު ކުރާ ފަދަ ކަމެއް މެދުވެރިވެގެން މަޝްރޫއު ހުއްޓާލިނަމަވެސް ކޮންޓްރެކްޓަރަށް ބަދަލު ދޭން ނުޖެހޭ ފަދަ މާއްދާއެއް ހިމަނަންޖެހޭކަމަށް ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވިދާޅުވެއްޖެއެވެ.
ފަނޑިޔާރު އެހެން ވިދާޅުވީ ގުޅިފަޅު ހިއްކުން ވަގުތީ ގޮތުން ހުއްޓާލުމަށް ހައިކޯޓުން ނެރެފައިވާ އަމުރު ބާތިލުކޮށް ސުޕްރީމް ކޯޓުން ބުދަ ދުވަހު ކުރިޙުކުމުގައެވެ.
މި އަޑުއެހުމުގައި ވާހަކަ ދައްކަވަމުން ފަނޑިޔާރު ހުސްނުއްސުއޫދު ވިދާޅުވީ، ސިވިލް ކޯޓުގައި ކުރިއަށްދާ މައުޟޫއީ މައްސަލަ އަދިވެސް ކޯޓުގައި އެބައޮތް ކަމަށާއި، އެ މައްސަލަ އޮއްވައި ގުޅިފަޅު ބިން ހިއްކުން މުޅިން ނިމިފައިވާ ކަމަށެވެ.
އެހެންކަމުން ވަގުތީ އަމުރު ނެރުމުގެ މުއާލަތްވެސް ކެނޑިފައިވާކަން ފަނޑިޔާރު ފާހަގަ ކުރެއްވިއެވެ.
އޭގެ އިތުރުން، ބިން ހިއްކުން ފަދަ މަޝްރޫއުތަކާ ގުޅޭ ބޮޑެތި އެއްބަސްވުންތައް ހަދާއިރު، ތިމާވެއްޓަށް އަސަރު ކުރާ ފަދަ ކަމެއް މެދުވެރިވެގެން މަޝްރޫއު ހުއްޓާލިނަމަވެސް ކޮންޓްރެކްޓަރަށް ބަދަލު ދޭން ނުޖެހޭ ފަދަ މާއްދާއެއް ހިމަނަންޖެހޭކަމަށް ފަނޑިޔާރު ވިދާޅުވިއެވެ.
ފަނޑިޔާރު ވިދާޅުވީ، ކުރިއަށް އޮތް ތަނުގައި މިފަދަ ކަންކަން ތަކުރާރު ނުވާނެ ގޮތަކަށް ދައުލަތުެ ސިޔާސަތުތައް އެކަށައަޅަންޖެހޭ ކަމަށެވެ. އެގޮތުން ދައުލަތުގެ އިދާރާތައް ޝާމިލުވެގެން ޤައުމީ ސްޓެރެޓިޖިކް އެންވަޔަރމަންޓަލް އެސެސްމަންޓެއް ވީހާ އަވަހަށް އެކުލަވާލަން ޖެހޭކަމަށް ފަނޑިޔާރު ވިދާޅުވިއެވެ.
އޭގެ ބޭނުމަކީ ދައުލަތުގެ ސަރަޙައްދުގައިވާ ބިންތަކާއި ފަޅުތައް ދިރާސާކޮށް، ތިމާވެއްޓަށް ގެއްލުން ކުޑަވާނެ ގޮތަށް ބިންހިއްކުން ފަދަ މަޝްރޫއުތައް ހިންގޭނެ ގޮތްތަކެއް ހަމަޖެއްސުންކަން ފަނޑިޔާރު ފާހަގަ ކުރެއްވިއެވެ.
