ކުލި ކޮންޓްރޯލްނުކޮށް، ޓެކްސީގެ އަގުތަކެއް ކަނޑައެޅޭނެކަމަށް ޤަބޫލުނުކުރާކަމަށް ޓެކްސީ ޑްއިވަރުން ބުނެފިއެވެ.

ޓެކްސީ ޑްރައިވަރުންގެ ކަންބޮޑުވުންތައް ހިއްސާ ކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ޑްރައިވަރުން ބުނީ، ޓްރާންސްޕޯޓް މިނިސްޓްރީން އަގުތައް ކަނޑައަޅާފައިވަނީ ޓެކްސީ ޑްރައިވަރުން ދެފަހަރެއްގެ މަތިން މިނިސްޓްރީއަށް ގޮސް ހުށަހެޅި އެއްވެސް ކަމަކަށް ރިއާޔަތް ކުރުމެއް ނެތި ކަމަށެވެ.

ޓްރާންސްޕޯޓް މިނިސްޓްރީން ވަނީ ގްރޭޓަރ މާލެ ސަރަހައްދުގައި ހަތަރު ފުރޮޅުލީ އުޅަނދުގައި ޓެކްސީ ކުރުމުގެ ބައެއް އަގުތަކަށް ބަދަލު ގެނެސްފައެވެ. އެގޮތުން 6 ސީޓް އަށްވުރެ ދަށުގެ އުޅަނދާއި، 10-7 ސީޓް ދެމެދުގެ އުޅަނދުގެ އަގުތައް ވަނީ މުރާޖައާކޮށް އާންމުކޮށްފައެވެ.

އެކަމާ ގުޅިގެން ޓެކްސީ ޑްރައިވަރުން ބުނީ، އަގުތަަކަށް ގެނައި ބަދަލަކީ ޓެކްސީ ޑްރައިވަރުން ބަލައިގަންނަ ބަދަލެއްވެސް ނޫން ކަމަށެވެ.

މި ނޫސްވެރިންގެ ބައްދަލުވުމުގައި ވާހަކަ ދައްކަމުން ޓެކްސީ ޑްރައިވަރުން އިތުރަށް ބުނީ، ކުލީގެ އަގުތައް ކޮންޓްރޯލްނުކޮށް، ޓެކްސީގެ އަގުތަކެއް ކަނޑައެޅޭނެކަމަށް ޤަބޫލު ނުކުރާ ކަމަށާއި، ފުރަތަމަ އެކަންކަން ކުރުމަށް ސަރުކާރަށް ޑިމާންޑް ކުރާ ކަމަށެވެ.  

އޭގެ އިތުރުން ތަކެތީގެ އަގުވެސް ރައްޔިތުންނަށް ހަމަހަމަ އުސޫލުން ލިބޭނެ ގޮތެއް ފަހިކޮށްދިނުމަށް ސަރުކާރަށް ވަނީ ގޮވާލާފައެވެ.

ޓެކްސީ ޑްރައިވަރުން ބުނާ ގޮތުގައި އެމީހުންގެ ކަންބޮޑުވުމަކީ ޓެކްސީ ކުރުމަކީ އާމްދަނީ ހޯދުމަށް ކުރަމުން އަންނަ މަސައްކަތަށް ވެފައި އަދި އަގުބޮޑުކޮށް ޓެކްސީ ގެނެސް އެއަށް ފައިސާ ދައްކަމުން ދާއިރު، ސަރުކާރުން މިކަމުގެ ތެރެއަށް ވަންނާތީ، އެކަމުގެ ކަންބޮޑުވުމެވެ.

އަދި ޓެކްސީ ޑްރައިވަރުންނަށް ވެސް އަގުހެޔޮކޮށް ދަތުރު ކުރެވޭނީ ޓެކްސީ ޑްރައިވަރުންގެ ބޮލުގައި އެޅިފައިވާ ބޮޑު ކުލިތައް ވެސް ކޮންޓްރޯލް ކުރެވިގެން ކަމަށް ޑްރައިވަރުން ބުނެއެވެ.