ޓެކްސީ ޑްރައިވަރުންނަށް ދިން ޔަގީންކަން އަވާމެންދުރަށް

ސަރުކާރުން ގްރޭޓަރ މާލޭ ސަރަހައްދުގައި ޓެކްސީ ޚިދުމަތް ފަށަން, އެމްޓީސީސީ އާ އެކު އެއްބަސްވުމެއް ގައި ސޮއި ކުރީ މިދިޔަ ފެބްރުއަރީ މަހެވެ. އެކަން ކުރީ ޓެކްސީ ޑްރައިވަރުންނާއި މަޝްވަރާ ނުކޮށް ކަމަށް ޓެކްސީ ޑްރައިވަރުން ސާފުކޮށް ބުނަމުން ދާއިރު ޓްރާންސްޕޯޓް މިނިސްޓަރ އަމީން ވިދާޅުވަނީ ޓެކްސީ ޑްރައިވަރުންޏާއި މަޝްވަރާ ކުރައްވާފައި ވާނެ ކަމަށެވެ.

ކޮންމެއަކަސް ޓެކްސީ ޑްރައިވަރުންގެ ޝަކުވާތައް ބައިވަރެވެ. ހޯމަ ދުވަހު މެންދުރުގެ ނޫސްވެރިންގެ ބައްދަލުވުމަށް ގޮސް ޓްރާންސްޕޯޓް މިނިސްޓަރ މުހައްމަދު އަމީން ޓެކްސީ ޑްރައިވަރުންނަށް ކުރިން ދެއްވި ޔަޤީންކަމާއި އެއްގޮތަށް މަޝްވަރާގެ މޭޒަށް ނައި ސަބަބާއި މެދު ސުވާލު ކުރީމެވެ. އެ ވަގުތު ވެސް އަޅުގަނޑުގެ ފޯނަށް ބައެއް ޓެކްސީ ޑްރައިވަރުންގެ ސުވާލުތައް އާދެއެވެ.

އޭގެ ތެރެއިން އެންމެ ބޮޑަށް ތަކުރާރުވި ސުވާލަކީ ޓެކްސީ ޑްރައިވަރުންނާއި ސައްލާ ނުކުރި ސަބަބަކީ ކޮބާތޯ ކުރި ސުވާލެވެ. އެތައް ފަހަރަކު ވަޒީރު މީގެ ކުރިން ޓެކްސީ ޑްރައިވަރުންނަށް ދިން ޔަޤީންކަމަކީ އެވެރިންގެ ބަހެއް ނެތި ޓެކްސީ ޚިދުމަތް ނުފަށާނެ ކަމުގެ ޔަޤީންކަމެވެ. އެކަމަކު އެ ވާހަކަ އަކީ މިއަދު ނުދައްކާ ވާހަކައަކަށް ވާ ކަހަލައެވެ. އެކަމާއި ސުވާލު ކުރުމުން ވަޒިރު ދެއްވީ ނިކަން ކުރު ޖަވާބެކެވެ. އެއީ ޓެކްސީ ޑްރައިވަރުންގެ ހުއްދަ ހޯދަން އަހާފައި ނުވާނެ ކަމަށް ދޭހަވާ މޭރުމަކުން ދެއްކެވި ވާހަކައެވެ.

ދެން ވަޒީރު އެއާއި ވިދިގެން ވިދާޅުވީ ޓެކްސީ ޑްރައިވަރުން މާޔޫސް ނުވާނެ ކަމަށެވެ. ސަރުކާރުގެ ޓެކްސީ ލައިން ތައާރަފް ކުރުމާ ގުޅޭގޮތުން ޓެކްސީ ޑްރައިވަރުންނާ ސީދާ މަޝްވަރާ ނުކުރައްވާ ކަމަށް އެ މަނިކުފާނު އިއުތިރާފްވެސް ވެވަޑައިގަތެވެ. އެހެންވީމަ ކުރިން ޓެކްސީ ޑްރައިވަރުންގެ އަޑު އަހާނެ ކަމަށް ވިދާޅުވީ މުޒާހަރާ އޮއްބާލަންތޯއެވެ. ނޫނީ އަޑު ކަނޑުވާލަންތޯއެވެ. އާޚިރުގައި ކަން ކުރެއްވީ ޓެކްސީ ޑްރައިވަރުންގެ ކަންފަތް މަތީގައި ހޫނު ތަފާއްޔެއް ޖަހާ ބީދައިންނެވެ.

އެއްކޮޅުން ގުނބޯ ހައްދާ އަޑު އަހާނެ ކަމަށް ބުނުމުން ޓެކްސީ ޑްރައިވަރުން އެތިބީ ސަރުކާރުގެ ބަސް އަހައިގެންނެވެ. އެކަމަކު ސަރުކާރުން އެ ދިނީ ޓެކްސީ ޑްރައިވަރުންނަށް ވެސް ދޯކާއެވެ. އަދި ޓެކްސީ ޑްރައިވަރުންނަށް ގެއްލުން ވާނެ ކަމަށް ބުނާ ބުމާއި މެދު ވެސް ވަޒީރު އުފެއްދެވީ ސުވާލެވެ.

ވަޒީރު ވިދާޅުވަނީ މިއީ އެއްވެސް ސިފައެއްގައި ކުޑަ ވިޔަފާރި އެއް ފުނޑާލުން ނޫން ކަމަށެވެ. ވަޒީރު ވިދާޅުވީ މިއީ ފައިސާ ގޮތުގެ އަނެއް ފުށަށް ބަލަން ޖެހޭ މައްސަލަ އެއް ކަމަށެވެ. ބަލާ ބަލާ ވެސް އެނގޭ އެއް ކަމެއް އެބަ އޮތެވެ. ދެފުށުން ވެސް ސަރުކާރަށް މަންފާވާކަން ހަމަގައިމެވެ.