ގާޒާގެ ރަފާ ސިޓީން މިސްރަށް ދާން އޮންނަ މަގު އިޒްރޭލް ސިފައިންގެ ބާރުގެ ދަށަށް ގެނެސްފައިވާ ކަމަށް އިޒްރޭލްގެ އަސްކަރިއްޔާ އިން އަންގާރަ ދުވަހުގެ ހެނދުނު ބުނެފިއެވެ.
ޓޭންކްތަކާއެކު އިޒްރޭލް ސިފައިން އެ ސަރަހައްދު ހިފައި، ހަމާސް އާ ގުޅުން ހުރި ތަންތަން ޗެކްކުރަމުންދާ ކަމަށް އިޒްރޭލްގެ އަސްކަރިއްޔާއިން ވަނީ ހާމަކޮށްފައެވެ.
މި ސަރަހައްދު އިޒްރޭލް ސިފައިން ހިފުމާއެކު ގާޒާ އިން ނުކުމެވެން އޮންނަ ހަމައެކަނި މަގު ބަންދުވީއެވެ. މިއާއެކު އެހީ ހިފައިގެން ކުރާ ދަތުރުތައް ހުއްޓުމަކަށް ވަނީ އައިސްފައެވެ.
އިންސާނީ އެހީ ފޯރުކޮށްދޭ ފަރާތްތަކުން ބުނެފައިވަނީ އެހީގެ މަގު ބަންދުވުމާއެކު ފަލަސްތީން ރައްޔިތުންނަށް ތަހައްމަލު ނުކުރެވޭ ވަރުގެ ގެއްލުމާ ކުރިމަތިލާން ޖެހޭނެ ކަމުގައެވެ.
އިޒްރޭލް ސިފައިންގެ ފައުޖުތަކަށް އަމާޒްކޮށް ހަމާސްގެ ހަނގުރާމަވެރިންވަނީ ބަޑީގެ ހަމަލާ ދީފައެވެ. އެއާއެކު ދެފަރާތުގެ ދެމެދުގައި ހަމަލާތައް ބަދަލުކުރެވުނު ކަމަށް ރިޕޯޓްތައް ބުނެއެވެ.
ރަފާއަށް އިޒްރޭލް ސިފައިން އަރާފައިވަނީ ހަމާސް ހަނގުރާމަވެރިން ރަފާ އިން ސާފުކޮށްލުމަށް ކަމަށް ބުނެއެވެ.
ހޯމަ ދުވަހުގެރޭ ވައިގެ މަގުން އިޒްރޭލް ސިފައިން ރަފާ އަށް ދިން ހަމަލާތަކުގައި، ހަމާސްގެ 20 ހަނގުރާމަވެރިން މަރުވެފައިވާ ކަމަށް ބައެއް ރިޕޯޓްތައް ބުނެއެވެ. ވަފާ ނިއުސް އޭޖެންސީން ބުނެފައިވަނީ މި ހަމަލާތަކުގައި އާއްމުންގެ އެތައް ބަޔަކު މަރުވެފައިވާ ކަމަށެވެ. އޭގެ ތެރޭގައި ކުޑަކުއްޖަކުވެސް ހިމެނެއެވެ.
އަނެއްކޮޅުން، ޔަމަންގެ ޕޯޓްސިޓީ އަދަންގެ ދެކުނުން ދަތުރު ކުރަމުން ދިޔަ އާގުބޯޓަކާ ވަރަށް ކައިރިން ދެ ގޮވުމެއް ގޮވިކަމުގެ ރިޕޯޓް ލިބިފައިވާ ކަމަށް ޔޫކޭގެ މެރިޓައިމް ޓްރޭޑް އޮޕަރޭޝަންސް އޭޖެންސީން ހާމަކޮށްފިއެވެ. ބޯޓުގެ އޮފިޝަލަކާ ހަވާލާދީ ރޮއިޓާސް އިން ބުނެފައިވަނީ މިހާދިސާގައި ފަޅުވެރިއަކަށްވެސް ބޯޓަކަށްވެސް ގެއްލުމެއް ނުވާކަމަށެވެ.
ހޫތީ ހަނގުރާމަވެރިން މީގެ ކުރިންވެސް ވަނީ ޑްރޯން ބޭނުންކޮށްގެންނާއި މިސައިލް ބޭނުންކޮށްގެން ރަތްކަނޑާއި، ބާބް އަލް މަންދީބް ސްޓްރެއިޓާއި، ގަލްފް އޮފް އަދަން އިން ދަތުރުކުރާ އާގުބޯޓު ފަހަރަށް ހަމާލާ ދީފައެވެ. ހޫތީ ހަނގުރާމަވެރިންނަކީ ހަމާސް އަށް ތާއީދު ކުރާބައެކެވެ. ހޫތީ ހަނގުރާމަވެރިން ތުހުމަތު ކުރަނީ އެ ސަރަހައްދުން ދަތުރުކުރާ އާގުބޯޓު ފަހަރަކީ އިޒްރޭލާ ގުޅުން އޮންނަ ބޯޓުފަހަރު ކަމުގައެވެ.
ހޫތީ ހަނގުރާމަވެރިން ބުނެފައިވަނީ، ގާޒާއަށް އިޒްރޭލުން ދޭ ހަމަލާތައް ހުއްޓާލުމުން ނުނީ ބޯޓުފަހަރަށް ދޭ ހަމަލާތައް އެމީހުން ހުއްޓާނުލާނެ ކަމުގައެވެ.
