ރަފާ އަށް އިޒްރޭލް ސިފައިން އެރުން ޕިކްނިކަކަށް ނުވާނެ ކަމަށް ހަމާސް އިން ބުނެފިއެވެ.
ހަމާސް އިން ބުނެފައިވަނީ ފަލަސްތީން ރައްޔިތުން ހިމާޔަތް ކުރުމަށް އެޖަމާއަތުން ފުރިހަމަ އަށް ތައްޔާރުވެފައިވާ ކަމަށެވެ.
ހަމާސްގެ ވަރުގަދަ ބަސްތައް އިޒްރޭލަށް އަމާޒްކުރީ އިރުމަތީ ރަފާގައި ދިރިއުޅޭ ފަލަސްތީން ރައްޔިތުން އެތަން ދޫކޮށް އެ ސަރަހައްދު ހުސްކުރުމަށް އިޒްރޭލުން އެންގުމާ ގުޅިގެންނެވެ.
އިޒްރޭލުގެ މި އެންގުމަކީ ރަފާއަށް އެއްގަމު މަގުން އިޒްރޭލް ސިފައިން އަރަން ތައްޔާރުވެފައިވާ މިންވަރު އަންގައިދޭ ކަމެއްގެ ގޮތުގައި ރިޕޯޓްތައް ބުނެއެވެ.
އިޒްރޭލުން ރަފާއަށް އަރަން އުޅޭތީ އެކަމާ އދ އިން އިންތިހާއަށް ކަންބޮޑުވުން ފާޅުކޮށްފައިވެއެވެ. މީގެ އިތުރުން އިޒްރޭލް ސިފައިން ރަފާއަށް ނޭރުމަށް ދުނިޔޭގެ ކަންކޮޅުތަކުން އިޒްރޭލަށް އަންނަނީ ގޮވާލަމުންނެވެ.
އިޒްރޭލުން ރަފާއަށް އެރުން ހުއްޓުވޭތޯ ހަމާސް އާ އެކު ގާހިރާގައި ކަމާބެހޭ ގައުމުތަކުން ބޭއްވި ސުލްހައިގެ ވާހަކަތައް ވަނީ ނާކާމިޔާބުވެފައެވެ.
ރަފާއަށް އިޒްރޭލް ސިފައިން އަރާފާނެ ކަމަށް ބެލެވޭ އިރު އެތަނުގައި ވަގުތީ ހިޔާވަހިކަން ހޯދައިގެން މިހާރުވެސް މިލިއަނަކަށްވުރެ ގިނަ ފަލަސްތީން ރައްޔިތުން ވަރަށް ނިކަމެތި ހާލުގައި އެބަތިއްބެވެ. މިހާލުގައި އެހާ ގިނަ ބަޔަކު ތިއްބާ އިޒްރޭލް ސިފައިން އަރައިފިނަމަ ހިތައް ނުގެނެވޭ ވަރުގެ އިންސާނީ ބޮޑު ކާރިސާއަކާ ކުރިމަތިލާން ޖެހޭނެ ކަމަށް އދ އިން ވަނީ ބުނެފައެވެ.
މިކަންކަން މިހެން ހިނގަމުންދާއިރު އިޒްރޭލްގައި ހުންނަ އަލްޖަޒީރާގެ އޮފީސް ބަންދުކުރުމަށް ނަތަންޔާހޫގެ ކެބިނެޓްގެ އިއްތިފާގުން ވަނީ ފާސްކޮށްފައެވެ.
ހުސްވި އަހަރުގެ އޮކްޓޯބަރ މަހުގެ 7 ވަނަ ދުވަހުން ފެށިގެން އިޒްރޭލުން ގާޒާ އަށް ދެމުން ގެންދާ ހަމަލާ ތަކުގައި މިހާތަނަށް 34،735 މީހުން މަރުވެފައިވެއެވެ. 77،108 މީހުން ޒަޚަމްވެފައިވެއެވެ.
