މި ސަރުކާރު އައުމާއި އެކު ރައްޔިތުންގެ ޖީބުތައް ހުސްވެ، ރައްޔިތުން ނިކަމެތި ވެއްޖެ: ނާޒިލް
1 އޯގަސްޓު 2025 | ހުކުރު 14:28މި ސަރުކާރު އައުމާއެކު ރައްޔިތުންގެ ޖީބުތައް ހުސްވެ ރައްޔިތުން ނިކަމެތިވެއްޖެ
އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް އެމްޑީޕީ ހަރުގެ ޖަލްސާގައި ވާހަކަދައްކަވަނީ
މިހާރު މި އޮތް ސަރުކާރު އައުމާއި އެކު ރައްޔިތުންގެ ޖީބުތައް ހުސްވެ، ރައްޔިތުން ނިކަމެތިވެއްޖެ ކަމަށާއި މިހެން ކަންކަން ވަމުންދާއިރުގައި ބަލަން ތިބެގެން ނުވާނޭ ކަމަށް އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެ އެވެ.
އެމްޑީޕީގެ ހަރުގެ ޖަލްސާގައި ވާހަކަދައްކަވަމުން ނާޒިލް ވިދާޅުވީ މިހާރު ހުންނެވި ނާގާބިލް ރައީސް ޑރ. މުޙައްމަދު މުއިއްޒުގެ ސަބަބުން ގައުމު މި ދަނީ ދުވަހަކަށް ވުރެ ދުވަހެއް ދަށަށް ކަމަށާއި މިއަދު މިގޮތަށް ގައުމު ދާން ދޫކޮށްލައިގެން ތިބެއްޖެ ނަމަ މާދަމާ ރައްޔިތުން ކުރަން ޖެހޭ ހިތާމައާއި އުފުލަން ޖެހޭ ތަކުލީފު ބޮޑުވާނޭ ކަމަށެވެ.
ނާޒިލް ވިދާޅުވީ މިއަދު އޮތް ސަރުކާރު ވެރިކަމަށް އައި ފަހުން ގައުމުގައި ތަކެތީގެ އަގު އަތްނުފޯރާ ހިސާބަށް މައްޗަށް ގޮސް ރައްޔިތުންޖެ ޖީބުތައް މުޅިން ހުސްވެ، ރައްޔިތުން ނިކަމެތި ވެއްޖެ ކަމަށެވެ. އަދި މިގޮތަށް ކަންކަން ވަމުން ދާއިރުގައި ބަލަން ތިބެވެން ނެތް ކަމުގައި އޭނާ ވިދާޅުވި އެވެ.
ނާޒިލް ވިދާޅުވީ މިއަދު ރައްޔިތުންގެ ޖީބުތައް ހުސްވީ ކީއްވެތޯ ވިސްނާލާއިރުގައި އެކަން އެގޮތަށް ދިމާވެފައި ވަނީ 2023 ވަނަ އަހަރުގެ ނޮވެމްބަރު މަހުގެ ތެރޭގައި މި ސަރުކާރު ވެރިކަމަށް އައިރު އެ އަހަރަށް ކަނޑައަޅާފައިވާ ބަޖެޓުގެ ބާކީ ހުރި ލާރިކޮޅު އަމިއްލަ ބޭނުންތަކަށް ބޭނުން ކޮށް ހުސްކޮށްލުމުން ކަމަށެވެ. އަދި އޭގެ ފަހުން އޭރު އޮތް މަޖިލީހުން 6.5 ބިލިއަން ރުފިޔާގެ ބަޖެޓަށް އިތުރުކޮށްދީފައިވާ ކަމަށާއި ނަމަވެސް އެ ލާރިކޮޅުވެސް ހުސްކޮށްލާފައިވާ ކަމަށް ނާޒިލް ވިދާޅުވިއެވެ.
" 2023 ވަނަ އަހަރު ނޮވެމްބަރު މަހު މި ސަރުކާރު ހަވާލުވި ދުވަހު، އޭރު ބަޖެޓުގައި ހުރި ލާރިކޮޅު، އެއީ 2023 ވަނަ އަހަރުގެ ބާކީ އޮތް ދުވަސްތަކަށް ހުރިލާރި. އޭގެ ފަހުން ރައްޔިތުންގެ މަޖިލީހުން އަނެއްކާ ވެސް 6.5 ބިލިއަން ރުފިޔާގެ ބަޖެޓެއް ހަމަ 2023 ވަނަ އަހަރުގެ ބަޖެޓަށް އިތުރުކޮށް ދިނީ، އޭރަށް ވެސް 2023 ވަނަ އަހަރަށް އެ ލިބުނީ ގާތްގަނޑަކަށް 12.8 ބިލިއަން ރުފިޔާވަރު، އެވެސް ހުސްކޮށްލީއޭ.އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް
ނާޒިލް ވިދާޅުވީ މި ސަރުކާރުން އެ ފައިސާތައް ހުސްކުރީ ޑްރޯން ގަތުމާއި، މުޅިއާގޭގެ ބޭރު ފާރުގައި ކުލަލުމާއި ރައީސްގެ އަނބިކަނބަލުންނަށް ކަރޯކޭ ސިސްޓަކެއް ގަތުމުގެ އިތުރުން ސަރުކާރުގެ ވަޒީރުންނަށް ކާރު ގަތުމަށް ކަމަށެވެ.
މިކަމުގެ ތަފްސީލްތައް ދެއްވަމުން ނާޒިލް ވިދާޅުވީ މި ސަރުކާރުން ޑްރޯން ގަތުމަށް ވެސް 38 މިލިއަން ޑޮލަރު، މުޅިއާގޭގެ ވަށާ ފާރުގައި ކުލަލުމަށް 16 މިލިއަން ރުފިޔާ، އަދި ރައީސްގެ އަނބިކަނބަލުންގެ ކަރޯކޭ ސިސްޓަމު ގަތުމަށް ވެސް އެތައް ފައިސާ އެއް އަދި ވަޒީރުންގެ ކާރު ގަތުމަށް 147 މިލިއަން ދިވެހި ރުފިޔާ ޚަރަދު ކޮށްފައިވާ ކަމަށެވެ.
ނާޒިލް ވިދާޅުވީ ރައްޔިތުންގެ ޖީބުތަކަށް އެއްވެސް ލުޔެއް ނުލިބޭ ގޮތަށް، ރައްޔިތުންނަށް އެއްވެސް މަންފާއެއް ނުކުރާ ގޮތަށް މި ސަރުކާރުން ބަޖެޓު ހުސްކޮށްލާފައި ވާއިރުގައި މިއަދު ރައްޔިތުންނަށް ކުރިމަތިވެފައި މިވަނީ މީގެން ދުވަހަކުވެސް ކުރިމަތި ނުވާފަދަ ނިކަމެތިކަމެއް ކަމަށެވެ.
