ޖަރުމަނު ލީގުގައި ސްޓަޓްގާޓާ ދެކޮޅަށް ކުޅުނު މެޗުން ބަޔާން މިއުނިކް ބަލިވެއްޖެ އެވެ.

ސްޓަޓްގާޓްގެ އަމިއްލަ ދަނޑުގައި ކުޅުނު މެޗުން ބަޔާން ބަލިވީ 3-1 އިންނެވެ.

މެޗު ފަށައިގެން 29 ވަނަ މިނެޓުގައި ސްޓަޓްގާޓުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ލިއޮނިޑާސް ސްޓާޖިއޫ އެވެ. ނަމަވެސް ފުރަތަމަ ހާފުގެ 37 ވަނަ މިނެޓުގައި ބަޔާނުން ލަނޑު ޖަހައި ނަތީޖާ ހަމަހަމަ ވެސް ކުރި އެވެ. ބަޔާނަށް ލިބުނު ޕެނަލްޓީއެއް ކާމިޔާބުކޮށް، ނަތީޖާ ހަމަހަމަ ކޮށްދިނީ އިންގްލެންޑުގެ ކެޕްޓަން ހެރީ ކޭން އެވެ.

ދެ ވަނަ ފަހަރަށް ސްޓަޓްގާޓުން މެޗުގައި ލީޑު ނެގީ، މެޗުގެ ފަހު ދިހަ މިނެޓުގެ ތެރޭގަ އެވެ. މެޗުގެ ފުރިހަމަ ވަގުތު ހަމަވާން ހަތް މިނެޓަށްވެފައި ވަނިކޮށް، އެ ޓީމަށް ލީޑު ނަގައިދިނީ ހިއޯން ވޫ ޔިއޯން އެވެ. މެޗުގައި ސްޓަޓްގާޓްގެ ތިން ވަނަ ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ސިލާސް އެވެ.

މި މެޗުން ލިބުނު ބައްޔާއެކު، ބަޔާނަށް ޕްރެޝަރު ބޮޑުވާނެ ކަމަށް ބެލެވެ އެވެ. އެއީ ދެން ބަޔާނަށް އޮންނާނީ ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި ރެއާލް މެޑްރިޑުގެ ދަނޑުގައި އެ ޓީމާ ދެކޮޅަށް ކުޅޭ މެޗެވެ. މުބާރާތުގެ ފައިނަލުން ޖާގަ ލިބޭނީ، އެ މެޗުން މޮޅުވާ ޓީމަކަށެވެ.