ޣައްޒާ ރަށްވެހިންގެ ޝުކުރު އެމެރިކާގެ ޔުނިވަރސިޓީ ދަރިވަރުންނަށް!

ބައިނަލްއަޤުވާމީ ފެންވަރުގައި ދުނިޔެ ބަލައިގަނެފައިވާ ޤަރާރުތަކާއި މުޢަހަދާތަކާވެސް ޚިލާފަށް، ޔަހޫދީ އިޒްރޭލުން، ޣައްޒާގައި އޮތް ފަލަސްޠީނުގެ ނަސްލު ދޮވެލުމަށް ގަތުލުއާންމު ހިންގަމުން އެ ދަނީ ފާޅުގައެވެ. އިޒްރޭލު ޖަވާބުދާރީ ކުރެވުނު ޤައުމެއް، އިއްތިޙާދެއް ކީއްކުރަން، ކޯޓެއްވެސް ނެތެވެ. މި ހުރިހާ ކަމެއްވެސް ގޮސް ގުޅެނީ އެންމެ ހަރު އަޑުން އިންސާނީ ޙައްޤުތަކަށް ވަކާލާތު ކުރާ، އަދި ދުނިޔޭގައި އޮތް އެންމެ ވަރުގަދަ ޑިމޮކްރަސީ ކަމަށް ދަޢުވާ ކުރާ އެމެރިކާއާއޭ ދެންނެވުމަކުން ގޯހެއް ނެތެވެ. އެމެރިކާއާއި އެމެރިކާގެ އެކުވެރި ޤައުމުތަކުން ޖަހައިދީގެން އުޅޭ އައްޑަނައިގެ ނިވަލުގައި ތިބެގެން އިޒްރޭލުން ހިންގަމުން ގެންދާ ގަތުލުއާންމު ނުވެސް ފެންނަ ފަދައެވެ.

ފަލަސްޠީނު ރައްޔިތުންގެ ޙައްޤުގައި އެންމެ ބާރަށް މިއަދު އަޑު އުފުލަމުން ދަނީ ބައިނަލްއަޤުވާމީ މުޖުތަމަޢުގެ އާންމު މެންބަރުންނޭ ދެންނެވުމަކުންވެސް ގޯހެއް ނެތެވެ. ބޮޑު ޢަދަދުތަކުން ފައިސާ ޚަރަދުކޮށްގެން ޤައުމުތަކާއި ޖަމިއްޔާތަކުގެ ލީޑަރުންނާއި ވެރިން، ސިލްސިލާ ގޮތެއްގައި ކުރާ މަޝްވަރާތަކުން ނަތީޖާއެއް ނެރެވޭތަނެއް ނުފެނެއެވެ. ނަމަވެސް، އާންމުންގެ އިހުތިޖާޖުތަކާއި މުޒާހަރާތައް، ފެންނަ ވަރަކަށް، އެ ހަރަކާތްތަކާއި ގުޅޭ މީހުންގެ ޢަދަދު ދަނީ އިތުރުވަމުންނެވެ. އެ ލިސްޓަށް އެންމެ ޖޯޝުގައި އިތުރުވި ބަޔަކީ އެމެރިކާގެ އެންމެ ވަރުގަދަ ޔުނިވަރސިޓީތަކުގައި ކިޔަވާ ދަރިވަރުންނެވެ.

ދުނިޔޭގެ އެންމެ މަތީ ފަންތީގެ ޔުނިވަރސިޓީތަކުގައި، އިންތިހާ މަތީ ފާސްތައް ހާސިލު ކުރަމުންދާ ދަރިވަރުންވެސް މިއަދު އަޑު އުފުލަމުންދަނީ ޣައްޒާގައި ތިބި ފަލަސްޠީނުގެ ރައްޔިތުންގެ ޙައްޤުގައެވެ. އެ މަންޒަރުތަކާއި އަޑުތައް، ޣައްޒާއަށްވެސް މިހާރު ވަނީ ފޯރާފައެވެ. ޣައްޒާގެ ރަށްވެހިންނަށް އެކަމުން ލިބުނު ހިތްހަމަޖެހުން، އަމިއްލަ ވަޒަނުގައި ރެފިއުޖީންގެ ގޮތުގައި ހިޔާވަހިކަން ހޯދަމުންދާ ޓެންޓުތަކަށް ބަލައިލުމުން އެކަނިވެސް ދޭހަކޮށްދެއެވެ.

މި ފަހުގެ ތާރީޚުގައި ދުނިޔެ ދެކެފައި ނެތް ފަދަ އިންތިހާ އަނިޔާވެރިކަން ތަހައްމަލު ކުރަމުން ގެންދާ ޣައްޒާގެ ރަށްވެހިންގެ ޙައްޤުގައި، އެމެރިކާގެ ޔުނިވަރސިޓީތަކުގައި ކިޔަވާ ދަރިވަރުން ކުރަމުންދާ ހަޅުތާލުތައް ކުރިއަށް ގެންދަނީ، އެކި ސަރަޙައްދުތަކުގައި ޓެންޓު ޖަހައިގެންނެވެ. އެއީ ޣައްޒާގެ މުޅި އާބާދީހެން ދިރިއުޅެން ޖެހިފައި އޮތީ ފޭލިގެތަކުގައި ކަމުން، އެކަމުގެ ރަމްޒެއްގެ ގޮތުގައެވެ. ޣައްޒާގައި އިޒްރޭލުން ހިންގަމުންދާ ގަތުލުއާންމާ ދެކޮޅަށް ޔުނިވަރސިޓީތަކުގައި އުފުލަމުންދާ އަޑުތައް ދަނީ ހައްތަހާ ގަދަވަމުންނެވެ.

ފަލަސްޠީނުގެ ޙައްޤުގައި އަޑު އުފުލާ ގުރޫޕުތަކުން ދަނީ، ފަލަސްޠީނުގެ ބިންތަކުގައި އިޒްރޭލުގެ އަސްކަރިއްޔާއިން ހިންގަމުންދާ ޖަރީމާތަކަށް މާލީ ގޮތުން އެހީތެރިކަން ފޯރުކޮށްދޭ ކުންފުނިތަކުގައި އިންވެސްޓް ކުރުން ހުއްޓާލުމަށްވެސް ޔުނިވަރސިޓީތަކުގެ ކަމާ ބެހޭ ފަރާތްތަކަށް ގޮވާލާ، ޑިމާންޑް ކުރަމުންނެވެ. މި މުޒާހަރާތަކުގައި ޔަހޫދީ ދަރިވަރުންވެސް ބައިވެރިވެއެވެ.

ޓެންޓުތަކުގައި ޔުނިވަރސިޓީ ދަރިވަރުން ކުރިއަށް ގެންދާ އިހުތިޖާޖުތަކަކީ ސުލްޙަވެރި ހަރަކާތެކެވެ. ޓެންޓު ޖަހާފައި ވާ ސަރަޙައްދުތަކުގައި އެ ދަރިވަރުން އެތައް ވަގުތެއް ހޭދަ ކުރެއެވެ. އެ ވަގުތައް ހޭދަ ކުރަނީ އެކަކު އަނެކަކާ ވާހަކަދައްކާ، ފޮތް ކިޔައި، ކައިބޮއެ ހެދުން ފަދަ ކަންކަމުގައެވެ. އަޅުކަމުގެ އެކި ހަރަކާތްތައްވެސް އެ މައިދާނުން ފެނެއެވެ. ލެކްޗަރުތަކާއި ފުރަތަމަ އެހީގެ ކޯސްތަކާއި، ފަލަސްޠީނުގެ އިންޤިލާބީ ޝިއާރުތައް ފެތުރުންވެސް ދަރިވަރުންގެ މުޒާހަރާގެ މައިދާންތަކުން ކެނޑިނޭޅި ފެއެނެވެ.

ނިރުބަވެރި ޔަހޫދީންގެ ޝިކާރައަކަށްވެ، ޣައްޒާއިން މަރުވި މީހުންގެ ޢަދަދު މިހާރު 35000 އާ ގާތް ކުރަނީއެވެ. ޒަޚަމްވީ މީހުންގެ ޢަދަދު 80000 އާ ގާތް ކުރާ އިރު، ޣައްޒާގެ މުޅި އާބާދީހެން "ދިރިއުޅެމުން" ދަނީ އިންސާނަކަށް ވީތީ ލިބިދޭ އެންމެ އަސާސީ ޙައްޤުތަކުން މަހްރޫމުވެފައިވާ ޙާލުގައެވެ.