ޝަހީދުކޮށްލި މަންމަގެ ބަނޑުން ނެގި ކުޑަކުޑަ ރޫޙު ވެސް މި ދުނިޔެއާ ވަކިވެހިނގައްޖެ!

ފަލަސްޠީނުގެ ބިންތަކަށް އަތްގަދަކޮށް ފޭރެމުންދާ ނިރުބަވެރި އިޒްރޭލުން ހަފުސްކޮށްފައި ވާ ޣައްޒާގައި ކިރިޔާވެސް 'ސަލާމަތެއް' އޮތް ތަނެއް ކަމަށް ބުނަމުން އައީ ދެކުނުގެ ރަފަޙުއެވެ. ނަމަވެސް އެއީވެސް ދުނިޔެއަށް ދައްކާ ދަޅައެކެވެ. މުޅި ޣައްޒާގެ އާބާދީހެން އެތަނެއްގައި ތޮއްޖެހިގެން "ދިރިއުޅެމުން' ގެންދާ ރަފަޙަށްވެސް އިޒްރޭލުގެ ހަމަލާތައް ޢަމާޒު ކުރަނީ ތަނެއް ދޮރެއް ބަލައިގެންނެއް ނޫނެވެ. މީގެ ހަފުތާއެއްހާ ދުވަސް ކުރިން ރަފަޙަށް ދިން ވަރުގަދަ ޙަމަލާއެއްވެސް ޢަމާޒު ކުރީ އާންމުން ދިރިއުޅެމުން ދިޔަ ގެއަކަށެވެ. އެ ޙާދިޘާގައި 19 މީހެއްގެ ފުރާނަ ގެއްލިދިޔަ އިރު، އޭގެ ތެރޭގައި މާބަނޑު މީހަކުވެސް ހިމެނެއެވެ. ސިޒޭރިއަން ހަދައިގެން ބަނޑުގައި އޮތް ދަރިފުޅު ނަގާ، ދެވެން އޮތް ފަރުވާއެއް ދޭން ފެށިއެވެ. އިނދަޖައްސާލާފައި އޮތް ޞިއްޙީ ނިޒާމެއްގެ ތެރެއިން ދެވޭނީ ވަކި ކޮން ފަރުވާއެއް ހެއްޔެވެ؟ މިއަދު އެ ތުއްތު ކުއްޖާފުޅުވެސް މި ދުނިޔޭގައި ނެތެވެ.

ދުނިޔޭގެ އަލިކަން ނުދެކި އުޅެނިކޮށް ނިރުބަވެރިންގެ އަތްތަކުން "ޓެރަރިސްޓު" ޓެގު އެޅުވި ތުއްތު މި ދުނިޔެއަށް ފުރަތަމަ ނޭވާ ލީ، މައިންބަފައިންނާއި ޢާއިލާ މެންބަރުން ވަކިވެފައި ވާ ޙާލުގައެވެ. މަންމަގެ ބަނޑުގައި ޣަރުބަގަންނަމުން ދިޔަތާ އެންމެ 30 ވަނަ ހަފުތާގައެވެ. ތުއްތު ދަރިފުޅުގެ ނަމަކަށް ކީ ސަބްރީން އަލް-ރޫޙުއެވެ. ރޫޙުގެ މަންމަ، ސަބްރީން އަލް-ސަކާނީ އަލް-ޝައިޚްއާއި ބައްޕަ، ޝުކުރީ އަދި 3 އަހަރުގެ ދައްތަ، މަލާކްވެސް މި ދުނިޔެއާ ވަކިވީ ރަފަޙަށް ދިން ޙަމަލާތަކުގައެވެ. ސީރިއަސް ޒަޚަމްތަކަކާއެކު ރޫޙުގެ މަންމަ މި ދުނިޔެއާ ވަކިވެދިޔައީ އެ ވޭނުގައެވެ. ޢިމާރާތީ ހޮސްޕިޓަލުގައެވެ.

ޢިމާރާތީ ހޮސްޕިޓަލުގައި އެމަރޖެންސީކޮށް ސިޒޭރިއަން ހަދައިގެން ތުއްތުއްތު ރޫޙު ނެގުމަށް ފަހު، އޭނާގެ ކަންކަން ބަލަހައްޓަމުން ގެންދިޔައީ ޑޮކްޓަރ މުޙައްމަދު ސަލަމާއެވެ. އެއީ ޢިމާރާތީ ހޮސްޕިޓަލުގެ ނިއު-ނޭޓަލް ޔުނިޓްގެ އެމަރޖެންސީ ހެޑްއެވެ. ޑރ ސަލަމާ ވިދާޅުވި ގޮތުގައި ރޫޙުގެ ނޭވާލާ ނިޒާމަށް މައްސަލަތަކެއް ދިމާވީއެވެ. އަދި ދިފާޢީ ނިޒާމުވެސް ބަލިކަށި ވީއެވެ. 30 ހަފުތާއަކީ، ދުވަސް ނުފުރާ ވިހެއުމަށް އިންތިހާ އަވަސް މުއްދަތެކެވެ. ވެގެން އުޅޭ ގޮތެއްގެ ކުޑަނަމަވެސް ޚިޔާލެއް ފިކުރެއް ނެތް ރޫޙުގެ ފުރާނަ، މި ދުނިޔެއާ ވަކިވީ އޭޕްރިލް 25 ވީ ބުރާސްފަތި ދުވަހުއެވެ. އެ ތުއްތުތުއްތު ހަށިގަނޑު ކަފުންކޮށް، ވަޅުލީ ރަފަޙުގެ ސަހަރާއެއްގައެވެ.

ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް، މި ބިންމަތިން ފޮހެލާން ކަމަށް ބުނެ، ޔަހޫދީ އިޒްރޭލުން އޮކްޓޯބަރ 7 ވަނަ ދުވަހު ޣައްޒާގައި ހިންގަން ފެށި ގަތުލުއާންމުގައި އެ ރަށުން މަރުވި މީހުންގެ ޢަދަދު 34000 އަށް ވުރެ މައްޗަށް އަރައެވެ. 70 އެތައް އިންސައްތައެއް ހިއްސާކުރަނީ އަންހެނުންނާއި ކުޑަކުދިންނެވެ. އެވަރުންވެސް އިޒްރޭލުން ބުނަމުން ދަނީ، އާންމު ރައްޔިތުންނަށް ޢަމާޒުކޮށްގެން "ގަސްތުގައި" ޙަމަލާ ނުދޭ ކަމަށެވެ. އާންމުން މަރުވަނީ، ޙަމާސް ޖަމާޢަތުގެ ކިއްލާތަކެއްގެ ގޮތުގައި އާންމުން ތަންތަން ބޭނުން ކުރާތީ ކަމަށް ބުނެ، އިޒްރޭލުން އަބަދުވެސް ބަލަނީ ދިފާޢަށް ކުޅެވޭތޯއެވެ. ފަލަސްޠީނުގެ މިނިވަންކަމަށް ގޮވާލާ ހިންގާ ހަރަކާތެއްގައި ޓެރަރިސްޓުންގެ ޓެގު އަޅުވަންޖެހުނު ސަބަބަކާ މެދުވެސް ވިސްނާލަންޖެހެއެވެ.

ދުނިޔޭގެ އެކި ކަންކޮޅުތަކުން އެތައް ބައެއްގެ ސަމާލުކަން ހޯދި ރޫޙުގެ މަހާނަ ކައިރީގައި އިށީނދެލައިގެން އިނީ އޭނާގެ ބޮޑުބެ، ރާމީ އަލް-ޝައިޚް ޖުދާއެވެ.

އެ ސިކުނޑީގައި އެނބުރެމުން ދިޔައީ ރޫޙުއާއި އޭނާގެ ޢާއިލާގެ ހަނދާންތަކެވެ. އެ ހިތުގައި އަޅަމުން ދިޔައީ މި ދުނިޔޭގައި އެ ޢާއިލާ ނެތް ކަމުގެ ވޭނެވެ.

އޭނާއަށް ބޮޑުބޭބެ ކިޔާ ދަރިފުޅު، ރޫޙުގެ ޙާލު ބެލުމަށް ކޮންމެ ދުވަހަކުވެސް، ޢިމާރާތީ ހޮސްޕިޓަލަށް ރާމީ ދެއެވެ. ރޫޙުގެ ނޭވާލާ ނިޒާމުގައި މައްސަލަތަކެއް އުޅޭކަން، ޑޮކްޓަރުންވެސް އޮތީ ރާމީއަށް އަންގާފައެވެ. ނަމަވެސް އެއީ އިންތިހާއަށް ސީރިއަސް ދަރަޖައަކަށް ކަން ރާމީއަށް އޮތީ ވިސްނާ ނުލެވިއެވެ. އެކަން ފަހުމްވީ ހޮސްޕިޓަލުން ގުޅި ހިސާބުންނެވެ. ރޫޙުގެ މަރުގެ ޚަބަރު ލިބުނު ހިސާބުންނެވެ.

ޣައްޒާގެ ބިމުން ފަލަސްޠީނުގެ ނަސްލު ދޮވެލުމަށް އިޒްރޭލުން ހިންގަމުން ގެންދާ ޖަރީމާތަކަށް 7 މަސް ވާން ގާތް ވެފައި ވާ އިރު، ޣައްޒާގެ ޞިއްޙީ ނިޒާމު އޮތީ މުޅިންހެން އިނދަޖައްސާފައެވެ. އެންމެ ވަރުގަދަ ހަނގުރާމަތަކުގައިވެސް ރައްކާތެރިކަން ދޭ ސަރަޙައްދުތަކުގެ ތެރޭގައި ހިމެނޭ ހޮސްޕިޓަލުތައްވެސް ހަފުސްކޮށް ނިންމައިފިއެވެ. ޣައްޒާގައި ޚިދުމަތް ދެވޭ ޙާލަތުގައި ހުރީ އިންތިހާއަށް މަދު ހޮސްޕިޓަލުތަކެކެވެ. އެތަންތަންވެސް ކިރިޔާ ހިންގާލެވޭ ކަމެވެ. ކަރަންޓުގެ ސަޕްލައި އެހާ ތަދެވެ. ޞިއްޙީ އާލާތްތަކުން ޖަރާސީމު ފިލުވާ، ސްޓެރެލައިޒް ކުރެވޭނެ މާ ބޮޑު ގޮތެއް ނެތެވެ. އެހެނިހެން ތަކެތީގެ ދަތިކަންވެސް ކުރިމަތިވެފައި ވަނީ އޭގެ އެންމެ އިންތިހާއަށެވެ.