ކޭންގެ ދެ ލަނޑުން ބަޔާން މޮޅުވެއްޖެ

ޖަރުމަނު ލީގުގައި އައިންޓްރަކްޓް ފްރޭންކްފާޓްއާ ދެކޮޅަށް ކުޅުނު މެޗުން ބަޔާން މިއުނިކް މޮޅުވެއްޖެ އެވެ.

ބަޔާންގެ އަމިއްލަ ދަނޑުގައި ފްރޭންކްފާޓާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ބަޔާނުން ލީޑު ނަގާފައި ވަނިކޮށް، ފްރޭންކްފާޓުން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ލަނޑެއް ޖަހައިގެން ބަޔާން ވަނީ މޮޅުވެފަ އެވެ.

މެޗު ފަށައިގެން ނުވަ ވަނަ މިނެޓުގައި ބަޔާނަށް ލީޑު ނަގައިދިނީ އެ ޓީމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އެވެ. ނަމަވެސް އޭގެ ފަހުން މެޗުގެ 23 ވަނަ މިނެޓުގައި ފްރޭންކްފާޓުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ހޫގޯ އެކިޓޭޓް އެވެ. މެޗުން ބަޔާން މޮޅުވީ ދެ ވަނަ ހާފުގައި ލިބުނު ޕެނަލްޓީން ލަނޑު ޖަހައިގެންނެވެ. 61 ވަނަ މިނެޓުގައި އެ ލަނޑު އެ ޓީމަށް ޖަހައިދިނީ ކޭން އެވެ.

ޓޮޓެންހަމް ދޫކޮށްލުމަށްފަހު ބަޔާނަށް ބަދަލުވެ ކޭން އަންނަނީ މޮޅު ކުޅުމެއް ދައްކަމުންނެވެ. އެހެން ނަމަވެސް މި ސީޒަންގެ ޖަރުމަނު ލީގުގަައި ބަޔާންގެ ނަތީޖާތައް ދަށެވެ. އެ ޓީމަށް މި ސީޒަންގައި ލީގު ދިފާއު ނުކުރެވުނެވެ. މިއީ ފާއިތުވި 11 އަހަރުގެ ތެރޭގައި ބަޔާން ނޫން އެހެން ޓީމަކުން ޖަރުމަނު ލީގު ކާމިޔާބު ކުރި ފުރަތަމަ ފަހަރެވެ. ބަޔާންގެ މައްޗަށް ކުރި ހޯދައި މި ސީޒަންގެ ޖަރުމަނު ލީގު ކާމިޔާބު ކުރީ ބަޔާ ލެވަކޫސަން އެވެ.