ކުރިއަށް އޮތް ރައްޔިތުން މަޖިލީހުގެ އިންތިޚާބުގައި ވޯޓު ދޭއިރު، ރައްޔިތުން ވިސްނަންޖެހޭ
ރައީސް ޑރ. މުހައްމަދު މުއިއްޒުއާއި ޕީއެންސީގެ ޗެއަރޕާސަން އަބްދުއްރަހީމް އަދި ކުރީގެ ރައީސް ޔާމީން
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރޯލް މޮޑަލްއަކީ ރައީސުލްޖުމްހޫރިއްޔާގެ ސްޕެޝަލް އެޑްވައިޒަރު އަދި ޕީއެންސީގެ ޗެއަރޕަރސަން އަބްދުއްރަހީމް އަބްދުﷲ ކަމަށާއި، ދެން މި ގައުމުގެ ކަންކަންދާނެ ގޮތް ރައްޔިތުން އަމިއްލައަށް ތަސައްވުރު ކުރެއްވުމަށް ކުރީގެ ރައީސް ރައީސް އަބްދުﷲ ޔާމީން އެދިވަޑައިގެންފިއެވެ.
ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމް ބާތިލްކޮށް އަލުން އެ މައްސަލަ ބަލަން ހައިކޯޓުން ކްރިމިނަލް ކޯޓަށް އަމުރު ކުރުމާއެކު، ޖަލު ހުކުމުން މިނިވަންވެވަޑައިގެން ބުރާސްފަތި ދުވަހުގެ ރޭ ވަނީ އެމަނިކުފާނު ވަނީ ނޫސްވެރިންނާ ބައްދަލުކުރައްވާ ވާހަކަފުޅު ދައްކަވާފައެވެ. މިސަރުކާރަށް ކުރިއަށް އޮތް ރައްޔިތުން މަޖިލީހުގެ މެޖޯރިޓީ ލިބިއްޖެނަމަ ދިވެހިރާއްޖެއިން ކޮންކަހަލަ މަންޒަރުތަކެއް ފެނިގެންދާނެ ކަމަށް ގަބޫލުފުޅު ކުރައްވަންތޯ ނޫސްވެރިއަކު ދެންނެވި ސުވާލަށް ޔާމީން ވިދާޅުވީ މީހަކަށް އާރާއިބާރާއި، ފައިސާގެ ތަނަވަސްކަން އިންތިހާއަށް ލިބުމުން ބަދަލުވާނެ ގޮތް ދެނެވޮޑިގަންނަވާނީ ﷲ ކަމަށެވެ. އަދި ތަނަވަސްކަމުގެ ބާރުގައި އިންސާނާގެ ސިކުނޑި ބޭނުންގޮތަކަށް އަނބުރާލެވޭނެ ކަމަށް ޔާމީން ވިދާޅުވިއެވެ.
ރާއްޖޭގެ ހާލަތަށް އިޝާރާތް ކުރައްވައި ޔާމީން ވިދާޅުވީ އެންޓި ކޮރަޕްޝަން ކޮމިޝަންގައި ގިނަ މައްސަލަތަކެއް އެބަހުރި ކަމަށާއި، އެމައްސަލަތައް ވެސް ނުބެލޭ ކަމަށެވެ. އަދި މިއަދު އެއްވެސް މީޑިއާއަކުން ވެސް އެފަދަ މައްސަލަތައް ހޫނު ނުކުރާ ކަމަށް ޔާމީން ވިދާޅުވިއެވެ.
މީގެ އިތުރުން ޔާމީން ވިދާޅުވީ ރައީސް މުއިއްޒުގެ ރޯލް މޮޑެލްއަކީ އަބްދުއްރަހީމް ކަމަށެވެ. އެހެންކަމުން ދެން ގައުމުގެ ކަންކަން ދާނެ ގޮތް ރައްޔިތުން އަމިއްލައަށް ތަސައްވުރު ކުރަންޖެހޭ ކަމަށް ޔާމީން ވިދާޅުވިއެވެ.
ޔާމީން ވިދާޅުވީ ކުރިއަށް އޮތް ރައްޔިތުން މަޖިލީހުގެ އިންތިޚާބުގައި ވޯޓު ދޭއިރު، ރައްޔިތުން ވިސްނަންޖެހޭ ކަމަށެވެ.
އެއީ ސަރުކާރަކަށް ރައްޔިތުންގެ އިތުބާރު އޮންނަން ޖެހޭ ކަމަށާއި، ސަރުކާރުގެ ބޭފުޅުން ރައްޔިތުންނަށް ތެދު ހަދައި، ސަރުކާރަކުން ކޮށްދޭނެ ކަމަށް ބުނާ ކަންކަން ތަންފީޒުކުރަމުންދަނީ ކިހާ މިންވަރަކަށްތޯ ބަލައި މިނެކިރަންޖެހޭ ކަމަށެވެ.
