ރައީސް މުއިއްޒުގެ މައްޗަށް ކަރަޕްޝަންގެ ގިނަ ތުހުމަތުތަކެއް ކުރެވެފައިވާ ކަމަށާއި، އަމިއްލަފުޅަށް ނަން ކްލިއަރ ނުކުރާހާ ހިނދަކު އެ ތުހުމަތުތައް ދެމި އޮންނާނެ ކަމަށް ރައީސް ޔާމީން ވިދާޅުވެއްޖެއެވެ.
ޕީޕަލްސް ނޭޝަލް ފްރަންޓް (ޕީއެންއެފް) ން ހޯމަ ދުވަހުގެ ރޭ ބޭއްވި ޖަލްސާ ގައި ވާހަކަފުޅު ދައްކަވަމުން، މުއިއްޒު ސިޓީ ކައުންސިލްގައި ހުންނެވި އިރުގެ ކަރަޕްޝަން މައްސަލަތައް އެބަހުރި ކަމަށާއި، މުއައްސަސާތަކަށް "އަތް ނުބާނަމޭ ބުނާއިރު" ވެރިކަމަށް އަހަރެއް ވެގެން ދިޔަ އިރުވެސް އެ މައްސަލަތައް ނުހިނގަނީ ކީއްވެތޯ އައްސަވާ ޔާމީން ވަނީ ސުވާލު ކުރައްވާފައެވެ.
"އަޅުގަނޑު އިލްތިމާސް ކުރަން މުއިއްޒު އަށް މުއިއްޒުގެ ހުށަހެޅިފައި އެހުރި ތުހުމަތު ތަކުން މުއިއްޒު ބަރީއަ ވެ ވަޑައިގަންނަވަން." މުއިއްޒުގެ ރިޔާސީ ޓިކެޓް އެންޑޯޒް ކުރެއްވި ކުރީގެ ރައީސް ވިދާޅުވިއެވެ.
ރިޔާސީ އިންތިޚާބުގައި މުއިއްޒު އާ އެކުގައި ހުންނެވި ޔާމީން ވިދާޅުވީ، އެންޓިކަރަޕްޝަން ކޮމިޝަން (އޭސީސީ) ގައި އޮތް މުއިއްޒުގެ މައްސަލަތައް ހިނގިޔަ ދިނުމަށް ފުރަސަތު ދެއްވުމަށެވެ.
ރައީސް ޔާމީން ވަނީ އޭސީސީ އިން މަސައްކަތް ކުރަމުންދާ ގޮތައްވެސް ފާޑު ވިދާޅުވެފައެވެ.
އޭސީސީން ކުރަން ޖެހޭ ބޮޑެތި ކަންކަން ހުއްޓާ، ތާކުންތާކު ނުޖެހޭ ކަންކަމުގެ ތެރެއަށް ވަންނަ މައްސަލަ ޔާމީން ވަނީ ފާހަގަ ކުރައްވާފައެވެ.
މިގޮތުން، ދާދި ފަހުން، ޑރ. މުއިއްޒުގެ ދޮން މަންނަ ޖީ. ސްކީލާން ރާއްޖޭން ޑީޕޯޓު ކޮށްލުމާއި، އޭނާ އާ މެދު މުއިއްޒު އިހާނެތިކޮށް ކަންކަން ކުރެއްވި ގޮތުގެ މައްޗަށް ތައްޔާރު ކުރި ތަހުގީގީ ޑޮކިއުމެންޓަރީ އަށް މޯލްޑިވްސް މީޑިއާ ކައުންސިލުން އެވޯޑް ދިނުމާ ގުޅިގެން ކުއްލި އަކަށް އެ އެވޯޑު ދިން ގޮތުގެ ތަހުގީގެއް ހިންގަން އޭސީސީން ވަނީ ފަށާފައެވެ.
ޔާމީން ވިދާޅުވީ، އެ ޑޮކިއުމެންޓަރީ އަށް މާކްސް ދީފައި ހުރި ގޮތް ބަލައިގެން ދައުލަތައް ވަންނާނެ ފައިސާ އެއް ނޯންނާނެ ކަމަށާއި، ރައީސް މުއިއްޒު އާއި އަބްދުއްރަހީމް މެން ފަދަ ފަރާތްތަކުގެ މައްޗަށް ކުރެވިފައިވާ ކަރަޕްޝަންގެ މައްސަލަތައް ފަދަ މައްސަލަތައް ބެލުން މާ ރަނގަޅު ވާނެ ކަމަށެވެ.
ސަރުކާރުގެ އިސް ފަރާތްތަކުގެ މައްޗަށް ތުހުމަތު ކުރެވޭ ކަރަޕްޝަނާއި އެހެނިހެން މައްސަލަތައް ނުބަލާ ދޫކޮށްލާކަން ފާހަގަ ކުރައްވަމުން ޔާމީން ވިދާޅުވީ މި ސަރުކާރުން ހަދާ ގޯސްތައް ކަނޑައެޅިގެން ރައްޔިތުންގެ މަޖިލީހުގެ މެމްބަރުންނަށް އެނގޭނެ ކަމަށެވެ.
ބާރުތައް ވަކިވެފައިވާ ނިޒާމުގެ ވާހަކަ އާއި މުވައްސަސާތަކުގެ މިނިވަންކަމުގެ ވާހަކަ ދައްކަނީ މަތި އޮމާންކޮށް ރީތިކުރަން ކަމަށްވެސް ޔާމީން ވަނީ ވިދާޅުވެފައެވެ.
"ތޭރަ މެމްބަރުން ކަނޑާލައިގެން ގެންދިޔަ މައްސަލަ އަށް ޖަވާބުދާރީ އެއް ނުވެވޭނެ، ރާޖޫ މާލެ (ރަސްމާލެ) ހިއްކަން ހިންގި ޖަރީމާ އަށް ޖަވާބުދާރީ އެއް ނުވެވޭނެ، (އެމްއެމްއޭ އިން) ނެރަފަ ހުރި އެސްޑީއާރު ތަކަށް ޖަވާބުދާރީ އެއް ނުވެވޭނެ، ވައްދާފައި ހުރި ކަރަޕްޝަންގެ މައްސަލަތަކަށް ޖަވާބުދާރީ އެއް ނުވެވޭނެ، މަޖިލިސް މެމްބަރުން ހޮވި ގޮތް ޖަވާބުދާރީ އެއް ނުވެވޭނެ،" ޔާމީން ވިދާޅުވިއެވެ.
"އެބޭފުޅުން ދައްކަވާ ވާހަކަފުޅުތައް އިވެލުއޭޓް ކުރާ ބަޔަކު ރާއްޖޭގައި ތިބިކަން ގަބޫލު ފުޅު ކުރައްވަން ޖެހޭނެ،" ކަން ޔާމީންގެ ވާހަކަފުޅުގައި ފާހަގަ ކުރެއްވިއެވެ.
