ރައީސް ޔާމީން އިންޑިއާގެ ވިއޯންއަށް އިންޓަވިޔު ދެއްވަން އެސްބަސްވެވަޑައިގެންފި

ނިމިދިޔަ ރިޔާސީ އިންތިޚާބުގެ ދުވަސްވަރާ ދިމާކޮށް އޭރު އިދިކޮޅުގައި އޮތް ޕީޕީއެމް/ޕީއެންސީން ހިންގި އެންމެ ބޮޑު އެއް ކެމްޕޭން ކަމަށްވާ 'އިންޑިއާ އައުޓް' ކެމްޕޭނާ ގުޅުވައި އިންޓަވިއުދިނުމަށް އިންޑިއާގެ ވިއޯން ނޫހުން ދިން ދައުވަތު ކުރީގެ ރައީސް އަބްދުﷲ ޔާމީންއަބްދުލްޤައްޔޫމް ގަބޫލުކުރައްވައިފިއެވެ.

އިންޑިއާގެ ވިއޯން ނޫހުން ދިން ދައުވަތު ރައީސް ޔާމީން ގަބޫލުފުޅުކުރައްވާފައި މިވަނީ މިދިޔަ ރިޔާސީ އިންތިޚާބުގެ ދުވަސްވަރާ ދިމާކޮށް އޭރު ހިންގި 'އިންޑިއާ އައުޓް' ކެމްޕޭނާ ގުޅުވައި އިންޑިއާގެ ވިއޯން ނޫހަށް ފޮރިން މިނިސްޓަރު ޑރ. އަބްދުﷲ ޚަލީލް ދެއްކެވި ވާހަކަތަކާ ގުޅިގެން ރައީސް ޔާމީން އެ ނޫހަށް ދައުވަތުދެއްވަވާފައި ވަނިކޮށެވެ.

Advertisement

އިންޑިއާއަށް ކުރެއްވި ރަސްމީ ދަތުރުފުޅެއްގެ ތެރެއިން ވިއޯން ނޫހާ ވާހަކަދައްކަވަމުން ޚަލީލް ވަނީ “އިންޑިއާ އައުޓް“ އަކީ ސީދާ ޔާމީންގެ ހަރަކާތެއް ކަމަށް ވިދާޅުވެފައެވެ.

ޔާމީންގެ އައު ޕާޓީ، ޕީއެންއެފްގެ މަސައްކަތްތަކުގައި އިސްކޮށް އުޅުއްވާ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހް ޖަމާލް ވަނީ ރާއްޖެ ވަޑައިގެން ސީދާސީދަލަށް ޔާމީނާ އެކު އިންޓަވިއެއްކުރައްވަން އެ މަނިކުފާނު ވިއޯން ނޫހަށް ދައުވަތުދެއްވައި ކަމަށް ވިދާޅުވެ، އެކްސްގައި ޕޯސްޓެއް ކުރައްވައިފައެވެ.

މިކަމާއި ގުޅިގެން ބަހެއް ހޯދާލުމަށް "ރާއްޖެ ޓީވީން' ސުވާލު ދެއްނެވެމުން. އެ ސުވާލުގެ ޖަވާބުގައި ރައީސް ޔާމީން ވިދާޅުވީ އިންޑިއާގެ ވިއޯން ނޫހުން އިންޓަވިއުއަކަށް އެދި ދެއްވި ދައުވަތު ގަބޫލުކުރައްވާފައިވާ ކަމަށެވެ.

ވިއޯން ނޫހުން ރިޕޯޓުކޮށްފައިވާ ގޮތުގައި އެ ނޫހުން މިހާރު ވަނީ ވީހާ ވެސް އަވަހަކަށް އޮންލައިން އިންޓަވިއުއެއް ހަމަޖައްސަވައި ދެއްވަން ރައީސް ޔާމީންގެ ކިބައިން އެދިފައެވެ.

ވިއޯން ނޫހަށް ދެއްވި އިންޓަވިއުގައި ފޮރިން މިނިސްޓަރު ޚަލީލް ވަނީ އިންޑިއާ އައުޓަކީ ޔާމީންގެ އިސްނެންގެވުމަށް ހިންގި ހަރަކާތެއް ކަމަށް ވިދާޅުވެފައެވެ. މިހާރު އެ މަނިކުފާނު ހުންނެވީ ޕީއެންސީ/ޕީޕީއެމް ދޫކޮށް ވަޑައިގެންކަން ފާހަގަކުރައްވައި ޚަލީލް ވަނީ މިހާރު އެ މަނިކުފާނުގެ ފިކުރުތަކާއި ޕީއެންސީއާ އެއްވެސް ގުޅުމެއް ނެތް ކަމަށް ސިފަކުރައްވައިފައެވެ.

ޚަލީލް ވިދާޅުވީ މިހާރު ރައީސް ޔާމީނާއި ސަރުކާރާއި ދެމެދު އޮތީ މުޅިން އެހެން ތަފާތު ފިކުރެއް ކަމަށާއި އެގޮތުން މިވަގުތު ޔާމީން މަސައްކަތް ކުރައްވަމުން ގެންދަވަނީ ސަރުކާރާ ދެކޮޅަށް ކަމަށެވެ.

އިންޑިއާ އައުޓް ކެމްޕޭނަކީ އިދިކޮޅުގައި ޕީޕީއެމް/ޕީއެންސީ އޮތްއިރު ރާއްޖޭގައި ގާއިމުވެ ތިބި އިންޑިއާ މިލިޓަރީ ސިފައިން އަނބުރާ ގައުމަށް ފޮނުވާލަންޖެހޭ ކަމަށް ބުނެ ފެށި ކެމްޕޭނެކެވެ. އެ ކެމްޕޭންގައި އެންމެ އިސްކޮށް އުޅުއްވީ ވެސް ރައީސް ޔާމީނެވެ. އެ މަނިކުފާނު ވަނީ “އިންޑިއާ އައުޓް” ޓީޝާޓް ތުރުކުރައްވައިގެން ރަށްރަށަށް ވަޑައިގެން ވެސް އެ ކެމްޕޭން ހިންގަވާފައެވެ.

އިންޑިއާ އައުޓް ކެޕްޕޭނުގައި މިހާރުގެ މި ސަރުކާރުގައި ވެސް އިސްކޮށް އުޅުއްވާ ގިނަ ބޭފުޅުން ވެސް ބައިވެރިވެވެޑައިގެންފައި ވާއިރު، މި ސަރުކާރުން ވެރިކަމަށް އައީ ވެސް އިންޑިއާ ސިފައިން އަނބުރާ ފޮނުވާލުމުގެ ވައުދާ އެކުއެވެ. މި ސަރުކާރުން ވަނީ އެ ވައުދު ފުއްދިއްޖެކަން އިއުލާނުކޮށްފައެވެ. އެކަމަކު، ޔާމީން ގެންދަވަނީ އެއީ އޮޅުވާލުމެއް ކަމަށް ސިފަކުރައްވަމުންނެވެ. އަދި، ކުރިން ވެސް ތިބި ގޮތަށް ރާއްޖޭގައި އިންޑިއާ ސިފައިން އަދިވެސް އެބަތިބި ކަމަށް އެ މަނިކުފާނު ގެންދަވަނީ ތުހުމަތުކުރައްވަމުންނެވެ.

އެގޮތުން މިހާރު މި ގައުމުގައި އިންޑިއާ ސިފައިން ތިބީ، އޭރު އަޅަައިގެނތިބި މިލިޓަޮރީ ޔުނީފޯމުގެ ބަދަލުގައި ކުލަހެދުމުގައި ކަމަށް ވެސް ގިނަ ބަޔަކު އަންނަނީ ތުހުމަތުކުރަމުންނެވެ.