ތަންތަނުގެ މަޤާމުތަކަށް މީހުން ހަމަޖެއްސިއަސް ރައްޔިތުންގެ ވޯޓަކީ ސަރުކާރަށް ކޮންޓްރޯލް ކުރެވޭނެ އެއްޗެއް ނޫން، އެހެން ހީކުރުމަކީ ގޯސް ހީއެއް، ކުށްހީއެއް: ރައީސް ޔާމީން

އެންމެ މުހިއްމު މުއައްސަސާއަކަށް މިހާރު އޮތް ދެ މުއައްސަސާ ކަމަށްވާ އެންޓިކޮރަޕްޝަން ކޮމިޝަން އާއި، އިލެކްޝަންސް ކޮމިޝަން އަޅުވެތިކޮށް ނިމުނީ ކަމަށާއި، އެކަމަކު މި ތަންތަނުގެ މަޤާމުތަކަށް މީހުން އަދި ހަމަޖެއްސިއަސް ރައްޔިތުންގެ ވޯޓަކީ ސަރުކާރަށް ކޮންޓްރޯލް ކުރެވޭނެ އެއްޗެއް ނޫން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފް އިން ސިލްސިލާކޮށް ބާއްވަމުން އަންނަ އެޕާޓީގެ ފްރަންޓް އޮފީސް ޖަލްސާގައި ހޯމަ ދުވަހުގެ ރޭ ވާހަކަފުޅު ދައްކަވަމުން ރައީސް ޔާމީން ވިދާޅުވީ، ތަންތަނުގެ މަޤާމުތަކަށް މީހުން ހަމަޖެއްސިއަސް ރައްޔިތުންގެ ވޯޓަކީ ސަރުކާރަށް ކޮންޓްރޯލް ކުރެވޭނެ އެއްޗެއް ނޫން ކަމަށާއި، އެހެން ހީކުރުމަކީ ގޯސް ކުށްހީއެއް ކަމަށެވެ.

ރައީސް ޔާމީން ވިދާޅުވީ ރައީސަކީ ޤައުމުގެ ޚާދިމެއް ކަމަށާއި، ގާނޫނުގައި އެ މަނިކުފާނާ މަތިކޮށްފައި ހުރި ކަންތައްތައް ގާނޫނުގައި ބުނާ ގޮތަށް ތަންފީޒު ކުރަން ހަވާލުކޮށްފައި ހުންނަ ބޭފުޅެއް ކަމަށެވެ. އޭގެ ބަދަލުގައި ގާނޫނު އެ ބޭފުޅާއަށް ފަހިވާ ގޮތަށް ބަދަލުކޮށްލުމަކީ އޭގެ ޒާތުގައި ކުރެވޭނެ ކަމެއް ނޫން ކަމަށް ވިދާޅުވިއެވެ.

"އަޅުގަނޑު މި ދަންނަވަނީ ޤާނޫނުއަސާސީގައި ހުރި އުސޫލުތައް، އަމިއްލަފުޅަށް އަމިއްލަ ގަޔަށް ހެޔޮ ވަރުވާ ވަރަށް ގަމީސް ފަހަން ކޯޓު ފަހަން ނޫޅުއްވާށޭ، އަބަދު އެއްބަޔަކު ވެރިކަމުގައި ތިބޭނެ ކަމަކަށް ނޫނީ އަބަދު އެ ބޭފުޅުންގެ މަޞްލަޙަތު ހިމާތް ވާނެ ކަމަށް ހީފުޅު ކުރެއްވުމަކީ ހަމަ ގޯހެއް އިނގޭތޯ. މިހާރު ވެސް ރައްޔިތުންނަށް މި ހިނގާ ކަންކަމުގައި ޙަޤީޤަތް ނޭނގެނީކީ ނޫން ވަރަށް ގިނަ މީހުންނަށް ވަރަށް ގިނަ ރައްޔިތުންނަށް ޙަޤީޤަތް އެނގޭ" ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވި ގޮތުގައި، ދައުލަތުގެ ފައިސާއަށް ވާނުވާ ގޮތް އެނގެން ރައްޔިތުން ބޭނުންވެއެވެ. އެއީ ރައްޔިތުން އަބަދުވެސް ކަންބޮޑުވާ ކަމެކެވެ. އެހެންކަމުން ދައުލަތުގެ ފައިސާއަށް ވެފައި ހުރި ގޮތް ރައީސުލްޖުމްހޫރިއްޔާ ވިދާޅުވެދެއްވުމަށް އެމަނިކުފާނު ގޮވާލެއްވިއެވެ. އަދި އެންޓި-ކޮރަޕްޝަން ކޮމިޝަނުގައި ހުރި މައްސަލަތައް ނުހިނގައިގެން އުޅެނީ ކީއްވެގެންތޯ ވެސް ސުވާލު އުފައްދަވާ އެކަންކަން ވިދާޅުވެ ދެއްވުމަށް ރައީސް ޔާމީން އެދިވަޑައިގަތެވެ.

އެންޓި-ކޮރަޕްޝަން ކޮމިޝަން މިނިވަންކަމާއެކު ހިންގިޔަ ނުދިނުމަށް މަސައްކަތް ކުރަމުންދާ ސަބަބު ރައްޔިތުންނަށް ސާފުކޮށްދެއްވުމަށް ސަރުކާރަށް ގޮވާލައްވާ ރައީސް ޔާމީން ވަނީ ރައްޔިތުންގެ ވޯޓަކަށް ވަޑައިގެން، މި ސަރުކާރަށް ލިބެނީ ކިހާވަރެއްގެ ތާއީދެއްތޯ ބެއްލެވުމަށް އެދިވަޑައިގެންފައެވެ.

މީގެ އިތުރުން ރައީސް ޔާމީން ވަނީ ސަރުކާރުގެ ނަޒާހަތްތެރިކަމާމެދު ސުވާލު އުފައްދާފައެވެ.

"ނަޒާހަތްތެރިކަމުގެ މިންގަނޑު ހަމަ ސުމެއް. އެއްވެސް ކަމެއް ކުރިއަކު ނުދޭ އަޅުގަނޑުމެންގެ އެއްވެސް މައްސަލައެއް ނެތް ރައްޔިތުންގެ މަޖިލިސް ވެސް ހަމަ ގެންދަވާނެ ގޮތަކަށް ގެންދަވާ ރާއްޖޭގެ ހުރިހާ ޕްރޮގްރާމްތަކެއް ގެންދަވާނެ ގޮތަށް ގެންދަވާ، އަޅުގަނޑަށް އެންމެ ރަނގަޅު ރައީސުލްޖުމްހޫރިއްޔާ މުއިއްޒު ޖަވާބު ދެއްވިޔަސް މަޖިލީހުގެ ރައީސް ޢަބްދުއްރަހީމް ޖަވާބު ދެއްވިޔަސް ހީނާ ޖަވާބު ދެއްވިޔަސް އަދި ކޮންމެ ބޭފުޅަކު ޖަވާބު ދެއްވިޔަސް ދިވެހިންނަށް ތިޔަބޭފުޅުންގެ ނަޒާހަތްތެރިކަން ދައްކާދެއްވަންވީ ނޫންތޯ މިއަކަށް ޖަވާބެއް ނުދެވޭނެ" ޔާމީން ވިދާޅުވިއެވެ.

ރައްޔިތުންނަށް ރެސްޕޮންސިވް ރައްޔިތުންގެ ބާރު އޮންނަ ގޮތަށް ޤާނޫނު އަސާސީ ފަރުމާކޮށްގެން މުޖުތަމަޢެއްގެ ތެރޭގައި ވެރިކަން ހިންގާ ކަމަށްވާނަމަ އެންމެ ކުޑަމިނުން ގާނޫނުތަކުގައި ލިޔެވިފައި ހުރި ކަންތައްތައް ހިނގަންވާނެ ކަމަށް ރައީސް ޔާމީން ވިދާޅުވިއެވެ.

"ހުރިހާ ކޮމިޝަންތަކަށް ޤާނޫނުއަސާސީން އުފަންކުރި ހުރިހާ މުސްތަގިއްލު މުއައްސަސާތައް ބަންދުކުރިއްޔާ މިހާރު މާ ރަނގަޅުވާނެ. މިހާރު އޮންނަންވީ ރައްޔިތުންގެ މަޖިލިސް، ދެން ރައީސުލްޖުމްހޫރިއްޔާ. އެހެންވީމަ މި ސަރުކާރު ގެނައި މީހުން ޕީޕީއެމް ޕީއެންސީގައި ތިއްބެވި ބޭފުޅުން ކިހާވަރަކަށް ހޭ ފަޚުރުވެރިކަމާ އެކީ ރައްޔިތުން ކުރިމަތީ މި ވާހަކަ ދައްކާނީ. ކިހާ ވަރަކަށް ދެއްކިދާނެތޯ ޑިމޮކްރަސީއަކާ ހަމައަށް އައިސް ޤާނޫނުއަސާސީ އިޞްލާޙުކުރަން ސަތާރަ އަށާރަ އަހަރު ނެގި ވާހަކަ މި ދައްކަނީ. ޤާނޫނުއަސާސީ އޮޅާލާފައި އޭގައި ހުރި ހުރިހާ އިސްޠިލާޙުތައް އެއްކޮށްލާފައި މިހާރު ރައީސުޖުމްހޫރިއްޔާ އަތްޕުޅަށް ހުރިހާ ބާރެއް މި ދިނީ. އެކަމަކު އެ ރައީސުލްޖުމްހޫރިއްޔާ ވާން އެބަ ޖެހޭ ނަޒާހަތްތެރި ބޭފުޅަކަށް" ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ދިވެހިރާއްޖޭގެ ރައީސުލްޖުމްހޫރިއްޔާ އަށް ވުރެ މުޅި ރާއްޖެ ބޮޑު ކަމަށާއި، ރައްޔިތުންގެ ޙައްޤުތައް ޤާނޫނުއަސާސީއާއި ޤާނޫނުތަކުގައި އެކުލެވިފައި ހުރި ޙައްޤުތައް މާ ބޮޑު ކަމަށެވެ.