"ކުރިން ސަރުކާރުން މަސައްކަތް ކުރީ މި ސަރުކާރުގެ ބޯހިޔާވަހިކަމުގެ މަޝްރޫޢު އެއް އިއުލާން ވަންދެން ފްލެޓާއި ގޯތި ނުދީ ހިފަހައްޓަން"

ކުރިން ސަރުކާރުން މަސައްކަތް ކުރީ މި ސަރުކާރުގެ ބޯހިޔާވަހިކަމުގެ މަޝްރޫޢު އެއް އިއުލާން ވަންދެން ފްލެޓާއި ގޯތި ނުދީ ހިފަހައްޓަން ކަމަށް މަރަދޫ ދާއިރާގެ މެމްބަރު އަހުމަދު ދީދީ ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން މިހާރު ސަރުކާރުން އާ ލިސްޓަކަށް ފްލެޓް ދޭން ސަރުކާރުން މަސައްކަތް ކުރަމުންދާ ކަމަށް ފާހަގަކުރައްވާ ދީދީ ވަނީ އެކަމަށް ފާޑު ވިދާޅުވެފައެވެ. ސަރުކާރުން އުންމީދު ކުރީ ވަރަށް އަވަހަށް ސަރުކާރަށް ފައިސާ ލިބި މަޝްރޫޢުތައް ފެށުމަށް ކަމަށާއި އެކަމުގެ ޤާބިލްކަން ސަރުކާރުގެ ކިބައިގައި ނެތް ކަމަށް އޭނާ ވިދާޅުވިއެވެ. އިންވެސްޓްމެންޓްތައް ހޯދުމުގެ ޤާބިލްކަން ވެސް މި ސަރުކާރުގެ ކިބައިގައި ނެތް ކަމަށް އޭނާ ވިދާޅުވިއެވެ. ސަރުކާރުން މަސައްކަތް ކުރީ މި ސަރުކާރުގެ ނަން ދެމެހެއްޓޭނެ އާ ހައުސިން މަޝްރޫޢު އެއް އައުމުން ނިމިދިޔަ ސަރުކާރުން ދިން ފްލެޓާއި ގޯތި ދޭން ކަމަށް ވީ ނަމަވެސް މި ސަރުކާރުން އެ މަސައްކަތް ދިގު ދަންމާލި މަޤްސަދު ހާސިލް ނުވާ ކަމަށް އޭނާ ވިދާޅުވިއެވެ. މަޖިލިސް އިންތިޚާބުތެރޭގައި ވެސް ވަރަށް ގިނަ މީހުންނަށް ފްލެޓްދޭން ވައުދުވެފައިވާ ކަަމަށާއި ފްލެޓް ލިސްޓު ބަދަލުކުރަން ސަރުކާރުން ބޭނުންވަނީ އެ ސަބަބާއި ހުރެ ކަމަށް ދީދީ ވިދާޅުވިއެވެ.

ރަސްމާލެ ޕްރޮޖެކްޓްގެ ނަމުގައި ހިންގަން އުޅުނު މަޝްރޫޢުގެ ދަށުން ހިއްކާ ސަރަހައްދު ހިއްކުމަށް އެކަނި ވެސް ބިލިއަނުން ފައިސާ ޚަރަދުވާ ކަމަށް އޭނާ ވިދާޅުވިއެވެ. މާލެ ސަރަހައްދުން ބިން ދޫކުރުމުން ފައިސާ އިތުރަށް ހޭދަވާ ކަމަށް ސަރުކާރުން ބުނާ އިރު، ރައްޔިތުންނަށް ވެފައިވާ އުނދަނގޫތަކުން ސަލާމަތްވުމަށް މަސައްކަތް ނުކުރީ ކީއްވެގެންތޯ ދީދީ ވަނީ ސުވާލުކުރައްވާފައެވެ. މި އަހަރު ހައުސިންގެ ޕްރޮޖެކްޓެއް ފަށަން އުޅޭ ކަަމަށް ސަރުކާރުން އުޅޭ ކަމަށް ބުނާ އިރު އެ ޕްރޮޖެކްޓްގެ އަގުވެސް ސަރުކާރަށް ނޭނގޭ ކަމަށް ދީދީ ވިދާޅުވިއެވެ. އަދި އެއީ ކިތައް ޔުނިޓުގެ ޕްރޮޖެކްޓެއްކަން ވެސް ބުނެ ނުދެވޭ ކަަމަށާއި ސަރުކާރުން އުޅެނީ ރައްޔިތުންނަށް އޮޅުވާލަން ކަމަށް ދީދީ ވިދާޅުވިއެވެ.

ރައީސް އިބްރާހިމް މުޙައްމަދު ސާލިޙްގެ ސަރުކާރުން ދިން ގޯއްޗާއި ފްލެޓް ހަވާލުކުރުން ލަސްވަމުންދާތީ އެކަމުގެ ކަންބޮޑުވުން ފާޅުކޮށް ސިލްސިލާކޮށް ކުރަމުންދާ މުޒާހަރާތަކުގައި ބައިވެރިން ވަނީ އެކި ކަހަލަ ލިޔުންތައް ލިޔެފައިވާ ޕޯސްޓަރުތަކުގައި ޝުއޫރު ފާޅުކޮށްފައެވެ. އެގޮތުން ގިރާވަރު ފަޅާއި ގުޅީ ފަޅު ހިއްކުމަށް ގޮވާލާފައިވާއިރު، ހައްޤުވެރިންނަށް ފްލެޓްތައް އަވަހަށް ހަވާލު ކުރުމަށް ވެސް ދަނީ ގޮވާލަމުންނެވެ. މީގެ އިތުރުން ރައްޔިތުންގެ ވޯޓުގެ ނާޖާއިޒު ފައިދާ ނުނެގުމަށާއި، ރައީސް މުޢިއްޒު ކެމްޕެއިން ތެރޭގައި ދެއްކެވި ވާހަކަތަކަށް އިޚްތިރާމް ކުރެއްވުމަށް ވެސް ގޮވާލާފައިވެ އެވެ.

ރިޔާސީ އިންތިޚާބުގެ ކެމްޕެއިން ތެރޭގައި މިހާރުގެ ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެފައިވަނީ، ގޯހުން ވިޔަސް ފެއިލްވެފައިވާ ސިޔާސަތެއްގެ ދަށުން ވިޔަސް ރައްޔިތަކަށް ދީފައިވާ ފްލެޓަކަށްވެސް ގޯއްޗަކަށް ވެސް އެމަނިކުފާނުގެ ވެރިކަމެއްގައި ހުރަސް ނާޅުއްވާނެ ކަމަށެވެ.

ނަމަވެސް 2024 ޖުލައި 29 ގައި ބޭއްވި ޕެޓިޝަން ކޮމިޓީގައި މިނިސްޓަރު ހައިދަރު ދެއްކެވި ވާހަކަތައް ބައްޓަން ކޮށްފައިވަނީ މުޅިން އެހެން މިސްރާބަކަށެވެ. ހައިދަރު ވިދާޅުވީ ރައީސުލްޖުމްހޫރިއްޔާ "އަހާ" ޕްރޮގްރާމްގައި ފްލެޓާ ބެހޭ ގޮތުން ވިދާޅުވި ގޮތަށް އެއްވެސް ކަހަލަ އޮޅުވާލުމެއް ނެތް ނަމަ، ފްލެޓުތައް ދެއްވާނެ ކަމަށެވެ.

ދައުލަތުން ލިޔުން ދީފައި އޮތް އެއްވެސް މީހެއްގެ އަތުން ފްލެޓް އަތު ނުލައްވާނެ ކަމަށް ރިޔާސީ އިންތިޚާބުގައި ރައީސް މުއިއްޒު ވިދާޅުވި ވިދާޅުމަށް މިނިސްޓަރ ހައިދަރު މާ ބޮޑު ސަމާލުކަން ނުދެއްވައެވެ.