މި ފެންނަމުންދަނީ އެއްވެސް ޤައުމަކާއެކު ރަނގަޅު ގުޅުމެއް ޤާއިމު ނުކުރެވުމުން އަނބުރާ އިންޑިއާގެ އުނގަށް ވެއްޓޭ މަންޒަރު: އަލީ އާޒިމް
އާޒިމް ސިފަ ކުރައްވާ ގޮތުގައި މިއީ ދޮގާއި މަކަރު ހެދުމުގެ އިންތިހާ
މެދުހެންވޭރު ދާއިރާގެ ކުރީގެ މެންބަރު އަލީ އާޒިމް
މި ހިނގަމުންދާ ސަރުކާރުގައި ފެންނަމުންދަނީ އެއްވެސް ޤައުމަކާއެކު ރަނގަޅު ގުޅުމެއް ޤާއިމު ނުކުރެވުމުން އަނބުރާ އިންޑިއާގެ އުނގަށް ވެއްޓޭ މަންޒަރުކަމަށް މެދުހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.
އާޒިމް އެހެން ވިދާޅުވީ ރާއްޖެޓީވީގެ ޓީވީޓޯކްސް ޕޮރޮގްރާމްގައި ވާހަކަ ދައްކަވަމުންނެވެ.
އާޒިމް ވިދާޅުވީ، މިދިޔަ ސަރުކާރުގެ ކަންކަން ހިންގަމުންދިޔައީ އަވައްޓެރި އިންޑިއާއިންކަމަށް ރައްޔިތުންނަށް ޤަބޫލު ކޮށްދިނުމަށް މި ސަރުކާރުގެ ވެރިން މަސައްކަތްތަކެއް ކޮށްފައިވާކަމަށާއި، އެ މަންޒަރު ދިވެހި ރައްޔިތުންނަށްވެސް ފެނިފައިވާ ކަމަށެވެ.
އެހެންނަމަވެސް މިއަދު ފެންނަމުންދަނީ އެއްވެސް ބަޔަކާ ރަނގަޅު ގުޅުމެއް ޤާއިމު ނުކުރެވުމުން އަނބުރާ އިންޑިއާގެ އުނގަށް ވެއްޓޭ މަންޒަރުކަމަށް އާޒިމް ވިދާޅުވިއެވެ.
އާޒިމް ސިފަ ކުރައްވާ ގޮތުގައި މިއީ ދޮގާއި މަކަރު ހެދުމުގެ އިންތިހާއެވެ. މިއީ ވެރިކަމަށް އައުމުގެ ބޭނުމުގައި ގަސްތުގައި ކުރާ ކަންކަން ކަމަށް މިހާރު ސާފުވެގެން ގޮސްފައިވާކަމަށް އާޒިމް ވިދާޅުވިއެވެ.
އާޒިމް ވިދާޅުވީ، މިއަދުގެ ސަރުކާރުގައި ތިބި ފަރާތްތަކުން އިންޑިއާ އައުޓްގެ ނަމުގައި ހިންގި ހަރަކާތުގެ ސަބަބުން އެއީ ތެދެއްކަން ރައްޔިތުންނަށްވެސް ޤަބޫލު ކުރެވޭ ހިސާބަށް ދިޔަ ކަމަށާއި، އެކަމުގެ ސަބަބުން ރައްޔިތުންގެ ހިތުގައިވެސް ޝައްކުތައް އުފެދިގެން ދިޔަ ކަމަށެވެ.
