އެހެން ބަޔަކު އެދިގެން ޝަރީޢަތް އަވަސްކުރުމުން އެކަމާއި މުއިއްޒު ހިތްޕުޅުހަމަޖެހިވަޑައިނުގެންނެވި ކަމަށް ޔާމީން ވިދާޅުވި
ކުރީގެ ރައީސް އަބްދުﷲ ޔާމީން
ކުރީގެ ރައީސް އަބްދުﷲ ޔާމީނަށް ހުކުމް އިއްވުމުގެ އަޑުއެހުން ހަތަރު މަސް ދުވަސްފަހުން ބާއްވާތީ އެކަމާއި އުފާކުރައްވާކަމަށާއި ޔާމީން މިނިވަންވުމުގެ ކްރެޑިޓް މިހާރުގެ ރައީސް ޑރ މުހައްމަދު މުއިއްޒަށް ދެމުންދާދިޔުމަށް ޔާމީން ރައްދު ދެއްވައިފިއެވެ.
11 އަހަރުގެ ޖަލު ހުކުމް ހައިކޯޓުން ބާތިލުކުރުމާއެކު މިނިވަނެއްގެ ގޮތުގައި އެމަނިކުފާނު މިހާރު ހައްދަވާފައިވާ ޕާޓީ ޕީޕަލްސް ނޭޝަނަލް ފްރޮންޓް (ޕީއެންއެފް)ގެ މެމްބަރުންނާ ބައްދަލުކުރައްވާ ވާހަކަދައްކަވަމުން ޔާމީން ވިދާޅުވީ ރައްޔިތުންގެ މަޖިލީހުގެ އިންތިޚާބަށް 48 ގަޑިއިރަށް ވެފައިހުއްޓާ އެމަނިކުފާނު މިނިވަންވުމުން އެކަމާއި ރައީސް މުއިއްޒު ހިތްހަމަޖެހިވަޑައިނުގަންނަވާކަމަށެވެ.
ރައީސް ޑރ މުއިއްޒު ވަނީ ބުދަ ދުވަހުގެ ރޭ ބޭއްވި ޖަލްސާއެއްގައި ރައީސް ޔާމީން މިނިވަންވާނެކަމަށް އުންމީދުކުރައްވާކަމަށް ވިދާޅުވެފައެވެ. އެކަމަށް ރައްދު ދެއްވާ ޔާމީން ވިދާޅުވީ އެމަނިކުފާނު މިނިވަންވާނެކަމަށް އުންމީދުކުރައްވާކަމަށާއި އެކަމާއި އުފާކުރައްވާކަމަށް ވިދާޅުވެ އޭގެފަހުން ވިދާޅުވި ވާހަކައަކީ އެމްޑީޕީގެ ނުފޫޒު ފަނޑިޔާރުގެއަށް ފޯރުވާ ވަހަކަމަށެވެ.
ޔާމީން ވިދާޅުވީ އެމަނިކުފާނުގެ ޝަރީޢަތުގެ މައްސަލަ ކުރިޔަށްދާ ގޮތަށް ބަލާއިރު އިދިކޮޅު އެމްޑީޕީ އާއި އެމަނިކުފާނުގެ ޕާޓީގެ ތެރެއިން އުފެދުނު ސަރުކާރުން ކަންކުރި ގޮތުގައި ތަފާތެއްނެތްކަމަށެވެ. ރިޔާސީ އިންތިޚާބުގެ ތެރޭގައި ރައީސް މުއިއްޒު ދެއްކެވި ވާހަކައަކީ އެމަނިކުފާނު ވެރިކަމާއި ހަވާލުވެވަޑައިގެން ޔާމީން ދޫކޮށްލައްވާނެ ވާހަކަކަމަށެވެ. އެހެންކަމުން ރައީސް އިބްރާހީމް މުހައްމަދު ޞާލިހު، ޔާމީން މިނިވަންނުކުރުމަށް މުއިއްޒު ވިދާޅުވަމުން ގެންދެވިކަމަށެވެ.
މީގެއިތުރުން ވެރިކަމާ ހަވާލުވެވަޑައިގެން އެންމެ ފުރަތަމަވެސް ކުރައްވާނެކަމަކީ ޔާމީން މިނިވަންކުރުމަށްކަމަށް މުއިއްޒު ވިދާޅުވަމުންގެންދެވިއިރު އެކަންކުރުމަށް އަމަލީ ގޮތުން ކުރެއްވިކަމެއް ނެތްކަމަށް ޔާމީން ވިދާޅުވިއެވެ. ޔާމީން ވިދާޅުވީ ކޯޓުގައި އޮންނަ މައްސަލައެއް އަވަސްކޮށްދޭން ބުނުމަކީ ޤާނޫނީ ގޮތުން ކުށެއް ނޫންކަމަށެވެ.
ޔާމީން ވިދާޅުވީ މުއިއްޒު ވެރިކަމަށް ގެނައުމަށް އެމަނިކުފާނާއި އެމަނިކުފާނުގެ އަނބިކަނބަލުންވެސް ގިނަ މަސައްކަތްތަކެއް ކުރެއްވި ކަމަށެވެ. ހުދު އެމަނިކުފާނުގެ އަނބިކަނބަލުން ވަނީ އަމިއްލަފުޅު އެކައުންޓުންވެސް އެކަމަށް ޚަރަދުތަކެއްކޮށްފައިކަމަށާއި ނަމަވެސް މިއަދު އެއިން އެއްވެސް ކަމެއް ކަމަކަށް ނުވާކަމަށެވެ.
ޔާމީން ތަކުރާރުކޮށް ވިދާޅުވީ މިއަދު ޕީޕީއެމް/ޕީއެންސީގެ ލީޑަރޝިޕްގައި ތިއްބެވި ބޭފުޅުން އެމަނިކުފާނު މިނިވަންކުރުމަށް މަސައްކަތްނުކުރާކަމަށާއި އެބޭފުޅުންގެ އިހުލާސްތެރިކަމެއް ނެތްކަމަށެވެ.
