އެމްޑީޕީއަށް މަޖިލީސް ލިބުމުން އެންމެ ފުރަތަމަ ކުރާނެކަމަކީ ޤާނޫނަކުން ވަޒީފާގެ ކަށަވަރުކަން ދިނުން: ރައީސް ޞާލިހު
ވަޒީފާގެ ބިރު ދެއްކުމުގެ ކަންކަން އަލުން އިޔާދަވަމުން އަންނަކަމަށް ރައީސް ޞާލިހު ވިދާޅުވި
ރައީސް އިބްރާހީމް މުހައްމަދު ޞާލިހު
ކުރިޔަށް އޮތް ރައްޔިތުންގެ މަޖިލީހުގެ އިންތިޚާބު އެމްޑީޕީއަށް ކާމިޔާބުކުރަން މުހިންމުވަނީ މިހާރުގެ ސަރުކާރުން ދައްކަމުންދާ ވަޒީފާގެ ބިރު ޤާނޫނުގެ ތެރެއިން ނިމުމަކަށް ގެނައުމަށްކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ޅ. ހިންނަވަރުގައި ކުރިޔަށްދިޔަ ކެމްޕެއިން ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ ޕީޕީއެމް ކިޔަސް، ޕީއެންސީ ކިޔަސް އަދި ޑީއާރުޕީ ކިޔަސް މައިގަނޑުގޮތެއްގައި އެމީހުންގެ ސިޔާސަތަކީ އެކައްޗެއްކަމަށެވެ. އެއީ ބިރު ދެއްކުމާއި އޮޅުވާލުމާއި މުށުތެރޭގައި ރައްޔިތުން ބައިތިއްބައިގެން ކަންކަން ކުރާނެ ސިޔާސަތުކަމަށެވެ.
މިއަދުވެސް ފެންނަނީ އެމަންޒަރުކަމަށާއި އެމްޑީޕީން 2019 ވަނަ އަހަރުގެ މަޖިލީހުގެ ކެމްޕެއިން ކުރީ މިގޮތަށް ނޫންކަމަށް ރައީސް ޞާލިހު ވިދާޅުވިއެވެ. އެގޮތުން ސިޔާސީ ގޮތުން ވިސްނުން ތަފާތުވެެގެން އެއްވެސް މުވައްޒަފަކު އޭރު ވަޒީފާއިން ވަކިކޮށް އެކަމުގެ ބިރު ދައްކާފައިނުވާނެކަމަށް ރައީސް ޞާލިހު ވިދާޅުވިއެވެ. ނަމަވެސް މިއަދު އަނެއްކާވެސް އެމަންޒަރު އިޔާދަވަމުން އަންނަކަމަށް ވިދާޅުވިއެވެ.
ރައީސް ޞާލިހު ވިދާޅުވީ މިކެމްޕެއިން ތެރެއިންވެސް އެފަދަ ކަންކަން ޕޯޑިޔަމްތަކުން ފެންނަމުންދާކަމަށެވެ.
ރައީސް ޞާލިހު ވިދާޅުވީ މިސަރުކާރުން އަންނަނީ އެތައް ދޮގެއްހަދަމުންކަމަށެވެ. އަދި އެމްޑީޕީން ފަށާފައިހުރި ހަވާލުކޮށްފައި ހުރި މަޝްރޫޢުތައް މިސަރުކާރުން ފަށާ ކަންކަމުގެ ގޮތުގައި އަލުން ފަށަމުންދާކަމަށް ވިދާޅުވިއެވެ.
މީގެއިތުރުން އެމަނިކުފާނުގެ ވެރިކަމުގައި މުޅި ރާއްޖޭގައި 36 ބިލިއަން ރުފިޔާގެ މަޝްރޫޢު ހިންގާފައިވާކަމަށާއި އެއީ އޭގެކުރިން އައި އެއްވެސް ސަރުކާރެއްގައި ރާއްޖޭގެ ރަށްރަށުގައި މަޝްރޫޢު ނުހިންގާ މިންވަރެއްކަމަށެވެ.
