މަޖިލީސް ވާވެފައިވާ ތަނަކަށް ހެދީ މަސީހު، އޭނާ ބޭރުކުރާނަން: ގަފޫރު
މަސީހުއަކީ ރާއްޖޭގެ ޑިމޮކްރަސީއަށް އޮތް ނުރައްކަލެއް، ޑިމޮކްރަސީއަށްވެސް މަސީހު ބޭރުކުރަންޖެހޭ
މަސީހުގެ އިތުބާރު ނެތްކަމަށް ހުށައެޅި ވަގުތު ގަފޫރު ރައްޔިތުންގެ މަޖިލީހުގެ ބޭރުގައި މަޑުކޮށްލައިގެން
ދައުލަތުގެ ތިން ބާރުގެ ތެރެއިން، ޤާނޫނު ހަދާ ބާރު އަދި ރައްޔިތުން ތަމްސީލްކުރާ ރައްޔިތުންގެ މަޖިލިހަކީ ވާވެފައިވާ ތަނަކަށް ހެދީ މަޖިލީހުގެ ރައީސް އަބްދުﷲ މަސީހު ކަމަށާއި، ސަރުކާރުން އިތުރު ނުފޫޒެއް ނުފޯރުވައިފިނަމަ ބޮޑު އަގުލަބިއްޔަތަކުން މަސީހު ބޭރުކޮށްލާނެ ކަމަށް ކުޅުދުއްފުށީ އުތުރު ދާއިރާގެ މެމްބަރު އަބްދުއް ގަފޫރު މޫސާ ވިދާޅުވެއްޖެ އެވެ.
މަސީހުގެ އިތުބާރު ނެތްކަމަށް ހުށައެޅި ބައެއް މެމްބަރުން -- ފޮޓޯ: ރާއްޖެ.އެމްވީ
އެމްޑީޕީ، ޕީޕީއެމް، އަދާލަތު ޕާޓީ، އެމްޑީއޭ، ޖުމްހޫރީ ޕާޓީ އަދި އަމިއްލަ ބައެއް މެމްބަރުން ހިމެނޭ ގޮތަށް ރައްޔިތުންގެ މަޖިލީހަށް ހުށައަޅާފައިވާ، މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލައާ ގުޅޭ ގޮތުން ރާއްޖެޓީވީގެ "ފަލަސުރުހީ" ޕްރޮގްރާމްގައި އެމްޑީޕީ ޕާލިމެންޓްރީ ގުރޫޕުގެ މެމްބަރު ގަފޫރު ވިދާޅުވީ، މަސީހު މަޤާމުން ދުރުކުރުމަކީ ކޮންމެހެން ކުރަންޖެހިފައިވާ މުހިންމު ކަމެއް ކަމަށެވެ. މަސީހަކީ ރާއްޖޭގެ ޑިމޮކްރަޓިކް ނިޒާމަށްވެސް އޮތް ބޮޑު ހުރަހެއް ކަމަށް ގަފޫރު ވިދާޅުވި އެވެ. އެހެންކަމުން ޑިމޮކްރަސީ އަލުން އިއާދަކޮށް، ރައްޔިތުންގެ ބާރުވެރިކަން ހޯދުމަށްވެސް މަސީހު ބޭރުކުރަންޖެހިފައިވާ ކަމަށް އޭނާ ވިދާޅުވި އެވެ.
އޭނާ ވިދާޅުވިގޮތުގައި ރައްޔިތުންގެ މަޖިލީހަކީ، ސަރުކާރުން ބޭނުންވާ ކަންތައްތައް ކުރުމަށް އޮތް ރަބަރު ސްޓޭމްޕްއަކަށް ހެދީ މަސީހު އެވެ. އަދި ރައްޔިތުންގެ މަޖިލީހަކީ، ދައުލަތުގެ ބާރުތަކުގެ ތެރެއިން ވާވެފައިވާ ބާރަކަށް ހަދާފައިވާ ކަމަށާއި، އެކަން އެގޮތަށްވުމަށް މަގުފަހިކުރުވީވެސް މަސީހުކަމަށް ގަފޫރު ވިދާޅުވި އެވެ.
"މަސީހު އިތުރަށް އެ ގޮނޑީގައި ބައިންދަންޖެހޭ ސަބަބެއް އަޅުގަނޑުމެންނަކަށް ނުފެނޭ. މުޅި މަޖިލީހުގެ ބާރު ކަނޑުވާ، ސަރުކާރުން ބޭނުންވާހާ ކަމެއް ކޮށްދީ، ރަބަރު ސްޓޭމްޕް ޖަހާތަނެއްގެ ގޮތުގައި މި ދައުލަތުގެ އެއްބާރު ވާވެފައި އޮންނަ މަންޒަރު ދެކެން ދިވެހި ރައްޔިތުން މިއަދު ބޭނުމެއް ނޫން. އެހެންވީމަ އިތުރަށް މަސީހު ގޮނޑީގައި ބައިންދާގެން ލިބޭނެ ފައިދާއޮތްކަމަށް އަޅުގަނޑުމެން ގަބޫލެއް ނުކުރަން." ގަފޫރު ވިދާޅުވި އެވެ.
ޕީޕީއެމް ޕާލިމެންޓްރީ ގުރޫޕުގެ ބައްދަލުވުމެއްގައި މަޖިލީހުގެ ރައީސް އަބްދުﷲ މަސީހު -- ފޮޓޯ: ނިހާން / ޓުވިޓަރ
ގަފޫރު ވިދާޅުވި ގޮތުގައި ސަރުކަރުން އިތުރު ނުފޫޒެއް ނުފޯރުވައިފިނަމަ، މަސީހު ބޭރުކުރާނެ އެވެ. މަސީހު ބޭރުކުރަނީ ޤާނޫނުތަކުގައިވާގޮތަށް ވަރަށް ފުރިހަމަ އަގުލަބިއްޔަތަކުން ކަމަށް ގަފޫރު ވިދާޅުވި އެވެ. ގަފޫރުވެސް ގަބޫލުކުރައްވާގޮތުގައި އިތުބާރު ނެތްކަމުގެ މި މައްސަލައާއެކު، ސަރުކާރުން މެމްބަރުންނަށް ބިރުދެއްކުމަށް މަސައްކަތްކުރާނެ އެވެ. ނަމަވެސް ގަފޫރު ވިދާޅުވީ، އެ ހުރިހާ ހުރަހަކާއެކުގައިވެސް ރައްޔިތުންގެ ހައްޤުތައް ހޯދުމަށް މަސައްކަތްކުރަމުންގެންދާނެ ކަމަށެވެ.
ޤަފޫރު ވިދާޅުވީ، ދިވެހި އެއްވެސް ރައްޔިތަކު މި ސަރުކާރު ބާއްވަން ބޭނުން ނުވާކަމަށެވެ. އަދި އެކަން ކުރިއަސް އޮތް ލޯކަލް ކައުންސިލް އިންތިހާބުގެ ނަތީޖާއިން ހާމަވާނެކަމަށް ގަފޫރު ވިދާޅުވި އެވެ.
