މިސަރުކާރަށް ރައްޔިތުން މަޖިލީހުގެ މެޖޯރިޓީ ލިބިއްޖެނަމަ ކުރިއަށް އޮތީ ބިރުވެރި ނާމާން ދުވަސްތަކެއް
އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު
މިސަރުކާރުން ވަޒީފާގެ ބިރު ވަރަށް ބޮޑަށް ދައްކަމުންދާ ކަމަށާއި، ލ.އިސްދޫން އެކަނިވެސް 100ށް ވުރެ ގިނަ މުވައްޒަފުން ވަޒީފާއިން ވަކިކޮށްފައިވާ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެެވެ.
އާދިއްތަ ދުވަހުގެ ރޭ ތިމަރަފުށީގައި ބޭއްވި އެމްޑީޕީގެ ކެމްޕެއިން މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ މިސަރުކާރަށް ރައްޔިތުން މަޖިލީހުގެ މެޖޯރިޓީ ލިބިއްޖެނަމަ ކުރިއަށް އޮތީ ބިރުވެރި ނާމާން ދުވަސްތަކެއް ކަމަށެވެ. އެއީ މިހާރު ވެސް ރައްޔިތުންނަށް މިސަރުކާރުން ބިރު ދައްކަމުންދާ ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ މަޖިލިސް އިންތިޚާބާއި ގުޅިގެން ވެސް ވަޒީފާ ބިރު ދައްކަމުންދާ ކަމަށާއި، މިސަރުކާރުގެ ކެންޑިޑޭޓުންނަށް ތާއީދުނުކުރާތީ އިސްދޫން އެކަނިވެސް 115 މުވައްޒަފުން ވަޒީފާއިން ވަކިކޮށްފައިވާ ކަމަށެވެ.
މީގެ އިތުރުން ރައީސް ސާލިހު ވިދާޅުވީ މިފަހަރުގެ މަޖިލިސް މެޖޯރިޓީ އެމްޑީޕީއަށް ލިބިއްޖެނަމަ ކުންފުނިތަކުގެ މުވައްޒަފުންނަށް ގާނޫނީ ހިމާޔަތާއި ރައްކާތެރިކަން ލިބޭނެ ގޮތަށް ގާނޫނެއް ބައްޓަންކޮށް ފާސްކުރާނެ ކަމަށެވެ. އަދި ސަރުކާރަށް މުވައްޒަފުންނަށް ބިރު ދެއްކުން ނިމުކަކަށް ގެންނަވާނެ ކަމަށް ރައީސް ސާލިހު ވިދާޅުވިއެވެ. އަދި ވިދާޅުވީ މީގެ ކުރިން ސިވިލް ސަރވިސް މުވައްޒަފުންނަށް ވެސް ގާނޫނުން ރައްކާތެރިކަން ފޯރުކޮށްދިނީ ވަރަށް އުނދަގުލުން ކަމަށާއި، އެ ދުވަސްވަރު ސަރުކާރުން އެކަމާއި ވަރަށް ބޮޑަށް ދެކޮޅު ހެދި ކަމަށެވެ. ނަމަވެސް އެ ގާނޫނު ފާސްކުރެވި، މިއަދު ސިވިލް ސަރވިސް މުވައްޒަފުންނަށް އެކަމުގެ ފައިދާއާއި މަންފާ ލިބޭ ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ ވެރިއަކަށް ހުންނަ މީހަކު ބޭނުންވުމުން މުވައްޒަފުން ގެއަށް ފޮނުވާލެވޭ އުސޫލު ބަދަލުކުރާނެ ކަމަށެވެ. އެމްޑީޕީއަކީ އަބަދުވެސް ރައްޔިތުންގެ ހައްގުގައި މަސައްކަތް ކުރާ ޕާޓީއެއް ކަމަށާއި، ރައްޔިތުންގެ ހައްގުތައް ކަށަވަރުކޮށްދޭނެ ކަމަށް އެމަނިކުފާނު ވިދާޅުވިއެވެ.
