ގައުމުގެ ވެރިޔާއާމެދު ފިޔަވަޅު އަޅަންޖެހޭ ހިސާބަށް ގައުމުގެ ހާލަތު ވަނީ ގޮސްފައި: ރައީސް ސާލިހު

ގައުމުގެ ވެރިޔާއާމެދު ފިޔަވަޅު އަޅަންޖެހޭ ހިސާބަށް ގައުމުގެ ހާލަތު ގޮސްފައިވާ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެެވެ.

އާދިއްތަ ދުވަހުގެ ރޭ ތިމަރަފުށީގައި ބޭއްވި އެމްޑީޕީ ކެމްޕެއިން މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ ދިވެހިރާއްޖޭގެ ގާނޫނު އަސާސީގައި ކަންކަން ކުރަންވީ ގޮތް ވަރަށް ސާފުކޮށްފައިވާ ބަޔާންކޮށްފައިވާ ކަމަށެވެ.

ރައީސް ސާލިހު ވިދާޅުވީ ގާނޫނު އަސާސީގައި ރައްޔިތުން މަޖިލީހުގެ ދައުރު ވަރަށް ސާފުކޮށް ބަޔާންކޮށްފައިވާ ކަމަށެވެ. ސަރުކާރު ޖަވާބުދާރީ ކުރުވުމާއި، ބަޖެޓު ފާސްކުރުމާއި، ގާނޫނުތައް ހެދުމާއި، ވަޒީރުންނާއި ދޭތެރޭގައި ސުވާލުކޮށް މަގާމުން ވަކި ކުރަންޖެހިއްޖެ ހާލަތުގައި އެކަންވެސް މަތިކޮށްފައިވާ ކަމަށާއި، ވެރިއަކަށް ހުންނަ ބޭފުޅަކާއި މެދު ވެސް އެފިޔަވަޅު އަޅަންޖެހޭ ހާލަތުގައި މަޖިލީހުން އެކަން ކުރަންޖެހޭ ކަމަށް ރައީސް ސާލިހު ވިދާޅުވިއެވެ. އަދި ވިދާޅުވީ މިއަދު އެފަދަ ހާލަތެއް ކުރިމަތިވެފައިވާ ކަމަށެވެ.

ރައީސް ސާލިހު ވިދާޅުވީ ސަރުކާރުގައި ތިއްބެވި ބޭފުޅުން ހައްދަވަމުން ގެންދަވާ ދޮގުތަކާއި، އޮޅުވާލުންތައް ބަލަންޖެހޭ ކަމަށެވެ.

ރައީސް ސާލިހު ވިދާޅުވީ ގައުމު ހަމަމަގުން ނެއްޓިފައިވާ ކަމަށާއި، ހަމަމަގަށް އެޅުވުމަށް ރައްޔިތުން މަޖިލީހުގެ މެޖޯރިޓީ އެމްޑީޕީއަށް ލިބެން ޖެހޭ ކަމަށެވެ. އެހެން ނޫން ކަމަށްވާނަމަ މިގައުމު ބިރުވެރި ހާލަތަށް ވެއްޓޭނެ ކަމަށް ރައީސް ސާލިހު ވިދާޅުވިއެވެ.