ރައީސް މުއިއްޒަކީ އަމިއްލަފުޅު ޕާޓީގެ އުސޫލުތަކާއި ހަމަތައް ވެސް ހިފަހައްޓަވާ ބޭފުޅެއް ނޫން: ރައީސް ސާލިހު

ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ އަމިއްލަފުޅު ޕާޓީގެ އުސޫލުތަކާއި ހަމަތައް ވެސް ހިފަހައްޓަވާ ބޭފުޅެއް ނޫން ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެެވެ.

އާދިއްތަ ދުވަހުގެ ރޭ ތިމަރަފުށީގައި ބޭއްވި މިސްރާބު ހަމަމަގަށް ޖަލްސާގައި ރައީސް ޞާލިހު ވިދާޅުވީ މިއީ ދޮގު ހަދާ ސަރުކާރެއް ކަމަށާއި، ވެރިކަމަށް އައީ ވެސް އެގޮތަށް ކަމަށެވެ. އަދި މަސައްކަތް ކުރަނީ ރައްޔިތުންނަށް އޮޅުވާލައި ދޮގު ހެދުމަށް ކަމަށް ރައީސް ޞާލިހު ވިދާޅުވިއެވެ.

ޕީޕީއެމް-ޕީއެންސީގެ އާއްމު މެންބަރުންނަށް އިޝާރާތް ކުރައްވައި ރައީސް ޞާލިހު ވިދާޅުވީ އެމީހުން ވެސް މިހާރު މިސަރުކާރާއި ދެކޮޅަށް މަސައްކަތް ކުރާ ކަމަށާއި، ރައްޔިތުން މަޖިލީހުގެ އިންތިޚާބަށް ސަރުކާރާއި އިދިކޮޅު ޕާޓީގެ ކެންޑިޑޭޓު ހޮވުމަށް އެމީހުން މަސައްކަތް ކުރާ ކަމަށެވެ.

ރައީސް ޞާލިހު ވިދާޅުވީ ވެރިކަން ކުރާ ޕާޓީގެ މެންބަރުން އިދިކޮޅާއި ގުޅެމުންދާ ކަމަށާއި، މިކަމުން މިސަރުކާރުގެ ވަރަށް ގިނަ މައްސަލަތައް ހުރިކަން ހާމަވާ ކަމަށެވެ. މިމައްސަލަތައް ހައްލުކޮށް ގައުމު ހަމަ މަގަށް އެޅުމަށް ރައްޔިތުން މަޖިލީހުގެ މެޖޯރިޓީ އެމްޑީޕީއަށް ލިބެންޖެހޭ ކަމަށް ރައީސް ޞާލިހު ވިދާޅުވިއެވެ.

ރައީސް މުއިއްޒަށް އިޝާރާތް ކުރައްވައި ރައީސް ސާލިހު ވިދާޅުވީ އެމަނިކުފާނަކީ އަމިއްލަފުޅު ޕާޓީގެ އުސޫލުތަކަށް ހަމަތައް ހިފަހައްޓަވާ ބޭފުޅެއް ނޫން ކަމަށެވެ. މަޖިލިސް އިންތިޚާބަށް ވެގެން ޕްރައިމަރީއެއް ބޭއްވި ކަމަށާއި، ނަމަވެސް ޕްރައިމަރީގެ ނަތީޖާ ގަބޫލުނުކުރައްވާ ކަމަށް ރައީސް ޞާލިހު ވިދާޅުވިއެވެ. އަދި ވިދާޅުވީ އަމިއްލަފުޅު ޕާޓީގެ މެންބަރުންނާއި ދެކޮޅަށް ޗެލެންޖު ކުރައްވާ ކަމަށާއި، މިފަދަ ބޭފުޅަކު އެއްވެސް ގާނޫނޫނަކަށް އަމަލުނުކުރައްވާނެ ކަމަށެވެ.

ރައީސް ޞާލިހު ވިދާޅުވީ މިސަރުކާރުން އިގްތިސާދީ ކަންކަން އޮޅުވާލުމަށް ވަރަށް ބޮޑަށް މަސައްކަތް ކުރާ ކަމަށެވެ. މިސަރުކާރުން ހަދާ ދޮގުތަކާއި، ރައްޔިތުން އޮޅުވާލުމަށް ކުރާ މަސައްކަތްތަކަށް ފާރަވެރިވާންޖެހޭ ކަމަށް ރައީސް ޞާލިހު ވިދާޅުވިއެވެ.

އެހެންކަމުން ކުރިއަށް އޮތް ރައްޔިތުން މަޖިލީހަށް މިކަންކަން ދަންނަ ބޭފުޅުން އިންތިޚާބު ކުރަންޖެހޭ ކަމަށާއި، ސަރުކާރު ޖަވާބުދާރީ ކުރުވޭ، ކެރޭ ބަޔަކު ނެރެން ޖެހޭ ކަމަށް ރައީސް ޞާލިހު ވިދާޅުވިއެވެ.