މިސަރުކާރުން ކެންޕެއިނަށް 100 މިލިއަން ރުފިޔާ ހޭދަކޮށްފައިވާ ކަމަށް ދެކެވޭ ވާހަކަތަކަކީ ހަގީގަތެއްނަމަ އެމައްސަލަ ބަލަންޖެހޭ: ރައީސް ސާލިހު
މި ސަރުކާރަށް މެނޭޖްކުރަން ނޭނގޭ
އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވާހަކަފުޅު ދައްކަވަނީ
މިސަރުކާރުން ދައުލަތުގެ ބަޖެޓުން ކެންޕެއިނަށް 100 މިލިއަން ރުފިޔާ ހޭދަކޮށްފައިވާ ކަމަށް ދެކެވޭ ވާހަކަތަކަކީ ހަގީގަތެއްނަމަ އެމައްސަލަ ބަލަންޖެހޭ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެެވެ.
ބުރާސްފަތި ދުވަހުގެ ރޭ އައްޑޫސިޓީގައި ކުރިއަށް ގެންދިޔަ އެމްޑީޕީ މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ މަޝްރޫއުތައް ހުއްޓުވުމަށްފަހު ކެންޕެއިނަށް ސަރުކާރުގެ ވެރިން 100 މިލިއަން ރުފިޔާ ހޭދަކޮށްފައިވާ ކަމަށް ވާހަކަތައް ދެކެވޭ ކަމަށާއި، އެކަމުގެ ހަގީގަތް ބަލަންޖެހޭ ކަމަށެވެ. އެއީ ހަގީގަތަކަށްވާނަމަ އެމައްސަލަ ތަހުގީގު ކުރަންޖެހޭ ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ މިސަރުކާރަށް މެނޭޖްކުރަން ނޭނގޭ ކަމަށެވެ.
އެމަނިކުފާނުގެ ވެރިކަމުގައި މަޝްރޫއުތައް ހިންގި ގޮތަށް އިޝާރާތް ކުރައްވައި ރައީސް ސާލިހު ވިދާޅުވީ ވެރިކަމާއި ހަވާލުވެވަޑައިގެންނެވިއިރު، ރާއްޖޭގެ މާލީ ހާލަތު ރަނގަޅު ނޫން ކަމަށާއި، ސަރުކާރުގެ ފުރަތަމަ ތިން މަސްދުވަހުގެ ތެރޭގައި ބަޖެޓަށް ބޭނުންވާ ފައިސާ ނުލިބުނު ނަމަ ދަތި ހާލަތަކަށްދާނެ ކަމަށެވެ. އަދި ވެރިކަމާއި ހަވާލުވެވަޑައިގެން ފުރަތަމަ ވެސް ކުރެއްވި ކަމަކީ ބޭނުންވާ ފައިސާ ހޯދުން ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ މިއަދު ފެންނަނީ އުކާލާފައިވާ ބައެއް އެގްރިމެންޓްތައް ނަގައިގެން ސޮއިކޮށްލުމަށްފަހު ދޫކޮށްލާ މަންޒަރު ކަމަށެވެ. އެއީ މިމަސައްކަތް ކުރެވޭނެ ގޮތެއް ނޫން ކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ ސަރުކާރުން މަސައްކަތް ކުރަނީ ރައްޔިތުންނަށް އޮޅުވާލަން ކަމަށާއި، އެއީ ކުރިއަށް އޮތް ރައްޔިތުން މަޖިލީހުގެ މެޖޯރިޓީ ހޯދުމަށް ސަރުކާރުން ކުރާ މަސައްކަތެއް ކަމަށެވެ.
