ޕީއެސްޖީގެ ނިންމުމާ މެދު ޑޮންނަރުންމާ ހުރީ ހިތްހަމަ ނުޖެހިފައި

ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގެ ނިންމުމާ މެދު ހިތްހަމަ ނުޖެހިފައި ހުރި ކަމަށް، އެ ޓީމަށް ކުޅެމުން އަންނަ އިޓަލީގެ ގޯލު ކީޕަރު ޖިއާންލުއިޖީ ޑޮންނަރުންމާ ބުނެފި އެވެ.

ޕީއެސްޖީ އިން ވަނީ ކުރިއަށް އޮތް ސީޒަނަށް އެ ޓީމަށް އައު ގޯލު ކީޕަރެއް ގެނެސްފަ އެވެ. އެހެންވެ އެ ކުލަބުގެ އެއް ނަންބަރު ގޯލު ކީޕަރުގެ މަގާމުން ޑޮންނަރުންމާ އަށް ގެއްލޭނެ ކަމަށް ރިޕޯޓު ކޮށްފައިވެ އެވެ. ޕީއެސްޖީ އިން ޔުއެފާ ސުޕަ ކަޕަށް އެކުލަވާލި ސްކޮޑުން ވެސް ޑޮންނަރުންމާ އަށް ފުރުސަތު ދީފައި ނުވެ އެވެ.

ޕީއެސްޖީ އާއެކު ޑޮންނަރުންމާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެއްބަސްވުމުގައި ބާކީ އެއް އަހަރު އޮތް ނަމަވެސް، ޑޮންނަރުންމާ ޕީއެސްޖީ ދޫކޮށްލާނެ ކަމަށް ވެސް ބުނެފައިވެ އެވެ.

އެކަމާ ގުޅިގެން ޑޮންނަރުންމާ ބުނެފައި ވަނީ އެންމެ ފުރަތަމަ އޭނާ ޕީއެސްޖީއާ ގުޅުނު ދުވަހުން ފެށިގެން ވެސް، ޕީއެސްޖީ އަށްޓަކައި ހުރިހާ ކަމެއް ކޮށްފައިވާނެ ކަމަަށެވެ. އަދި ޕީއެސްޖީގެ ގޯލު ބެލެހެއްޓެމުގައި ފަރުވާތެރިކަމާ އެކު މަސައްކަތް ކޮށްފައި ވާނެ ކަމަށް ޑޮންނަރުންމާ ބުންޏެވެ.

ޑޮންނަރުންމާގެ މެސެޖުގައި އޭނާ ބުނެފައި ވަނީ "ކޮންމެ ވެސް މީހަކު" ޕީއެސްޖީގައި އޭނާގެ ބައިވެރިވުން ނުހިމެނޭނެ ކަމަށް ނިންމާފައިވާ ކަމަށެވެ. އަދި ޕީއެސްޖީގެ ޓީމުގައި އޭނާ ބޭނުން ނޫން ކަމަށް ނިންމާފައިވާ ކަމަށާއި، އެކަމާ މެދު އިންތިހާ އަށް ކަންބޮޑުވެ، ނުތަނަވަސްވެފައި ހުރި ކަމަށް ޑޮންނަރުންމާ ބުންޏެވެ.

އިތުރަށް ޑޮންނަރުންމާ ބުނެފައި ވަނީ ޕީއެސްޖީ އަށް ކުޅުމުގެ ފުރުސަތު ލިބުމަކީ އޭނާ އިންތިހާ އަށް އުފާވާ ކަމެއް ކަމަށެވެ. އަދި ޕީއެސްޖީގައި ހޭދަ ކުރެވުނު ކޮންމެ ވަގުތަކާ މެދު ހިތްހަމަ ޖެހޭކަން ފާހަގަކޮށް ޑޮންނަރުންމާ ވަނީ، ޕީއެސްޖީގެ ކުޅުންތެރިންނާއި، އެ ޓީމުގެ ސަޕޯޓަރުންނަށް ވެސް ޝުކުރު އަދާ ކޮށްފަ އެވެ.

އުމުރުން 26 އަހަރުގެ ކުޅުންތެރިޔާ ޕީއެސްޖީ އަށް ބަދަލުވީ 2021 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި ފަސް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

ބައެއް މީޑިއާ ތަކުގައި ބުނެފައިވާ ގޮތުން ޕީއެސްޖީ އިން ޑޮންނަރުންމާގެ އެއްބަސްވުން އައު ކުރަން ބޭނުމެއް ނުވެ އެވެ. އެންމެ ފުރަތަމަ ޕީއެސްޖީ އިން އޭނާގެ އެއްބަސްވުން އައު ކުރަން މަސައްކަތް ކުރި ކަމަށާއި، ނަމަވެސް ޕީއެސްޖީގެ ހުށަހެޅުން ޑޮންނަރުންމާ ޤަބޫލު ނުކުރީ ކަމަށް ވެސް ބުނެފައިވެ އެވެ. އެހެންވެ މިހާރު ޕީއެސްޖީ އިން އެއްބަސްވުން އައު ކުރަން ބޭނުން ނުވާ ކަމަށް ބުނެފައިވެ އެވެ.

ޕީއެސްޖީ ގައި ހޭދަ ކުރި ހަތަރު ސީޒަންގެ ތެރޭގައި ޑޮންނަރުންމާ ވަނީ 161 މެޗުގައި ޕީއެސްޖީގެ ގޯލު ބަލަހައްޓައިފަ އެވެ. އަދި ޕީއެސްޖީ އާއެކު އޭނާ ވަނީ 10 ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ފްރާންސް ލީގު ހަތަރު ފަހަރު ކާމިޔާބު ކުރުމުގެ އިތުރުން، ފްރާންސް ކަޕް ދެ ފަހަރު ކާމިޔާބު ކުރުން، ޓްރޮފީ ޑީ ޗެމްޕިއަންސް ތިން ފަހަރު ކާމިޔާބު ކުރުން އަދި ޔުއެފާ ޗެމްޕިއަންސް ލީގު އެއް ފަހަރު ކާމިޔާބު ކުރުން ހިމެނެ އެވެ.

ޑޮންނަރުންމާ އަކީ އިޓަލީ ޤައުމީ ޓީމުގެ ގޯލު ވެސް ބަލަހައްޓަމުން އަންނަ ކުޅުންތެރިޔާ އެވެ. އޭނާ ވަނީ މިހާތަނަށް ޤައުމީ ޓީމަށް ކުޅެދިން 74 މެޗުގައި އިޓަލީގެ ގޯލު ބަލަހައްޓައިފަ އެވެ. އިޓަލީ އާއެކު އޭނާ ވަނީ 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ.

ޕީއެސްޖީ އިން 2021 ވަނަ އަހަރު ޑޮންނަރުންމާ ހޯދީ ވެސް، ޔޫރޯ ފުޓުބޯޅަ މުބާރާތުގައި އޭނާ ދެއްކި މޮޅު ކުޅުމުގެ ސަބަބުންނެވެ.