ޣިޔާސުއްދީންގައި ހިނގިކަންކަމުން އެނގިގެންދިޔައީ މުއިއްޒަކީ ނާގާބިލުކަމުގެ ވާހަކަ ނުދެއްކޭވަރަށް ނާގާބިލު ވެރިއެއްކަން : ފައްޔާޒު
އެކަން އެނގިވަޑައިނުގަންނަވާކަމަށް ރައީސް މުއިއްޒު ވިދާޅުވާ ވާހަކައަކީ އިތުރުފުޅެއް
އެމްޑީޕީގެ ޗެއަރޕާސަން ފައްޔާޒު އިސްމާއީލު
ޕީޕަލްސް ނޭޝަނަލް ފްރަންޓް (ޕީއެންއެފް) އުފެއްދުމަށް ޣިޔާސުއްދީން ސްކޫލްގައި ބޭއްވުމަށް މަސައްކަތްކުރި ޖަލްސާ ބޭއްވުމަށް ފުލުހުންގެ ފަރާތުން ހުރަސް އެޅިކަން ފަހުން އެނގިވަޑައިގެންނެވިކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވުމަކީ އެމަނިކުފާނުގެ ނާގާބިލުކަމުގެ ވާހަކަ ނުދެއްކޭވަރަށް ނާގާބިލުވުންކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލު ވިދާޅުވެއްޖެއެވެ.
ޕީއެންއެފް އުފެއްދުމުގެ ޖަލްސާ ޣިޔާސުއްދީން ސްކޫލްގައި ބޭއްވުމަށް މަސައްކަތްކުރިނަމަވެސް އެޖަލްސާއަށް ފުލުހުން ހުރަސްއެޅުމުގެ ސަބަބުން ފަހުން އެޖަލްސާ ބާއްވާފައިވަނީ ރާޅުގަނޑު ސަރަހައްދުގައެވެ. އެކަމާއި ގުޅޭގޮތުން ނޫސްވެރިންނާ ބައްދަލުކުރައްވާ ވާހަކަދައްކަވަމުން ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެފައިވަނީ އެސްއޯ ފުލުހުން ފޮނުވައިގެން ޖަލްސާއަށް ހުރަސް އެޅިކަން އެނގިވަޑައިނުގަންނަވާކަމަށާއި އެކަން އެނގިވަޑައިގަތީ ނޫސްތަކުންކަމަށެވެ.
އެކަމަށް ފާޑުވިދާޅުވެ ފުވައްމުލަކުގައި ކުރިޔަށްދިޔަ މިސްރާބު ހަމަ މަގަށް ކެމްޕެއިން ޖަލްސާގައި ވާހަކަ ދައްކަވަމުން ފައްޔާޒު ވިދާޅުވީ އަންގާރަ ދުވަހުގެ މެންދުރާ ހިސާބުން އެޖަލްސާއަށް ސަރުކާރުން ހުރަސްއަޅަމުން ދިޔަކަން ނޭނގޭ މީހަކު ނެތްކަމަށެވެ. އެހެންއޮތް ކަމެއް ހިނގިކަން ނޭނގޭ ކަމަށް ވިދާޅުވާއިރު އެކަން ކޮށްފައިވަނީ ރައީސް މުއިއްޒު އައްޔަނު ކުރައްވާފައިވާ ހޯމް މިނިސްޓަރެއްކަމަށާއި ސިޓީ ފޮނުއްވާފައިވަނީ ރައީސް އައްޔަނުކުރެއްވި އެޑިޔުކޭޝަން މިނިސްޓަރުކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ އެމްޑީޕީ ސަރުކާރުން ފުލުހުންގެ އިދާރާއަކީ ރައްޔިތުންގެ އިތުބާރު އޮތް ޕްރޮފެޝަނަލްތަނަކަށް ހެދުމަށް ކޮށްފައިވާ މަސައްކަތްތައް މިސަރުކާރުން ހަތަރު މަސް ދުވަސްތެރޭ ކުރީގައި އޮތްގޮތަށް ބަދަލުކޮށްފިކަމަށެވެ.
ރައީސް މުއިއްޒު ވިދާޅުވެފައިވަނީ އެކަންކުރި ފުލުހުންނާމެދު ފިޔަވަޅު އަޅުއްވާނެކަމަށެވެ.
