އޭނާގެ އެއްބަސްވުން އައުކުރުމުގެ މަސައްކަތް ދަނީ ކުރިއަށް ކަމަށާއި، އެހެން ނަމަވެސް މިވަގުތަށް ފޯކަސް ހުރީ ބަޔާންގެ މެޗުތަކަށް ކަމަށް އެ ޓީމަށް ކުޅެމުން އަންނަ ޖަރުމަނުގެ ލެރޯއީ ސާނޭ ބުނެފި އެވެ.

މެންޗެސްޓަރ ސިޓީގައި ހުރުމަށްފަހު ސާނޭ ބަޔާނަށް ބަދަލުވީ 2020 ވަނަ އަހަރު އެވެ. ބަޔާނާއެކު ސާނޭ މިހާރު ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް ބަޔާނުން ބޭނުންވަނީ ދިގު މުއްދަތަކަށް އެއްބަސްވުން އައުކޮށް، ސާނޭ ކުލަބުގައި ބެހެއްޓުމަށެވެ. މިވަގުތު ބަޔާނުން އެންމެ އިސްކަމެއް ދެމުން އަންނަނީ ވެސް، ސާނޭގެ އެއްބަސްވުން އައު ކުރުމަށް ކަމަށް އެ ކުލަބުން ވަނީ މީގެ ކުރިން ވެސް ބުނެފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ސާނޭ ބުނީ، އެއްބަސްވުން އައުކުރުމުގެ މަޝްވަރާތައް ކުލަބާއެކު ކުރިއަށް ގެންދާ ކަމަށެވެ. އޭނާގެ މުސްތަޤުބަލު ބިނާ ވެގެން ދާނީ ބައެއް ކަންތައްތަކުގެ މައްޗަށްކަން ފާހަގަކޮށް ސާނޭ ބުނީ، އެކަމާމެދު މާބޮޑަށް ނުވިސްނާ ކަމަށެވެ.

އިތުރަށް އޭނާ ބުނީ އެކަމުގެ މަޝްވަރާތައް ރަސްމީ ސިފައެއްގައި ކުލަބާ ކުރެވެމުންދާ ކަމަށާއި، އުންމީދު ކުރެވޭ ގޮތުގައި އަންނަ ހަފުތާގެ ތެރޭގައި ކޮންމެ ވެސް އަލި މަގެއް ފެންނާނެ ކަމަށެވެ. އެހެން ނަމަވެސް، މިވަގުތު އެންމެ ބޮޑަށް ވިސްނަނީ ޔުއެފާ ޗެމްޕިއަންސް ލީގުގައި ބަޔާނުން ކުޅޭ މެޗާއި، ސީޒަންގައި ބާކީ ހުރި މެޗުތަކަށް ކަމަށް ވެސް އޭނާ ބުންޏެވެ.

ސާނޭ ވަނީ މިހާތަނަށް އެ ކުލަބަށް ކުޅެދިން، 170 މެޗުގައި 47 ލަނޑު ޖަހާފަ އެވެ. ބަޔާނާއެކު އޭނާ ވަނީ ހަތް ތައްޓެއް ކާމިޔާބުކޮށްފަ އެވެ.