އިޒްރޭލުން ޣައްޒާގެ މުހިންމު ބިނާރަށް ދިން ގެއްލުން... އެތައް ސަތޭކަ މިލިއަން ރުފިޔާއަކަށް!

ފަލަސްޠީނުގެ ބިންތަކަށް ފެންބޮވައިގަނެފައި އޮތް ޔަހޫދީ އިޒްރޭލުން، ޣައްޒާގައި ހިންގަމުން ގެންދާ ނިރުބަވެރި ގަތުލުއާންމު ހުއްޓުވަން މުޅި ދުނިޔެ ފެއިލްވެފައި އޮންނަތާ އަހަރު ދެބައިވީއެވެ. އަބުރުވެރި ދިރިއުޅުމެއް އުޅެމުންދިޔަ އާބާދެއް ހަފުސްކޮށް، ސުންނާފަތި ކުރަމުން އެ ދަނީ، ބައިނަލްއަގުވާމީ އެއްވެސް ބާރަކަށް، ނިރުބަވެރި އިޒްރޭލުގެ މައްޗަށް ބާރު ނުހިންގޭނެކަމަށް ގަދަބަސް ބުނަމުންނެވެ.

ވަރލްޑް ބޭންކާއި އދއިން އަންގާރަ ދުވަހު އާންމު ކުރި ރިޕޯޓް ބުނާ ގޮތުގައި، ޣައްޒާގެ މުހިންމު އިންފްރާސްޓްރަކްޗަރަށް ނުވަތަށް ބިނާރަށް ދީފައި ވާ ގެއްލުންތަކުގެ އަގު، ގާތްގަނޑަކަށް 18.5 ބިލިއަން އެމެރިކާ ޑޮލަރު އަރާނެ ކަމަށް ލަފާކުރެވެއެވެ. އެއީ އަދުގެ މާލީ ބާޒާރުގެ މިންގަނޑުން، ދިވެހި ރުފިޔާއާ އަޅާ ބަލާނަމަ ގާތްގަނޑަކަށް ދުއިސައްތަ އަށްޑިހަ ހަ މިލިއަން ދިހަ ހާސް ރުފިޔާއެވެ.

ޔޫރަޕިއަން ޔޫނިއަންގެ މާލީ އެހީތެރިކަމާއެކު ތައްޔާރު ކުރި މި ރިޕޯޓުން ދައްކާ ގޮތުގައި، އިޒްރޭލުން ހިންގަމުންދާ ގަތުލުއާންމުގެ ސަބަބުން ޣައްޒާގެ މުހިންމު ބިނާރަށް ލިބުނު ގެއްލުމުގެ އަގަކީ، 2022 ވަނަ އަހަރު ހުޅަނގު އައްސޭރިއާއި ޣައްޒާގެ ޖުމްލަ އުފެއްދުންތެރިކަމުގެ ނިސްބަތް (ޖީޑީޕީ) ގެ 97 ޕަސެންޓާ އެއްވަރުގެ އަދަދެކެވެ.

އިންޓަރިމް ޑޭމަޖް އެސެސްމަންޓް ރިޕޯޓުގައި، ރިމޯޓް ޑޭޓާ ކަލެކްޝަން ނުވަތަ ތަފާސް ހިސާބު އެއްކުރާ އެކަހެރި މަސްދަރުތައް ބޭނުންކޮށްގެން، އޮކްޓޯބަރު 2023 އާއި ޖެނުއަރީ 2024 އާ ދެމެދު ޣައްޒާގެ މުހިންމު ދާއިރާތަކުގެ ބިނާރަށް ދީފައިވާ (ފިޒިކަލް) ގެއްލުންތައް ވަޒަން ކޮށްފައިވެއެވެ.

ރިޕޯޓުގައި ފާހަގަކޮށްފައިވާ ގޮތުގައި، މުހިންމު ބިނާރުތަކަށް ދީފައިވާ ގެއްލުންތަކުގެ އަސަރު، އިގްތިސާދުގެ ހުރިހާ ދާއިރާއަކަށް ވެސް ކުރެއެވެ. ގެއްލުމުގެ އަންދާސީ އަދަދުގެ 72 ޕަސެންޓް ހިއްސާކުރަނީ ބޯހިޔާވަހިކަމުގެ ދާއިރާއެވެ. ފެނާއި ސިއްހަތާއި ތައުލީމު ފަދަ އާންމު ޚިދުމަތްތަކުގެ ބިނާވެށިން 19 ޕަސެންޓް ހިއްސާކުރާއިރު، ވިޔަފާރި އަދި ސިނާއީ އިމާރާތްތަކަށް ދީފައިވާ ގެއްލުންތައް ހިއްސާ ކުރަނީ 9 ޕަސެންޓްއެވެ.

އެޔެއް މިޔެއް ބެލުމެއް ނެތި އިޒްރޭލުން ދެމުންގެންދާ އުދުވާނީ ހަމަލާތަކުގައި މުޅި ޣައްޒާ އޮތީ ހަފުސްކޮށްފައެވެ. އިމާރާތްތައް ބިމާހަމަކޮށްފައި ވާއިރު، މުޅި ރަށް ފެންނަނީ ގައުކުނޑީގެ ފަރުބަދަތަކެއްގެ ގޮތުގައެވެ. ގައުކުނޑި ކުނިފުނީގެ ބަރުދަން އެކަނިވެސް، 26 މިލިއަން ޓަނަށް އަރާނެ ކަމަށް އަންދާޒާ ކުރެވެއެވެ. އެ ތަންތަނުގެ ދަށުގައިވެސް އެތައް ބައެއްގެ ހަށިގަނޑު ވާނެ ކަމަށް ދާއިރާގެ ތަޖުރިބާކާރުން ބުނެއެވެ. ބިމާ ހަމަކޮށްފައިވާ ބިނާވެށި ސާފުކޮށް ނިންމަވެސް އެތައް އަހަރެއް ހޭދަ ވާނެ ކަމަށް އދއާއި ވަރލްޑް ބޭންކުގެ ރިޕޯޓްގައި ވަނީ ފާހަގަ ކޮށްފައެވެ.

ބިނާރުގެ ވެށިން ހަވާސާވެ، އިންސާނިއްޔަތުގެ ކަމުގެ ދާއިރާއަށްވެސް މި ރިޕޯޓްގައި ވަނީ އަލިއަޅުވާލާފައެވެ. އެގޮތުން، ޣައްޒާގެ އާބާދީގެ 2 ބައިކުޅަ 1 ބައި މީހުން މިހާރު ތިބީ އިންތިހާއަށް ބަނޑަށް ޖެހުމުގެ އަނދަވަޅަށް ވެއްޓުމުގެ ތުންފަތް މަތީގައި ކަމަށާ، މުޅި ޣައްޒާގެ އާބާދީއަށް، ކާބޯތަކެތީގެ ކަށަވަރުކަން ގެއްލިފައިވާ ކަމަށް ރިޕޯޓްގައި ފާހަގަ ކޮށްފައިވެއެވެ. މިލިއަނަކަށް ވުރެ ގިނަ މީހުން، ވަންނާނެ ގެދޮރެއް ނެތިފައި ތިބި އިރު، އާބާދީގެ 75 ޕަސެންޓް މީހުންނަކީ އުފަން ފަސްގަނޑުގައި ރެފިއުޖީންނެވެ.