ޖަަރުމަނުގެ ބަޔާން މިއުނިކްގައި އަނިޔާގެ މައްސަލަ ބޮޑުވެ، ކޯޗު ތޯމަސް ޓުޗެލް އަށް ޕްރެޝަރު ބޮޑުވެއްޖެ އެވެ.
ބަޔާންގެ ބައެއް މުހިންމު ކުޅުންތެރިންނަށް އަނިޔާވެ، މުހިންމު މެޗުތަކެއް ގެއްލިދާނެ ކަމުގެ ބިރު އޮތްކަން ޓުޗެލް ހާމަކުރީ، ޖަރުމަނު ލީގުގައި ބަޔާނުން ހެއިޑެންހައިމާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގަ އެވެ.
އެ މެޗުގެ ކުރިން ވާހަކަ ދައްކަމުން ޓުޗެލް ބުނީ، މެނުއަލް ނޯޔާ، ކިންގްސްލީ ކޯމަން، ލެރޯއީ ސާނޭ، އެލެކްސް ޕަލޮވިޗް އަދި ނުސައިރް މަޒާރީ ފަދަ މުހިންމު ކުޅުންތެރިންނަށް އަނިޔާވެފައިވާ ކަމަށެވެ. އެ އަނިޔާގެ ސަބަބުން ހެއިޑެންހައިމާ ދެކޮޅަށް ކުޅޭ މެޗުގެ ސްކޮޑުން ވެސް އެ ކުޅުންތެރިން ވަނީ ބާކީ ކޮށްފަ އެވެ.
ޓުޗެލް ބުނީ އެ ހުރިހާ ކުޅުންތެރިންގެ ވެސް އަނިޔާގެ މައްސަލަތައް އުޅޭ ކަމަށެވެ. އަދި ޖަރުމަނު ލީގުގައި ވެސް އަދި ޔުއެފާ ޗެމްޕިއަންސް ލީގުގައި މިއީ ބަޔާނަށް މުހިންމު ވަގުތެއްކަން އޭނާ ފާހަގަ ކުރި އެވެ. އެކަން ފާހަގަކޮށް ޓުޗެލް ބުނީ، ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި އާސެނަލާ ދެކޮޅަށް ކުޅޭ މެޗުގައި ވެސް އެ ކުޅުންތެރިންނަށް ނުކުޅެވިދާނެ ކަމުގެ ބިރު އޮތް ކަމަށެވެ. އެހެންކަމުން އެއީ ބަޔާނަށް ކުރިމަތިވާނެ ދައްޗެއް ކަމަށް ވެސް އޭނާ ބުންޏެވެ.
މި ސީޒަންގައި ބަޔާންގެ ނަތީޖާތައް ވެސް ދަށްވެފައިވާތީ ޓުޗެލް އަށް އިންތިހާ އަށް ފާޑު ކިޔުން އަމާޒުވެ އެވެ. އެންމެ ފަހުން ޖަރުމަނު ލީގުގައި ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗުން ވެސް އެ ޓީމު ވަނީ ބަލިވެފަ އެވެ. އެ ބައްޔާއެކު، ބަޔާނަށް ލީގު ދިފާއު ކުރެވޭނެ ކަމުގެ އުންމީދު ފަނޑުވެފައިވާއިރު، ޓުޗެލް ވަނީ ވާދަވެރި ބަޔާ ލެވަކޫސަނަށް މަރުޙަބާ ވެސް ކިޔައިފަ އެވެ.
ޕްރެޝަރު ބޮޑުވެ، ޓުޗެލް ވަނީ މި ސީޒަނަށް ފަހު ބަޔާންގެ ކޯޗުކަމުން ވަކިވާން ވެސް ނިންމައިފަ އެވެ. އެއީ ބަޔާންގެ އިސްވެރިންނާއި، ޓުޗެލްއާ ދެމެދު ކުރިއަށް ގެންދިޔަ މަޝްވަރާތަކަށްފަހު އޭނާ ނިންމި ނިންމުމެކެވެ. ނަމަވެސް ސީޒަންގެ ބާކީ ބައިގައި މަސައްކަތްކޮށް، ބަޔާނަށް ކާމިޔާބު ހޯދުމަށް މަސައްކަތް ކުރާނެ ކަމަށް ޓުޗެލް ވަނީ ބުނެފަ އެވެ.