ވޯލްޑް ސެންޓްރަލް ކިޗަން (ޑަބްލިއުސީކޭ) ގެ އިންސާނީ އެހީގެ ގާފިލާއަކަށް އިސްރާއީލުން ދިން ނުރައްކާތެރި ހަމަލާ ދުނިޔޭގެ ފަލަސުރުޚީތަކަށް އަރަމުން އަންނައިރު، އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގެ ހުޅަނގުގެ މީޑިއާ ކަވަރޭޖާއި، ވަކިން ހާއްސަކޮށް އޭގެ ވިޝުއަލް ސްޕެކްޓް އަނެއްކާވެސް ވަނީ ގިނަބައެއްގެ ސަމާލުކަމަށް އައިސްފައެވެ.

އެވޯޑްތައް ހާސިލްކޮށްފައިވާ ތަޖުރިބާކާރު ފޮޓޯ ޖާނަލިސްޓެއް ކަމަށްވާ ޕެޓްރިކް ވިޓީ ވަނީ ހޯމަ ދުވަހު ދިން ހަމަލާއާ ގުޅޭ ގޮތުން އެމެރިކާގެ މެއިންސްޓްރީމް އައުޓްލެޓްތަކުން ރިޕޯޓް ކުރުމުގައި ބޭނުންކޮށްފައިވާ ފޮޓޯތަކާ މެދު ސުވާލު އުފައްދައި، އެ މީޑިއާތަކުން ޣައްޒާ ހަނގުރާމައިގެ އަސްލު ހަޤީޤީ މަންޒަރު ދުނިޔެއަށް ހާމަކޮށްދިނުމުގައި ފެއިލްވެފައިވާ ކަމަށް ބުނެފައެވެ.

މި ހަމަލާގައި މަރުވި ޑަބްލިއުސީކޭގެ މަސައްކަތްތެރިންގެ ހަށިތައް އެނަޑޯލޫ ފޮޓޯގްރާފަރު އަލީ ޖާދުالله ގެ ފޮޓޯތަކަށް އަލިއަޅުވާލަމުން ވިޓީ ބުނީ އެމެރިކާގެ ބޮޑެތި މީޑިއާތައް ކަމަށްވާ ނިއުޔޯކް ޓައިމްސް އާއި ވޮޝިންޓަން ޕޯސްޓް ފަދަ މީޑިއާތަކުން އެ ފޮޓޯތަކަށް އިހުމާލުވެފައިވާތީ ހައިރާންވާ ކަމަށެވެ.

އޭޕްރީލް މަހުގެ އެއްވަނަ ދުވަހު ދިން ހަމަލާގައި، ޣައްޒާގައި އިންސާނީ އެހީފޯރުކޮށްދިނުމުގައި ހަރަކާތްތެރިވި ހަތް މީހަކު މަރުވެފައިވާއިރު އޭގެ ތެރޭގައި ހިމެނެނީ އިނގިރޭސި ވިލާތުގެ ތިން މީހަކާއި އޮސްޓްރޭލިއާ މީހަކާއި ޕޮލެންޑްގެ މީހަކާއި އެމެރިކާ-ކެނެޑާގެ ދެ ވަނަ ރައްޔިތެއްގެ އިތުރުން ފަލަސްތީނު މީހެކެވެ.

އެހީގެ މަސައްކަތުގައި ހަރަކާތްތެރިވަނިކޮށް މަރުވި މީހުންގެ ފޮޓޯގެ ބަދަލުގައި ޓައިމްސް އިން ބޭނުންކުރީ ގާފިލާގައި ބޭނުންކުރި ހަލާކުވެފައިވާ ވެހިކަލެއްގެ ފޮޓޯއަކާއި، ވޯލްޑް ސެންޓްރަލް ކިޗަން ލޯގޯ ފެންނަ ދެތިންފޮޓޯއެކެވެ.

2004ވަނަ އަހަރުން ފެށިގެން 2010 ވަނަ އަހަރާ ހަމައަށް ނިއުޔޯކް ޓައިމްސް (އެންވައިޓީ)ގައި ޕިކްޗާ އެޑިޓަރުގެ ގޮތުގައި ހުރި ވިޓީ ވަނީ ޑަބްލިއުސީކޭގެ ގާފިލާއަށް ދިން ހަމަލާއާ ގުޅޭ ގޮތުން އެ ނޫހުން ގެނެސްދިން ކަވަރޭޖަކީ "ސްޕައިންލެސް" ކަވަރޭޖެއް ކަމަށް ބުނެ ފާޑުކިޔާފައެވެ.

ވޮޝިންޓަން ޕޯސްޓަށް ބަލާއިރު ވިޓީ ފާހަގަކުރި ގޮތުގައި އެ ޕަބްލިކޭޝަނުގައި ބޭނުންކޮށްފައިވަނީ ހުޅަނގުގެ ދޮން މީހެއްގެ ބަދަލުގައި ހަމައެކަނި ފަލަސްތީނުގެ ވޮލަންޓިއަރުގެ ފޮޓޯއެކެވެ.

އިސްރާއީލުން ޣައްޒާއަށް ދެމުންދާ ނުރައްކާތެރި ހަމަލާތަކާ ގުޅޭ ގޮތުން އޭނާ ބުނީ ހުޅަނގުގެ މީޑިއާތަކުން "ހަނގުރާމައިގެ ސެނިޓައިޒްޑް ވާޝަނެއް ދައްކުވައިދޭ" ފޮޓޯތައް ބޭނުން ކުރަމުން އަންނަ ކަމަށެވެ.

ވިޓީ ބުނީ ނިއުޔޯކް ޓައިމްސްގައި އޭނާ މަސައްކަތްކުރިއިރު ވެސް ވަރަށް ގިނައިން މި މައްސަލަ ދިމާވި ކަމަށާއި ހާއްސަކޮށް 2008 ވަނަ އަހަރު އިސްރާއީލުން ޣައްޒާއާ ދެކޮޅަށް ކުރި ހަނގުރާމައިގައި އެކަމާ ކުރިމަތިލާން ޖެހުނު ކަމަށެވެ.

އަދި އޭރު ކޮންމެ ދުވަހަކު ވެސް ހައިލީ ގްރެފިކް ފޮޓޯގެ ސްޓްރީމެއް އޮންނަ ކަމަށާއި އޭގެ ތެރެއިން ގިނަ ފޮޓޯތަކަކީ ޝާއިއު ކުރުން މަނާ ފޮޓޯތަކެއް ކަމަށް އޭނާ ބުންޏެވެ.

ވީޓީ ކިޔައިދިން ގޮތުގައި ހުޅަނގުގެ ބޮޑެތި މީޑިއާތަކުގައި ގިނައިން ޝާއިޢު ކުރާނީ ދުރުގައި އަނދަމުންދާ ވެހިކަލެއް ނުވަތަ ދުމުގެ އަސަރު ނުވަތަ ހަނގުރާމައިގެ ޖަރީމާތަކުގެ ނަން ނޭނގޭ ޝިކާރައަކަށްވާ މީހުން ބޮޑީ ކޮތަޅުތަކުގައި އޮންނަ ފޮޓޯތައް ކަމަށެވެ.

ކޮންމެއަކަސް ފަލަސްތީނަށް އިސްރާއީލުން ދެމުންދާ ހަމަލާތަކުގައި ކުށެއްނެތް އާއްމުން އިންތިހާއަށް ޝަހީދުވަމުންދާއިރު އަދި ޣައްޒާގެ ރައްޔިތުންނަށް އިސްރާއީލުގެ ނިރުބަވެރި ސިފައިން ލާއިންސާނީ އަނިޔާތައް ދެމުންދާއިރު، އެފަދަ ފޮޓޯތަކާއި، ވީޑިއޯތައް ނިސްބަތުން ފެންނަ ވަރު މަދުކަން އެއީ ގަބޫލުކުރަން ޖެހޭ ހަޤީޤަތެކެވެ. އެހެންކަމުން މިއަދު ދުނިޔޭގެ މީޑިއާ ކޮންޓްރޯލް ކޮށްފައިފައިވާ ހުޅަނގުން މަސައްކަތްކުރަމުންދަނީ ޣައްޒާ ހަނގުރާމައިގެ ހަޤީޤަތް އޮޅުވާލުމަށޭ ދެންނެވުމަކީ ދޮގަކަށް ނުވާނެއެވެ.