ރައީސް ޞާލިހު ވިދާޅުވީ ފައްޔާޒަށް ފުލުހަށް ހާޒިރުވުމަށް ޗިޓް ހަވާލުކޮށްފައިވަނީ އެއްވެސް އަސާސެއް ނެތްކަމެއްގައި ކަމަށް
ކުރީގެ ރައީސް އިބްރާހީމް މުހައްމަދު ޞާލިހު
މިއަދު މިފެންނަނީ މިސަރުކާރުން ސިޔާސީ ލީޑަރުންނާ ދިމާކުރާތަން ކަމަށާއި އެހިސާބުން އަދި ނުނިންމާނެކަމަށް އެމްޑީޕީގެ އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ބުދަ ދުވަހުގެ ރޭ ރާޅުގަނޑު ސަރަހައްދު ސިޑިބަރީގައި ބޭއްވި "ހެންވޭރު ތަރާވީސް" ގައި ވާހަކަފުޅުދައްކަވަމުން ރައީސް ޞާލިހު ވިދާޅުވީ މިއަދު ފެންނަނީ ބާރު ސްޕީޑްގައި ފަހަތަށް ދުވާ ދޯންޏެއްކަމަށެވެ. މިއަދުގެ ސަރުކާރުގައި ހުދުމުހުތާރު ވެރިކަމެއްގެ ހުރިހާ ސިފައެއް ބަރާބަރަށް ހަމަވަމުން އަންނަކަމަށް ރައީސް ޞާލިހު ވިދާޅުވިއެވެ. އެގޮތުން އެންމެ ފުރަތަމަ ވެރިކަމަށް ވަޑައިގެން ނޫސްވެރިންނަށް ހުރަސް އަޅުއްވަމުން ގެންދެވިކަމަށާއި ނަމަވެސް ރާއްޖެއަށް ޑިމޮކްރަސީ ގެނައުމަށް މަސައްކަތްކުރި އެތައް ބަޔެއްގެ ވާހަކަތަކާއެކު އެކަން ކުރެވޭ ގޮތްވެފައިނުވާކަމަށް ރައީސް ޞާލިހު ވިދާޅުވިއެވެ.
ވަޒީފާގެ ބިރު އިންތިހާއަށް ކުރިމަތިކުރުވަމުން އަންނަކަމަށާއި ވަޒީފާ ލިބިފައި ތިބި މީހުންނަށް މަޖުބޫރުކުރުވައިގެން ސަރުކާރާ އެއްކޮޅަށް ކެމްޕެއިންކޮށް ސަރުކާރުގެ ކެމްޕެއިންގައި ބައިވެރިވުމަށް ބާރު އަޅަމުން ގެންދާކަމަށް ވިދާޅުވިއެވެ. އަދި އެންމެފަހުން މިހާރު ފެންނަނީ ސިޔާސީ ލީޑަރުންނާ ދިމާކުރާތަންކަމަށް ރައީސް ޞާލިހު ވިދާޅުވިއެވެ.
އެމްޑީޕީގެ ޗެއަރޕާސަން ފައްޔާޒު އިސްމާއީލު ފުލުހަށް ހާޒިރުވުމަށް ޗިޓް ހަވާލުކޮށްފައިވާ މައްސަލައަށް އަލިއަޅުވާލައްވާ ރައީސް ޞާލިހު ވިދާޅުވީ ފައްޔާޒަށް ފުލުހަށް ހާޒިރުވުމަށް ޗިޓް ހަވާލުކޮށްފައިވަނީ އެއްވެސް އަސާސެއް ނެތްކަމެއްގައި ކަމަށެވެ.
ރައީސް ޞާލިހު އިތުރަށް ވިދާޅުވީ ވާހަކަދައްކައިގެން ކަންކަން ކުރިޔަށްގެންދިޔުމުގެ ވިސްނުމެއް، އެ ރޫހެއް ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ނެތްކަމަށެވެ. ސޮވްރިން ޑިވެލޮޕްމެންޓް ފަންޑު ބިލު ބަލައިގަތުމާ މެދު ރައްޔިތުންގެ މަޖިލީހުގައި ވޯޓުނެގިއިރު ތަޅުމުގައި ސަރުކާރުގެ އެއްވެސް މެމްބަރަކު ނެތި އެބިލު ބޭރުވުމުން އެއީ އެމްޑީޕީއަށް މެޖޯރިޓީ އޮތުމުން ވީކަމެއްކަމަށް ޕީއެންސީން ބުނަމުންދާ ބުނަމަށް ރައްދު ދެއްވާ ރައީސް ޞާލިހު ވިދާޅުވީ ސަރުކާރަށް ނިސްބަތްވާ މެމްބަރުން ނުހޮވަންވީ އެހެންވެގެންކަމަށެވެ.
ހަގީގަތުގައި މަޖިލީހުގައި ސަރުކާރާ އިދިކޮޅަށް ތިބި ބަޔަކީ ސަރުކާރަށް ނިސްބަތްވާ މެމްބަރުންކަމަށް ރައީސް ޞާލިހު ވިދާޅުވިއެވެ.
ރައީސް ޞާލިހު އިތުރަށް ވިދާޅުވީ ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި އެމްޑީޕީ ކެންޑިޑޭޓުން ނުކުމެ ތިބޭނީ ތިލަފަތާއެކުގައި ކަމަށެވެ. އެގޮތުން އެންމެ ދާއިރާއެއް ނޫން އެހެން ހުރިހާ ދާއިރާއެއްގައި އެމްޑީޕީގެ ކެންޑިޑޭޓުން ތިބޭނެކަމަށެވެ. އެހެންކަމުން އެހެން ބަޔަކު އެއީ އެމްޑީޕީ މީހުންކަމަށާއި ފަހުން އެމްޑީޕީއަށް ދާނެކަމަށް ބުނެ ދައްކާ ވާހަކަތަކަށް ނުހެއްލުމަށް ރައީސް ޞާލިހު އެދިވަޑައިގެންނެވިއެވެ.
