އާސަންދައިގައި އިސްރާފުތަކެއް އެބަހުރި
މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑޮކްޓަރ ޢާއިޝަތު ޝިހާމް
ޔޫއޭއީ އަދި ތައިލެންޑުން އާސަންދައިގެ ހިދުމަތް ލިބޭނެ ތާރީހު އަދި ސާފު ނޫން ކަމަށާއި، ދިރާސާ ކުރުމުގެ މަސައްކަތް ކުރަމުން އަންނަ ކަމަށް މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑޮކްޓަރ ޢާއިޝަތު ޝިހާމް ވިދާޅުވެއްޖެއެވެ.
މިނިސްޓަރު ޑޮކްޓަރ ޢާއިޝަތު ޝިހާމް މިފަދައިން ވިދާޅުވީ ރައްޔިތުންގެ މަޖިލީހުގެ އައްޑޫމީދޫ ދާއިރާގެ މެންބަރު ރޮޒައިނާ އާދަމް ކުރެއްވި ސުވާލަށް ޖަވާބު ދެއްވަމުންނެވެ. މެންބަރު ރޮޒައިނާ ކުރެއްވި ސުވާލަކީ، ޔޫއޭއީ އަދި ތައިލެންޑުން އާސަންދައިގެ ހިދުމަތް ހޯދުމަށް ރައީސުލްޖުމްހޫރިއްޔާ ނިންމަވާފައިވާއިރު، އެތަންތަނުން އާސަންދަ ލިބޭނީ ކޮންކޮން ހިދުމަތްތަކަކުންތޯ އަދި އިންޑިއާއިން ލިބެމުންދާ ހިދުމަތްތައް އެއަށްވުރެ އަގުބޮޑުކޮށް ތައިލޭންޑާއި ޔޫއޭއީއަށް ފޮނުވުމަށް ހަމަޖެހިފައިވެތޯއެވެ. މީގެ އިތުރުން މިހާރު އޮތް ބަޖެޓުން އެކަން ހަމަޖައްސަވާނަމަ ހިދުމަތް ދެވޭ މީހުންގެ އަދަދު ކިހާވަރަކަށް މަދުވެގެންދާނެތޯއެވެ.
މިސުވާލުގެ ޖަވާބުގައި މިނިސްޓަރު ވިދާޅުވީ ސަރުކާރުން މަސައްކަތް ކުރަމުން އަންނަނީ ވީހާވެސް އަވަަހަކަށް އެ ހިދުމަތް ފެށުމަށް ކަމަށެވެ. ނަމަވެސް ސީދާ ތާރީހެއް މިނިސްޓަރު ވިދާޅެއް ނުވެއެވެ.
މެންބަރު ރޮޒައިނާގެ ސުވާލުގެ ޖަވާބުގައި މިނިސްޓަރު ދެއްކެވި ވާހަކައާއި ގުޅިގެން މެންބަރުން ކަންބޮޑުވުން ފާޅުކުރެއްވުމުން މިނިސްޓަރު ވިދާޅުވީ ޔޫއޭއީއާއި ތައިލެންޑުުން ބޭސްކުރުމަށް އާސަންދަ ހަމަޖެއްސުމަށްޓަކައި މިހާރުު ކުރަމުން އަންނަނީ ދިރާސާ މަސައްކަތްތައް ކަމަށެވެ.
މިނިސްޓަރު ވިދާޅުވީ އާސަންދަ ފަދަ ބޭސްވަރުވާގެ ކަންކަމާއި ގުޅޭ މަސައްކަތެއް ކުރާ އިރު އެންމެ މުހިއްމީ ދެމެހެއްޓެނިވި ގޮތެއްގައި ކުރިއަށް ގެންދެވޭނެ ގޮތަކަށް ކުރެއްވުން ކަމަށެވެ. އަދި ދިރާސާގެ މަސައްކަތް ކުރަމުން އަންނަ އިރު އެކަން ވީހާވެސް އަވަހެއް ކުރަން މަސައްކަތް ކުރަމުން އަންނަ ކަމަށް ވެސް މިނިސްޓަރު ވިދާޅުވިއެވެ.
އާސަންދަ ނިޒާމް މިހާރު ހުރިގޮތުން ވަރަށް ބޮޑު އިސްރާފުތަކެއް ހުރިކަން މިނިސްޓަރު ވަނީ ފާހަގަކުރައްވާފައެވެ. އެގޮތުން މިދިޔަ އަހަރު މުޅި އާސަންދަ ސްކީމަށް 1 ބިލިއަން ރުފިޔާ ބަޖެޓް ކުރިނަމަވެސް އަހަރު ނިމުނުއިރު 2.3 ބިލިއަން ރުފިޔާ ހަރަދުކޮށްފައިވާކަމަށް މިނިސްޓަރު ވިދާޅުވިއެވެ.
އާސަންދަ ހިދުމަތް ފުޅާކުރައްވާކަން ރައީސް ޑރ. މުހައްމަދު މުއިއްޒު ހާމަކުރެއްވީ ޗައިނާއަށް ކުރެއްވި ދަތުރުފުޅަށް ފަހުއެވެ.
