ފަލަސްތީނުގެ ނޫސްވެރިޔާ ސާހެރް އަކްރަމް ރަޔާން އާއި ދަރިފުޅު ޝަހީދު ކޮށްލައިފި

ފަލަސްތީނުގެ ވަފާ ނިއުސް ޖާނަލިސްޓް ސަހެރް އަކްރަމް ރަޔާން އާއި އޭނާގެ ދަރިފުޅު ޣައްޒާގެ ހުޅަނގުގައި އިޒްރޭލުގެ އޮކިއުޕޭޝަން ފޯސަސް (އައިއޯއެފް) އިން ދިން ވައިގެ ހަމަލާއެއްގައި ޝަހީދުކޮށްލައިފިއެވެ.

ވަފާ ނިއުސް އެޖެންސީން ނެރުނު ބަޔާނެއްގައި ބުނެފައި ވަނީ ހައިދަރު އަބްދުލް ޝާރީ ރައުންޑްއަބައުޓްގައި ޒަހަމްވި އަވަށްޓެރިން ސަލާމަތް ކުރަން އުޅުމުގެ ތެރޭގައި އެ މީހުންގެ ނޫސްވެރިޔާ އާއި އޭނާގެ ދަރިފުޅު އަނަސް ޝަހީދުކޮށްލާފައިވާ ކަމަށެވެ.

އެ އައުޓްލެޓުން ބުނި ގޮތުގައި ރަޔާން އަކީ ވަފާ ނިއުސް އެޖެންސީގެ އަގުހުރި މުވައްޒަފެއް ކަމަށްވާއިރު، އޭނާ އަކީ މެދުނުކުނޑި 20 އަހަރު އެ އެޖެންސީގައި މަސައްކަތް ކޮށްފައިވާ މުވައްޒަފެކެވެ.

މިނިސްޓަރު އަހްމަދު އައްސަފާއި އޮފިޝަލް މީޑިއާގެ ޖެނެރަލް ސުޕަވައިޒަރު އަދި ވަފާގެ ޑިރެކްޓަރުންގެ ބޯޑުގެ ޗެއާމަން ވަނީ ރަޔާންގެ އާއިލާއަށް ތައުޒިޔާ ވިދާޅުވެފައެވެ.

އިސްރާއީލްގެ ހަމަލާތަކުގައި ޣައްޒާގައި ފަލަސްތީނުގެ ރައްޔިތުން ޝަހީދު ކުރަމުންދާ އަދަދު ހަލުވިކަމާއެކު އިތުރުވަމުންދާއިރު، އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް 32،333 މީހުން ޝަހީދުވެ، 74،694 މީހުން ވަނީ ޒަޚަމްވެފައެވެ.

ނަމަވެސް ހަނގުރާމަ ކުރަމުން ދަނީ ހަމައެކަނި ޣައްޒާގެ އާންމުންނާ ދެކޮޅަށް އެކަންޏެއް ނޫނެވެ. ރަޔާން އަކީ ހަނގުރާމަ ފެށުނީއްސުރެ ވަށާލާފައިވާ އެންކްލޭވްގައި މަރުވި 95 ނޫސްވެރިންގެ ތެރޭގައި ހިމެނޭ ނޫސްވެރިއެކެވެ. 

ކޮމެޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) ގެ އަހަރީ ރިޕޯޓުގައި ބުނެފައި ވަނީ 2023 ވަނަ އަހަރު ޝަހީދުވި ނޫސްވެރިންގެ ތެރެއިން 75 އިންސައްތަ ނޫސްވެރިންނަކީ ޣައްޒާއާ ދެކޮޅަށް އައިއޯއެފުން ކުރަމުންދާ ހަނގުރާމައިގެ މައުލޫމާތު ރިޕޯޓްކުރާ ފަލަސްތީނު މީހުން ކަމަށެވެ. އަދި މިކަމުގެ ސަބަބުން 2023 ވަނަ އަހަރަކީ ފާއިތުވި ދިހަވަރަކަށް އަހަރުގެ ތެރޭގައި މީޑިއާތަކަށް ކުރިމަތިވި އެންމެ ނުރައްކާތެރި އަހަރަށް ވެފައިވާކަން އެބޭފުޅުން ފާހަގަކުރެއްވިއެވެ.