ހަމާސް އާއެކު މަޝްވަރާކުރުމަށް ފަލަސްތީނުގެ ބޮޑުވަޒީރު ޣައްޒާ އަށް!
ބޮޑުވަޒީރު ހަމްދުﷲ އަންނަ މަހުގެ 2 ވަނަ ދުވަހު ޣައްޒާ އަށް ވަޑައިގަތުމަށް ވަނީ ހަމަޖެހިފަ
ފަލަސްތީނުގެ ރައީސް މަޙްމޫދު އައްބާސް
ފަލަސްތީނުގެ ޣައްޒާގައި ވެރިކަންކުރާ ހަމާސް ޖަމާއަތާއެކު މަޝްވަރާތައް ބޭއްވުމަށް ތައްޔާރުވަމުންދާ ކަމަށް ފަލަސްތީނުގެ ސަރުކާރުން ބުނެފި އެވެ.
ހަމާސް ޖަމާއަތާއި އެކު ގުޅުން ރަނގަޅު ކުރުމުގެ މަޝްވަރާތަކުގައި ބައިވެރިވުމަށް، ފަލަސްތީނުގެ ބޮޑުވަޒީރު ރާމީ ހަމްދަﷲ އަންނަ އޮކްޓޯބަރު މަހުގެ 2 ވަނަ ދުވަހު ޣައްޒާ އަށް ވަޑައިގަތުމަށް ހަމަޖެހިފައިވާކަން ފަލަސްތީނުގެ ސަރުކާރުން ވަނީ ހޯމަ ދުވަހު އާއްމުކޮށްފައެވެ.
ފަލަސްތީން ސަރުކާރުގެ ތަރުޖަމާނު ޔޫސުފް އަލް މަހްމޫދް އާއްމުކޮށްފައިވާ ބަޔާނުގައި ވަނީ، ފަލަސްތީނުގެ ރައީސް މަޙްމޫދް އައްބާސް އަދި ބޮޑުވަޒީރު ރާމީ ހަމްދަﷲ އާދެމެދު ކުރެވުނު މަޝްވަރާތަކަށް ފަހު، ހަމާސްއާއެކު ކުރާ މަޝްވަރާތައް ކުރިއަށް އޮތް ހަފްތާގެ ތެރޭގައި ޣައްޒާގައި ބޭއްވުމަށް ނިންމާފައިވާ ކަމަށެވެ.
އެގޮތުން ބޮޑުވަޒީރު ހަމްދުﷲ އާއި ސަރުކާރުގެ އޮފިޝަލުން އަންނަ ހޯމަ ދުވަހު ޣައްޒާއަށް ވަޑައިގަތުމަށް ހަމަޖެހިފައިވާ ކަމަށް އެބަޔާނުގައިވެ އެވެ.
ފަލަސްތީނުގެ ސަރުކާރުން ހަމާސް އާއެކު ޣައްޒާގައި މަޝްވަރާތައް ބޭއްވުމަށް ނިންމި ނިންމުމަށް ހަމާސް އިން ވަނީ މަރުޙަބާ ކިޔާފައެވެ. އަދި ދެފަރާތަކުގެ މަޝްވަރާތަކަށް އެހީތެރިކަން ފޯރުކޮށްދިނުމަށް ތައްޔާރަށް އޮތްކަން އދ. އިން ވަނީ ހާމަކޮށްފައެވެ.
ފަލަސްތީނުގެ ފަތަޙަ ޖަމާއަތާއި، ހަމާސް ޖަމާއަތަކީ އެޤައުމުގައި ވަކި ދެސަރުކާރެއް ޤާއިމްކޮށް، ވެރިކަން ކުރަމުންދާ ޒަމާންވީ ދެ ހަތުރުންނެވެ. ފަލަސްތީނުގެ ހުޅަނގު އައްސޭރީގައި ފަތަޙަ ޖަމާޢަތުގެ ސަރުކާރު ޤާއިމްކޮށްފައިވާއިރު، 2007ވަނަ އަހަރުން ފެށިގެން ހަމާސް ޖަމާޢަތުން ދަނީ ޣައްޒާގައި ވަކި ވެރިކަމެއް ކުރަމުންނެވެ.
ފާއިތުވި 10 އަހަރެއްހާ ދުވަހުގެ ތެރޭގައި ފަތަޙަ ޖަމާޢަތާއި ހަމާސް ޖަމާޢަތުން ޞުލްޙަވުމަށް ކުރި މަސައްކަތްތައް ވަނީ ނާކާމިޔާބުވެފައެވެ.
އެހެންނަމަވެސް މިސްރުގެ އޮފިޝަލުންނާއެކު ބޭއްވި މަޝްވަރާތަކަށްފަހު ޣައްޒާގައި އޮތް ހަމާސްގެ ކޮންޓްރޯލް ފަލަސްތީނުގެ ރައީސް މަޙްމޫދް އައްބާސްގެ ސަރުކާރަށް ދޫކޮށްލާނެކަން ހަމާސް އިން ވަނީ މިމަހުގެ ތެރޭގައި ހާމަކޮށްފަ އެވެ. މިދިޔަ ހަފްތާގެ ތެރޭގައި ހަމާސް އިން ވަނީ، ޣައްޒާގައި އޮތް ހަމާސްގެ ސަރުކާރު އުވާލައި، ފަލަސްތީނުގެ ރައީސް މަޙްމޫދް އައްބާސްގެ ފަތަޙަ ޖަމާއަތާއި ދެމެދު އޮތް މައްސަލަތަކަށް ޙައްލު ހޯދުމަށް ތައްޔާރަށް އޮތްކަން ހާމަކޮށްފައެވެ.
