އިޓާލިއަން ލީގުގެ ސެލަނިޓާނާ އަށް ކުޅެމުން އަންނަ މެކްސިކޯގެ ގޯލު ކީޕަރު ގުއިލާމޯ އޮޗޯއާ، މި ސީޒަން ނިމުމުން އެ ކުލަބު ދޫކޮށްލަން ނިންމައިފި އެވެ.
އުމުރުން 38 އަހަރުގެ ގޯލު ކީޕަރު ސެލަނިޓާނާ އަށް ބަދަލުވީ 2022 ވަނަ އަހަރުގެ ފަހު ކޮޅު އެވެ. އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާން އޮތީ މިދިޔަ އަހަރު އެވެ. ނަމަވެސް ސެލަނިޓާނާ އިން ވަނީ އިތުރު އެއް އަހަރަށް އޭނާގެ އެއްބަސްވުން އައު ކޮށްފަ އެވެ. އެހެންކަމުން އެންމެ ފަހުން އެ ކުލަބާއެކު އޮޗޯއާ ސޮއި ކުރި އެއްބަސްވުން ހަމަވާނީ މި ސީޒަންގެ ނިޔަލަށެވެ.
އެއްބަސްވުމުގެ މުއްދަތު ހަމަވުމުން އޮޗޯއާ މިހާރު ވަނީ ސެލަނިޓާނާ ދޫކޮށްލަން ނިންމައިފަ އެވެ. މީޑިއާ ތަކުގައި ރިޕޯޓުކޮށްފައިވާ ގޮތުން އޭނާ އެ ނިންމުން ނިންމީ، ކުލަބާއެކު ކުރިއަށް ގެންދިޔަ މަޝްވަރާތަކަށްފަހު އެވެ. އަދި އެކަމަށް ކުލަބުން ވެސް އެއްބަސްވެފައިވާ ކަމަށް ވަނީ ރިޕޯޓުކޮށްފަ އެވެ. ނަމަވެސް ސެލަނީޓާނާ ދޫކޮށްލުމަށްފަހު އޮޗޮއާ ދެން ބަދަލުވާނެ ވަކި ކުލަބެއް އެނގިފައެއް ނުވެ އެވެ.
އޮޗޯއާ އަންނަނީ 2005 ވަނަ އަހަރުން ފެށިގެން މެކްސިކޯގެ ޤައުމީ ޓީމަށް ކުޅެމުންނެވެ. މިހާތަނަށް އޭނާ ވަނީ 150 މެޗުގައި މެކްސިކޯގެ ގޯލު ބަލަހައްޓައިފަ އެވެ. އޮޗޯއާ ވަނީ މިހާތަނަށް، ފީފާ ވޯލްޑް ކަޕް ފުޓުބޯޅަ މުބާރާތުގެ ފަސް މުބާރާތެއްގައި، މެކްސިކޯ އާއެކު ވާދަކޮށްފަ އެވެ. އޭނާ އަކީ މެކްސިކޯގެ ލެޖެންޑަރީ ގޯލު ކީޕަރެވެ.
