ރާއްޖެއިން ގަތް އަސްކަރީ ޑްރޯނެއްގެ އަގަކީ 2 މިލިއަން ޑޮލަރު، 39 މިލިއަން ޑޮލަރު ޚަރަދުވި ގޮތާ މެދު ސުވާލު އުފެދިއްޖެ
25 މާރިޗު 2024 | ހޯމަ 18:53ކޮރަޕްޝަން ނެތް ކަމަށްވާ ނަމަ ގަތް އަގު އާންމުކޮށްދޭންޖެހޭ
މިސްރާބު ހަމަ މަގަށް ކެމްޕެއިންގެ ތަރުޖަމާން އަދި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ
ކަނޑުގެ ސަރަހައްދު ބެލުމަށް ތުރުކީ ވިލާތުން ރާއްޖެއިން ގަތް އަސްކަރީ ޑްރޯނެއްގެ އަގަކީ 2 މިލިއަން ޑޮލަރު ކަމަށާއި، 39 މިލިއަން ޑޮލަރު ހަރަދުވިގޮތް ހާމަކުރުމަށް އެމްޑީޕީން ގޮވާލައިފިއެވެ.
މިސްރާބު ހަމަ މަގަށް ކެމްޕެއިންގެ ތަރުޖަމާން އަދި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ބޭއްވި ނޫސްވެރިންގެ ބައްދަލުވުމުގައި އޭނާ ވިދާޅުވީ ރާއްޖެއިން 2 ޑްރޯން ގަތުމަށް 39 މިލިއަން ޑޮލަރު ހަރަދުކޮށްފައިވާ ކަމަށާއި، އެއީ ބޮޑު ކޮރަޕްޝަނެއް ކަމަށެވެ. އަދި ރާއްޖެއިން ގަތް ޑްރޯން ކުވެއިތުން ވެސް ގަނެފައިވާއިރު، ކުވެއިތުން ގަތް ޑްރޯންގެ އަގު ހާމަކުރި ކަމަށެވެ.
އެގޮތުން ޑްރޯނެއް ކުވައިތަށް ގަތް އަގަކީ ދެ މިލިއަން ޑޮލަރު ކަމަށާއި، ހަމަ އެއް ބްރޭންޑެއް، އެއް ފީޗާތަކެއްގެ ޑްރޯން، އެއް ކުންފުންޏަކުން، އެއް ގައުމަކުން ގަނެފައިވާ ކަމަށެވެ. އަދި ކުވައިތަށް ދެ މިލިއަން ޑޮލަރަށް ޑްރޯނެއް ގަތް އިރު، ދިވެހިރާއްޖެއަށް 39 މިލިއަން ޑޮލަރަށް ދެ ޑްރޯން ގަނެފައިވާ ކަމަށެވެ.
ޑްރޯންތައް ގެނައިކަން ހާމަކުރި ނަމަވެސް ރާއްޖެ ގެނައި ކިތައް ޑްރޯންކަމެއް ސަރުކާރުން ހާމަކޮށްފައެއް ނުވެއެވެ. އަދި، އަސްކަރީ ޑްރޯންތައް ގެންނަން ދައުލަތުގެ ބަޖެޓުން ކުރި ހޭދަ ވެސް ވަނީ ސިއްރުކޮށްފައެވެ. 39 މިލިއަން ޑޮލަރު ހަރަދުކުރިކަން ހާމަކޮށްފައިވާ އިރު، އެ އަގާއި މެދު އަންނަނީ ސުވާލު އުފައްދަމުންނެވެ. އަދި މިކަމުގައި ކޮރަޕްޝަންގެ އަމަލެއް ހިމެނޭ ކަމަށް އިދިކޮޅު އެމްޑީޕީން ވަނީ ބުނެފައެވެ.
