މޭޖާ ލީގު ސޮކާ (އެމެރިކާ ލީގު)ގައި ނިއު ޔޯކް ރެޑް ބުލްސްއާ ދެކޮޅަށް ކުޅުނު މެޗުން އިންޓަ މިއާމީ ބަލިވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗުން މިއާމީ ބަލިވީ 4-0 އިންނެވެ. މިއީ މި ސީޒަންގެ އެމެރިކާ ލީގުގައި މިއާމީގެ ފުރަތަމަ ބައްޔެވެ.

މެޗުގައި މިއާމީގެ ކެޕްޓަން ލިއޮނަލް މެސީ ކުޅެފައެއް ނުވެ އެވެ. ނަމަވެސް އެ ޓީމުގެ ލުއިސް ސުއަރޭޒް، ސާޖިއޯ ބުސްކެޓްސް އަދި ޖޯޑީ އަލްބާ ވަނީ ކުޅެފަ އެވެ. މެޗުން ބަލިވެ މިއާމީ އަށް ވަނީ އެއް ވަނަ އަށް ޖެހިލަން ލިބުނު ފުރުސަތު ގެއްލިފަ އެވެ.

މެޗުގެ ފުރަތަމަ ހާފުގައި ރެޑް ބުލްސް އިން އެއް ލަނޑު ޖެހިއިރު، އަނެއް ތިން ލަނޑު ޖެހީ ދެ ވަނަ ހާފުގަ އެވެ. މެޗުގައި ރެޑް ބުލްސްގެ ލެވިސް މޯގަން ވަނީ ތިން ލަނޑު ޖަހައި ހެޓްރިކް ހަމަކޮށްފަ އެވެ. އެއީ މެޗުގެ ތިން ވަނަ މިނެޓާއި، 51 ވަނަ މިނެޓު އަދި 70 ވަނަ މިނެޓުގައި އޭނާ ޖެހި ލަނޑުތަކެވެ. މެޗުގައި ރެޑް ބުލްސްގެ ހަތަރު ވަނަ ލަނޑު ޖެހީ ވިކެލްމަން ކާމޮނާ އެވެ.

ބައްޔާއެކު މިއާމީ އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް ކުޅުނު ހަ މެޗުން، 10 ޕޮއިންޓު ހޯދައިގެންނެވެ. މިއާމީ އަށްވުރެ ދެ މެޗު މަދުން ކުޅެގެން، އެއް ވަނައިގައި އޮތް ކޮލޮމްބަސް އަށް ވެސް ލިބެނީ 10 ޕޮއިންޓެވެ. މިއާމީ އަތުން މޮޅުވި ރެޑް ބުލްސް އޮތީ ތިން ވަނައިގަ އެވެ.