"ޣައްޒާގައި މިހާރު "ނޯމަލް ސައިޒުގެ" ކުއްޖަކު އުފަނެއް ނުވޭ"

ނިރުބަވެރި ޔަހޫދީންގެ ވަކިތަކުގެ ޝިކާރައަކަށް ވެފައި އޮތް ފަލަސްޠީނުގެ ޣައްޒާގެ ރަށްވެހިން މިއަދު ތިބި ޙާލަތު ވަޒަންކޮށްލަންވެސް ދައްޗެވެ. ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް، މި ބިންމަތިން ފޮހެލާން ކަމަށް ބުނެ، އިޒްރޭލުން ހިންގަމުން ގެންދާ ޤަތުލުޢާންމާއެކު އުފެދިފައި އޮތް އިންސާނީ އަދި ޞިއްޙީ ކާރިޘާގައި އެންމެ ބޮޑު ތަކުލީފެއް އުފުލަމުން ދާ އެއް ބަޔަކީ ޣައްޒާގައި ތިބި މާބަނޑު މީހުންނެވެ. އެޔެއް މިޔެއް ބެލުމެއް ނެތި، އެއްގަމާއި، ކަނޑާއި، ވައިގެ މަގުން ދެމުންދާ ގެންދާ ޢުދުވާނީ ޙަމަލާތަކުގެ ސަބަބުން އެކަންޏެއް ނޫނެވެ. ދިރިއުޅުން ވެއްޓިފައި އޮތް އަނދަވަޅުގެ ތެރޭގައި، ދަރިއަކު މި ދުނިޔެއަށް އުފަން ކުރުމުގެ އިންތިހާ ބިރެވެ.

އާބާދީއާ ބެހޭ އދގެ ޖަމިއްޔާ (ޔޫއެންއެފްޕީއޭ)ގެ ފަރާތުން ފަލަސްޠީނަށް ކަނޑައަޅާފައި ހުންނަވާ މަންދޫބު، ޑޮމިނީކް އެލެން ވިދާޅުވި ގޮތުގައި، ޣައްޒާގައި މިހާރު އުފަންވާ ތުއްތު ކުދިންގެ ތެރޭގައި، ޢުމުރާ އެކަށީގެންވާ މިންވަރަށް ބޮޑުވެފައި ވާ ކުދިންނެއް ނުފެނެއެވެ. ސަބަބަކީ އިޒްރޭލުން ދެމުންދާ ޙަމަލާތައް ކަމަށްވެސް އެލެން ވަނީ ވިދާޅުވެފައެވެ. އދގެ އޮފިޝަލަކު މިފަދައިން ވިދާޅުވެފައި މި ވަނީ، ޣައްޒާގައި ދުވަސްތަކެއް ހޭދަ ކުރެއްވުމަށްފަހު ޤުދުސްއަށް ވަޑައިގެން، ވީޑިއޯ މެދުވެރިކުރައްވާ، ކުރިއަށް ގެންދެވި ނޫސްވެރިންގެ ބައްދަލުވުމެއްގައެވެ.

މިދިޔަ އޮކްޓޯބަރު މަހުގެ 7 ވަނަ ދުވަހު އިޒްރޭލުން ޤަތުލުއާންމު ހިންގަން ފެށި ޣައްޒާއަކީ ގާތްގަނޑަކަށް 2.3 މިލިއަން މީހުންގެ އާބާދީއެއް އޮތް ރަށެކެވެ. ޤަތުލުއާންމުގައި 5 މަސް ދުވަސް ފާއިތުވެ، 6 ވަނަ މަހަކާ ގާތް ވަމުން ދާ އިރު، ޣައްޒާގެ އާބާދީގެ ގާތްގަނޑަކަށް 1.35 ޕަސެންޓް މީހުންގެ ފުރާނަ ވަނީ ގެއްލިފައެވެ. ބާކީ ތިބި އެންމެންހެން ދެކުނުގެ ރަފަޙަށް ބަދަލުވެފައި ވާ އިރު، ޣައްޒާގައި މިހާރު ތިބި މިލިއަނެއްހާ އަންހެނުންނާއި އަންހެން ކުދިންނާ މެދު ކަންބޮޑުވެވަޑައިގަންނަވާ ކަމަށް އެލެން ވަނީ ވިދާޅުވެފައެވެ. ކޮންމެ ދުވަހަކީވެސް ޣައްޒާގައި 180 ވަރަކަށް މީހުން ވިހާ ދުވަހަކަށް ވާ އިރު، ވަކިން ޚާއްޞަ އެ މީހުންނާ މެދު ކަންބޮޑުވެވަޑައިގަންނަވާ ކަމަށް އެލެން ވިދާޅުވިއެވެ.

ކުޑަކުދިންނާ ބެހޭ އދގެ އިދާރާ (ޔުނިސެފް)އިން ދާދި ފަހުން ޢާންމު ކުރި ރިޕޯޓެއްގައި، މި ހިނގާ މަރޗް މަހު ޣައްޒާގައި ވިހާނެ ކަމަށް ލަފާ ކުރާ 5500 އެއްހާ އަންހެނުންނަށް ލިބޭ ދަރިންގެ ފުރާނައަށް ނުރައްކާވެ، މަރުވުމުގެ ފުރުޞަތު ބޮޑު ވެފައި ވާ ކަމުގެ އިންޒާރު ވަނީ ދީފައެވެ. އެއީ އިޒްރޭލުގެ ޤަތުލުއާންމުގެ ޢުދުވާންތަކުގެ ސަބަބުން އެކަށީގެންވާ ޞިއްޙީ ފަރުވާ ނުލިބުމުގެ ސަބަބުންނެވެ. މާބަނޑު ދުވަސްވަރާއި ވިހައިގެން ދޭންޖެހޭ ފަރުވާތައް ނުލިބުމުގެ ސަބަބުންނެވެ. އޭގެ އިތުރަށް، ސަލާމަތް ހޯދުމުގެ ނިޔަތުގައި އެއްތަނުން އަނެއް ތަނަށް ހިޖުރަ ކުރަން މަޖުބޫރު ވުމާއި، އެކަމުގެ ސަބަބުން ކުރިމަތިލާން ޖެހޭ އިންތިހާ ހާސްކަމާއި ނުތަނަވަސްކަމާ ހެދި ދުވަސް ނުފުރާ ވިހަންޖެހުންވެސް ހިމެނޭ ކަމަށް ޔޫއެންއެފްޕީއޭއިން ވަނީ ފާހަގަ ކޮށްފައެވެ.