"ވާނުވާ" ބަންދުގެ ކަންކަން ހައްލުކުރުމަށް ލީގަލް މަސައްކަތްތައް ދަނީ ކުރަމުން: ރައީސް މުއިއްޒު
14 މާރިޗު 2024 | ބުރާސްފަތި 07:42ވާނުވާ މައްސަލަ ހައްލު ކުރުމަކީ ވީ ވައުދުތަކުގެ ތެރެއިން ހިމެނޭ މުހިންމު ވައުދެއް
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ޝަރީއަތް ނިމެންދެންކުރާ ބަންދު ނުވަތަ "ވާނުވާ" ބަންދުގެ ކަންކަން ހައްލު ކުރުމަށް ލީގަލް މަސައްކަތްތައް ކުރަމުންދާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ޝަރީއަތް ނިމެންދެންކުރާ ބަންދު ނުވަތަ "ވާނުވާ" އަށް ހައްލެއް ހޯއްދަވައިދެއްވުމުގެ ވައުދާއި ގުޅޭގޮތުން އާއްމުގެ މީހެއް ދެންނެވި ސުވާލަށް ރައީސް މުއިއްޒު ވިދާޅުވީ ވާނުވާ މައްސަލަ ހައްލު ކުރުމަކީ ވީ ވައުދުތަކުގެ ތެރެއިން ހިމެނޭ މުހިންމު ވައުދެއް ކަމަށެވެ.
ވާނުވާ މައްސަލަ ހައްލު ކުރުމަށް ކުރަމުންދާ މަސައްކަތުގެ ދަށުން ގާނޫނަށް ގެންނަންޖެހޭ އިސްލާހުތައް ގެނައުމަށް ލީގަލް މަސައްކަތްތައް ކުރަމުންދާ ކަމަށް ރައީސް މުއިއްޒު ވިދާޅުވިއެވެ. އެގޮތުން ކުރިއަށް އޮތްތަނުގައި މިމައްސަލައަށް ރަނގަޅު ދާއިމީ ހައްލެއް ގެނެސްދޭނެ ކަމަށް އެމަނިކުފާނު ވިދާޅުވިއެވެ.
ވާނުވާ މީހުންނާއި ގުޅޭގޮތުން އެންމެފަހުން ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެފައިވަނީ ޝަރީއަތް ނިމެންދެން ގާތްގަނޑަކަށް 300 ވަރަކަށް މީހުން އަބަދުވެސް ބަންދުގައި ތިބޭ ކަމަށާއި، އެއީ 4 ބާވަތެއްގެ ކުށުގެ ތުހުމަތުގައި ހައްޔަރުކޮށްފައި ތިބޭ މީހުން ކަމަށެވެ.
4 ބާވަތުގެ ކުށަށް އިޝާރާތް ކުރައްވައި ޝަމީމް ވިދާޅުވީ އެއީ ކުޑަކުދިންނަށް ޖިންސީ ގޯނާ ކުރާ ކަމަށް ތުހުމަތުކުރެވޭ މީހުންނާއި، ޓެރަރިޒަމްގެ ކުށެއްގެ ތުހުމަތުގައި ތިބޭ މީހުންނާއި، މީހުން މެރުމުގެ ދައުވާކޮށްފައި ތިބި މީހުން އަދި ބޮޑެތި އަދަދުތަކުން މަސްތުވާތަކެތި ވިއްކާ ވިޔަފާރިކުރާ ކަމަށް ތުހުމަތުކުރެވޭ މީހުން ކަމަށެވެ. މިފަދަ މީހުން މުޖުތަމައުއަށް ދޫކޮށްލުމުން ބައެއް ފަހަރު ކުށް ތަކުރާރުވެފައިވާ ކަމަށް ޝަމީމް ވިދާޅުވިއެވެ.
