13 އަހަރުގެ ކުއްޖާ ރަހީނުކޮށް މަރާލި މައްސަލައިގައި ދައުވާ އުފުލި ކުޑަކުއްޖާގެ މައްޗަށް ކުށް ސާބިތުވެއްޖެ
ދެން އޮންނާނީ އޭނާގެ މައްޗަށް އަދަބު ކަނޑައެޅުން
ޖުވެނައިލް ކޯޓް
ހުޅުމާލޭގެ ދެވަނަ ފިޔަވަހީގައި އުމުރުން 13 އަހަރުގެ ކުޑަ ފިރިހެން ކުއްޖަކު ރަހީނުކޮށް މަރާލި މައްސަލައިގައި މަރުގެ ދައުވާ އުފުލާފައިވާ ކުޑަކުއްޖާގެ މައްޗަށް ކުށް ސާބިތުވެއްޖެއެވެ.
އުމުރުން 13 އަހަރުގެ ކުއްޖާގެ މަރާ ގުޅިގެން ދައުވާ އުފުލީ ނ. ލަންދޫ، ބަގީޗާގޭ އިބްރާހީމް ޒިހާންގެ އިތުރުން 17 އަހަރުގެ ފިރިހެން ކުއްޖެއްގެ މައްޗަށެވެ.
ޕީޖީ އޮފީހުން ކުރި ދައުވާގައި ބުނެފައިވަނީ 13 އަހަރުގެ ކުއްޖާ ރަހީނުކުރުމަށްފަހު އޭނާއަށް ޖިސްމާނީ އަނިޔާދީ މަރާލުމަށްފަހު ފޮއްޓެއްގެތެރެއައްލައި ހުޅުމާލެ ފޭސް 2 ގެ އިރު އުތުރު ފަޅުތެރެއަށް އެއްލާލާފައިވާ ކަމަށް މި މައްސަލައިގައި ތުހުމަތުކުރެވޭ ކަމަށެވެ.
އޭގެ ތެެރެެއިން 17 އަހަރުގެ ކުއްޖާގެ މައްޗަށް 3 ދައުވާއެއް އުފުލާފައިވެއެވެ. އެއީ ގަސްތުގައި މީހަކު މެރުމުގެ ކުށުގެ ދައުވާ، ހުއްދަ ނޫން ގޮތުގައި މީހަކު ހިފެހެއްޓުމުގެ ކުށުގެ ދައުވާ އަދި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ ދައުވާއެވެ.
17 އަހަރުގެ ކުއްޖާގެ ބައި ޖުވެނައިލް ކޯޓުގައި ކުރިއަށް ގެންގޮސްފައިވާއިރު، އޭނާގެ މައްޗަށް ކުށް ސާބިތުވާކަމަށް ޖުވެނައިލް ކޯޓުން ވަނީ ނިންމާފައެވެ.
ދެން އޮންނާނީ އޭނާގެ މައްޗަށް އަދަބު ކަނޑައެޅުމެވެ. މިވަގުތު އޭނާ ހުރީ ގޭބަންދުގައެވެ.
ޖުވެނައިލް ކޯޓުގައި މައްސަލަ ބައްލަވައި ޙުކުމް ކުރެއްވީ ޖުވެނައިލް ކޯޓުގެ ޤާޟީ މަރްޔަމް ތާއިފާއެވެ.
ޒިހާންގެ މައްޗަށް 7 ބާވަތެއްގެ 13 ދައުވާއެއް އުފުލާފައިވާއިރު މި ދައުވާތައް ސާބިތު ވެއްޖެނަމަ 100 ވަރަކަށް އަހަރުގެ ޖަލު ހުކުމެއް އަންނާނެ ކަމަށް ޕީޖީ އޮފީހުން ބުނެފައިވެއެވެ.
އޭގެ ތެރޭގައި ޤަސްދުގައި މީހަކުމެރުން، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުމުގެ ކުށުގެ 5 ދަޢުވާ، ޖިނާއީ ކުށެއް ކުރުމުގައި ކުޑަކުއްޖަކު ބޭނުންކުރުމުގެ ކުށުގެ 3 ދަޢުވާ، ހުއްދަނޫން ގޮތުގައި މީހަކު ހިފެހެއްޓުން، މައްޔިތާގެ ބޭނުން ނަހަމަ ގޮތުގައި ކުރުން، ކުޑަކުއްޖަކަށް ޖިންސީ ގޯނާކުރުމަށްޓަކައި އެކުއްޖާ ގްރޫމްކުރުން، ކުޑަކުއްޖަކަށް މަސްތުވާއެއްޗެއް ދީގެން، އެ ކުއްޖާއާއެކު، މީހަކު ޖިންސީ ޢަމަލެއް ހިންގުމުގެ ކުށުގެ ދައުވާ ހިމެނެއެވެ.
އޭނާގެ މައްޗަށް ކުރާ ދައުވާތައް ކްރިމިނަލް ކޯޓުގައި ކުރިއަށް ގެންދަނީ ސިއްރުކޮށްގެންނެވެ. އެ މައްސަލަ މިހާރު އޮތީ ހެކިބަސް ނެގުމުގެ މަރުޙަލާގައެވެ.
ހުޅުމާލެ ދެވަނަ ފިޔަވަހީގައި، މީހުން ވަނުން މަނާކޮށްފައިވާ ސަރަހައްދުގެ މޫދު ތެރޭގައި ދަގަނޑެއްޖަހައި އޭގައި އައްސާފައި އޮތް ފޮއްޓެއްގެ ތެރެއަށް އެ ކުއްޖާގެ ހަށިގަނޑު ލާފައި އޮއްވާ ފުލުހުން އެ ކުއްޖާ ނެގީ 2021 ވަނަ އަހަރުގެ ޖޫން މަހުގެ 21 ވަނަ ދުވަހުއެވެ.
އެނގިފައިވާ ގޮތުގައި ކުއްޖާގެ ހަށިގަނޑު އެތަނުން ނެގީ ކުއްޖާ މަރާލިކަމަށް ތުހުމަތުކުރެވޭ މީހުންގެ ހާޒިރުގައެވެ.
މި މައްސަލައިގެ ދައުވާ އުފުލާފައިވަނީ 2021 ވަނަ އަހަރު އޮގަސްޓު މަހުގެ 19 ވަނަ ދުވަހުއެވެ.
މި މަރާ ބެހޭ ގޮތުން ޕްރޮސެކިއުޓަރ ޖެނެރަލް (ޕީޖީ) ހުސެއިން ޝަމީމް ވިދާޅުވެފައިވަނީ މިމައްސަލައިގައި މިހާރު ލިބިފައިވާ ހެކިތަކުން މައްސަލަ ސާބިތުކުރެވޭނެ ކަމަށެވެ. މިހާދިސާއާ ގުޅިގެން ފުލުހުން ސީސީޓީވީ ފޫޓޭޖުގެ އިތުރުން ގިނަ ކަންތައްތަކެއް ބަލާ ތަހުގީގުކޮށްފައިވާ ކަމަށް ޝަމީމް ވިދާޅުވިއެވެ.
އަދި ތުހުމަތު ކުރެވޭ މީހުން ހައްޔަރުކޮށްފައި ވަނީ އެކަން ކުރުމަށްފަހު ފިލަން ގޮސް މާލޭގެ ގެސްޓް ހައުސްއެއްގައި ތިއްބައެވެ.
