އެއަރޕޯޓް ހިމެނޭ ސަރަހައްދުގެ މަގުތައް މަރާމާތުކޮށް ބެލެހެއްޓުމަށް އާރްޑީސީއާ ހަވާލުކޮށްފި
މި އެއްބަސްވުމުގެ ދަށުން އެއަރޕޯޓްގެ މަގު ހެދުމާއި މަރާމާތުކުރުމާއި ރީސަރފޭސް ކުރުން ހިމެނޭ
އެއްބަސްވުމުގައި ސޮއިކުރެއްވި ރަސްމިއްޔާތުގެ ތެރެއިން
ވެލާނާ އިންޓަރނޭޝަނަލް އެއަރޕޯޓް ހިމެނޭ ސަރަހައްދުގެ މަގުތައް މަރާމާތުކޮށް ބެލެހެއްޓުމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއި ހަވާލުކޮށްފިއެވެ.
އާރްޑީސީއާ މި މަސައްކަތް ހަވާލުކޮށް، އާދިއްތަ ދުވަހު ވަނީ އެއްބަސްވުމުގައި ސޮއިކޮށްފައެވެ. މި އެއްބަސްވުމުގައި އެމްއޭސީލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދެވެ. އަދި އާރްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ރިޓަޔާޑް ބްރިގޭޑިއާ ޖެނެރަލް އަލީ ޒުހެއިރުއެވެ.
އާރްޑީސީން ބުނީ މި އެއްބަސްވުމުގެ ދަށުން އެއަރޕޯޓްގެ މަގު ހެދުމާއި މަރާމާތުކުރުމާއި ރީސަރފޭސް ކުރުން ހިމެނޭ ކަމަށެވެ.
އާރްޑީސީން ބުނީ މަގުތައް ގަވާއިދުން ބެލެހެއްޓުމާއި މަގުގައި ހެދިފައި ހުންނަ ވަޅުގަނޑު ރަނގަޅު ކުރުމާއި އިމާރާތްތަކުގެ ރެނދުލާފައިވާ ތަންތަން ރަނގަޅު ކުރުން ފަދަ ކަންކަމުގެ އިތުރުން، މަގުތަކުގައި ލައިން މާކިންގ ދިނުން ހިމެނޭ ކަމަށެވެ. އަދި މަގުމަތީގެ ސަރަހައްދުތަކާއި ފެން ހިއްކުމުގެ ނިޒާމުތަކާއި އެއާ ގުޅުންހުރި އިންފްރާސްޓްރަކްޗަރ ސާފުކުރުމާއި، އެމްއޭސީއެލް އިން އިރުޝާދާ އެއްގޮތްވާ ގޮތުގެ މަތިން އާންމު ތަންތަނާއި ސައިޑްވޯކްތަކާއި އަދި އެނޫން ވެސް ކަނޑައެޅިފައިވާ ތަންތަން ސާފުކުރާނެ ކަމަށެވެ. އަދި ކަނޑައެޅިފައިވާ ސަރަހައްދުތަކުން ކުނި އަދި އެހެނިހެން ކުނި ނައްތާލުމުގެ މަސައްކަތް ވެސް ކުރާނެ ކަމަށް އާރްޑީސީން ބުނެއެވެ.
ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ ބޮޑު މަޝްރޫއު ކުރިއަށްދާއިރު، އެ ސަރަހައްދުގެ މަގުތައް ޒަމާނީ ފެންވަރަށް ތަރައްގީ ކުރެވޭނެ ކަމަށް އެމްއޭސީއެލުން ބުނެއެވެ.
