ޑޮމެސްޓިކް އެއާޕޯޓުތައް ތަރައްގީކުރަން ބޭނުންވާ ފައިސާ ދިނުމަށް ލިބިފައިވާ ހަތް ޕްރޮޕޯސަލް ބާތިލުކުރަން ނިންމައިފި
ފައިނޭންސް އެގްރިމެންޓްގައި ވަނީ ސޮއިކޮށްފައި
ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް
ކްރޮސް ސަބްސިޑީ މޮޑެލްގެ ދަށުން ޑޮމެސްޓިކް އެއާޕޯޓުތައް ތަރައްގީކުރަން ބޭނުންވާ ފައިސާ ދިނުމަށް ލިބިފައިވާ ހަތް ޕްރޮޕޯސަލް ބާތިލުކުރަން ސަރުކާރުން ނިންމައިފި އެވެ.
މިދިޔަ އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް ވިދާޅުވީ، ކްރޮސް ސަބްސިޑީ މޮޑެލްގެ ދަށުން ޑޮމެސްޓިކް އެއާޕޯޓު ތަރައްގީ ކުރުމަށް ފައިނޭންސް ފޯރުކޮށްދިނުމަށް ހުށަހަޅާފައިވާ ޕްރޮޕޯޒަލްތަކުގެ ތެރެއިން ފައިނޭންސް އެގްރިމެންޓްގައި ސޮއިކޮށްފައިވީ ނަމަވެސް ސަރުކާރަށް ފައިސާ ދަންކަންޖެހޭ މުއްދަތު ހަމަވިއިރު ސަރުކާރަށް ފައިސާ ދައްކާފައިނުވާ 7 ޕްރޮޕޯސަލެއް ބާތިލް ކުރަން ނިންމާފައިވާ ކަމަށެވެ.
7 ޕްރޮޕޯސަލެއް ބާތިލް ކުރަން ނިންމި ނަމަވެސް އެއީ ކޮން ޕްރޮޕޯސަލްތަކެއް ހާމައެއް ނުކުރައްވައެވެ. އެކަމާއި ގުޅޭގޮތުން ސުވާލުކުރުމުން ނާޒިމް ވިދާޅުވީ ކެބިނެޓްގެ ބައްދަލުވުމުގައި އެ 7 ޕްރޮޕޯސަލްއާ ގުޅޭގޮތުން މަޝްވަރާކޮށްފައިނުވާ ކަމަށެވެ. ނަމަވެސް ކަމާބެހޭ މިނިސްޓްރީން އެކަމުގެ އިތުރު ތަފްސީލްތައް ހާމަކުރާނެ ކަމަށެވެ.
ފައިނޭންސް ކުރަން އެއްބަސްވީ ކޮން އެއާޕޯޓުތަކަކަށް ކަމެއް އަދި ސާފެއް ނޫނެވެ. އަދި ހައުސިން މިނިސްޓްރީގެ ފަރާތުން ވަނީ ބަހެއް ވެސް ލިބޭ ގޮތް ނުވެފައެވެ.
