މަތިވެރީ ގައި އެއަރޕޯޓެއް ތަރައްގީ ކުރަނީ
ބިންހިއްކުމާއި އެއާޕޯޓް ތަރައްޤީކުރުމުގެ މަސައްކަތް ދެއަހަރާއި ބައި ތެރޭގައި ނިންމާނެ
އއ. މަތިވެރި
އއ. މަތިވެރީގައި އެއަރޕޯޓެއް ތަރައްގީ ކުރުމަށް ސަރުކާރުން ނިންމާ މަޝްރޫއު ގައި އަންގާރަ ދުވަހުގެ ރޭ ސޮއިކޮށްފިއެވެ.
އެއްބަސްވުމުގައި ސޮއި ކުރުމަށް ފަހު ރައީސް މުހައްމަދު މުއިއްޒު ދެއްކެވި ވާހަކަފުޅުގައި މަތިވެރީގައި ތަރައްޤީކުރާ އެއާޕޯޓް ވެގެން ދާނީ މުޅި ރާއްޖޭގެ ފަތުރުވެރިކަމުގެ ދާއިރާ އަށް ފައިދާ ކުރާނެ އެއާޕޯޓަކަށް ކަމަށެވެ.
އަރިއަތޮޅު އުތުރުބުރީގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، މަތިވެރީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ވިދާޅުވީ، އެއަރޕޯޓް ތަރައްގީ ކުރުމުގެ މަޝްރޫއުގެ ދަށުން ރަށާއި ގުޅިގެން ރަށުގެ އެކި ކަންކަމަށް ބޭނުންވާ 26.5 ހެކްޓަރުގެ ބިންހިއްކުމާއި އެކު އެއާޕޯޓް ތަރައްޤީ ކުރުމަށް ހަމަޖަހިފައިވާ ކަމަށެވެ.
އަންގާރަ ދުވަހުގެ ރޭ އޮތް މި ބައްދަލުވުމުގައި މަތިވެރީ ބިން ހިއްކުމާއި އެއާޕޯޓް ތަރައްޤީކޮށް އޮޕަރޭޓް ކުރުމަށް ހަވާލުކުރީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލް އާއެވެ.
މި މަޝްރޫއަށް އިޝާރާތް ކުރައްވަމުން ރައީސް ވިދާޅުވީ މި އެއާޕޯޓް ވެގެންދާނީ ފުރިހަމަ އަށް ދެކޮޅުޖެހޭ ސަތޭކަ ޕަސެންޓް ފީސަބަލް އެއާޕޯޓަކަށް ކަމަށެވެ. ބިންހިއްކުމާއި އެއާޕޯޓް ތަރައްޤީކުރުމަށް ބޭނުންވާ އިންފްރާސްޓްރަކްޗަރ ގެ ހުރިހާ މަސައްކަތާއި އެކު މުޅި ޕްރޮޖެކްޓް ދެއަހަރާއި ބައި ތެރޭގައި ނިންމާ އެއާޕޯޓް ހުޅުވާނެ ކަމުގެ ޔަޤީންކަން ރައީސް މުއިއްޒު މަތިވެރީ ރައްޔިތުންނަށް ދެއްވި އެވެ.
ރަށުގެ އެހެން މަޝްރޫއު ތަކާ ބެހޭ ގޮތުން ވާހަކަފުޅު ދައްކަވަމުން ސްކޫލްގެ މަޝްރޫޢު ދިރާސީ އައު އަހަރަށް ނިންމާ ބޭނުން ކުރެވޭނެ ކަމުގެ ޔަޤީންކަން ދެއްވާ ކަމަށާއި، ޞިއްހީ މަރުކަޒުގެ މަސައްކަތުގެ ބޮޑުބައެއް ނިމިފައިވީ ނަމަވެސް މަސައްކަތް ހަވާކުރި ފަރާތުން އެއްކޮށް މަސައްކަތް ނިންމުމުގައި ލަސްވަމުން ދާތީ އެމަސައްކަތް އެހެން ބަޔަކާއި ޙަވާލު ކޮށްގެން މަސައްކަތް ނިންމާނެ ކަމުގެ ޔަޤީންކަން ދެއްވިއެވެ. މީގެ އިތުރުން ޞިއްހީ މަރުކަޒުގެ ޖާގަ އިތުރު ކޮށްގެން މިހާރު ޚިދުމަތްދެވޭ ފެންވަރަށް ވުރެ އިތުރަށް އަޕްގްރޭޑް ކޮށްގެން، އިތުރު ޚިދުމަތް ދެވޭގޮތަށް ތަރައްޤީ ކުރުމަށް ނިންމަވާފައިވާ ކަމަށް ވެސް މުއިއްޒު ވިދާޅުވިއެވެ.
އަންނަ އަހަރުގެ ބަޖެޓްގައި ހިމަނައިގެން ރައްޔިތުން ބޭނުންވާ ގޮތަށް ރަށުގެ މައި މަގު ހެދުމުގެ މަޝްރޫޢުގެ ޢަމަލީ މަސައްކަތް އަންނަ އަހަރު ފައްޓަވާނޭ ކަމަށާއި، ހޭންޑް ބޯލް ކޯޓެއް މިއަހަރު މަތިވެރީގައި ހެދުމަށް ތާވަލުކުރެވިފައިވާކަމަށް ވިދާޅުވިއެވެ.
މި ރަސްމިއްޔާތުގައި މަތިވެރީ ޓޫރިޒަމް ޒޯނުން ދޫކޮށްފައިވާ ބިން މަތިވެރި ކައުންސިލާ ވަނީ ހަވާކޮށްދެއްވާފައެވެ.
ރައީސުލްޖުމްހޫރިއްޔާ ވަނީ މަތިވެރީ އިޚްތިސާސްގެ ތެރޭގައި ހިމަނާފައިވާ ފިނޮޅުގައި ސިޓީ ހޮޓަލެއް ކައުންސިލުން އިއުލާން ކޮށްގެން ކުރިއަށް ގެންދިއުމުގައި އެއްވެސް ހުރަހެއް ނެތް ކަމަށްވެސް ވިދާޅުވެފައެވެ.
