ބްރެޒިލްގެ ޚާރިޖީ ވަޒީރު މައުރޯ ވިއެރާ، ފަލަސްތީނުގެ ރައީސް މަހްމޫދު އައްބާސާ ބައްދަލު ކުރައްވައިފިއެވެ.
ރާމަﷲގައި ކުރިއަށް ދިޔަ މި ބައްދަލުވުމުގައި ފަލަސްޠީނުގެ ބިންތަކުގެ ސިޔާސީ މަސްރަހަށް އައިސްފައިވާ އެންމެ ފަހުގެ ބަދަލުތަކާއި، ޣައްޒާގެ އިތުރުން ހުޅަނގު އައްސޭރިއާއި ގުދުސް ސިޓީގައި ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ޙަމަލާތަކާއި، ފަލަސްޠީނާ ދެކޮޅަށް ހިންގަމުންދާ އެހެނިހެން ޖަރީމާތައް ވަގުތުން ހުއްޓުވުމަށް ކުރަމުންދާ މަސައްކަތްތަކުގެ މަޢުލޫމާތު ރައީސް ޢައްބާސް ވަނީ މިނިސްޓަރާ ޙިއްޞާކުރައްވާފައެވެ.
ރައީސް އައްބާސް ވަނީ ޣައްޒާއަށް އިންސާނީ އެހީއާއި ރިލީފް އަދި ބޭސްފަރުވާގެ އެހީ އެތެރެވުން އަވަސްކޮށް، އެ އެހީ އިތުރުކުރުމުގެ މުހިންމުކަމުގެ މައްޗަށް އަލިއަޅުއްވާލައްވައި، ރައްޔިތުންނަށް ދިމާވެފައިވާ ދަތިތަކަށް ލުޔެއް ހޯދައިދިނުމަށް ޓަކައި ބޭނުންވާ ކަންކަން ފޯރުކޮށްދިނުމުގައި ހިޔާ މަރުކަޒުތަކާއި ހޮސްޕިޓަލްތަކުން އަދާކުރަންޖެހޭ ދައުރު އަދާކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ.
ފަލަސްތީނުގެ 1.5 މިލިއަނަށްވުރެ ގިނަ މީހުން ގެދޮރު ގެއްލިފައިވާ ރަފަޙް ސިޓީއަށް އިސްރާއީލުގެ އަސްކަރިއްޔާގެ ސިފައިން އަރައިގަތުން ހުއްޓުވުމަށާއި، އިޒްރޭލުން މިފަދަ ހަމަލާއެއް ދިނުން ހުއްޓުވުމަށް ބައިނަލްއަގްވާމީ ގޮތުން އިތުރު މަސައްކަތްތަކެއް ކުރުމަށާއި، އިސްރާއީލުގެ ހަމަލާތައް ވަގުތުން ހުއްޓާލުމަށް އިޒްރޭލަށް މަޖުބޫރު ކުރުވުމަށް ރައީސް ޢައްބާސް ގޮވާލެއްވިއެވެ. އަދި ޣައްޒާއަށް ވަންނަ ހުރިހާ ކްރޮސިންގއެއް ހުޅުވައި، ރިލީފް އެހީ ގެނައުމަށާއި، އަލުން އާރާސްތުކުރުމުގެ މަސައްކަތް ފެށުމަށްވެސް ޢޭނާ ގޮވާލެއްވިއެވެ.
ފަލަސްޠީނާއި ބްރެޒިލްއާ ދެޤައުމުގެ ދެމެދުގައި ވާ ގާތް ގުޅުމަށް ފަޚުރުވެރިވެވަޑައިގަންނަވާކަން ފާހަގަކުރައްވައި، ބައިނަލްއަޤްވާމީ ފޯރަމްތަކުގައި ފަލަސްޠީނުގެ ރައްޔިތުންނަށް އެހީތެރިކަން ފޯރުކޮށްދިނުމުގައި ބްރެޒިލާއި ރައީސް ލޫލާ ޑަ ސިލްވާ ގެންގުޅުއްވާ ސިޔާސަތުތަކަށް ތަޢުރީފު ކުރައްވައި، ޚާއްޞަކޮށް ޣައްޒާގައި ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ޙަމަލާތައް ހުއްޓުވުމުގެ މުހިންމުކަމާ ބެހޭގޮތުން ދާދިފަހުން ދެއްކެވި ވާހަކަފުޅުތަކަށް ތަޢުރީފް ކުރެއްވިއެވެ.
ބުރެޒިލްއަކީ އިސްރާއީލާ ދެކޮޅަށް ފާޅުގައި ވަކާލާތުކުރާ މަދު ގައުމުގެތަކުގެ ތެރޭގައި ހިމެނޭ ގައުމެކެވެ.
