ބްރެޒިލްގެ ކުރީގެ ރައީސް ޖައިރު ބޮލްސޮނާރޯ، އޭނާގެ ފައިގައި ފުލުހުން ހަރުކޮށްފައިވާ މޮނިޓަރަށް ގެއްލުންދީފައިވާތީ، ބަންދުން ފިލައިފާނެ މީހެއް ކަމަށް އެ ގައުމުގެ ސުޕްރީމް ކޯޓުން ކަނޑައަޅައި، ފުލުހުންގެ ބެލުމުގެ ދަށުގައި އޭނާ ބަހައްޓާ ގޮތައް ހަދަން އަންގައިފި އެވެ.

ހޮނިހިރު ދުވަހު ކޯޓުން ބުނީ، ބަޣާވާތް ކުރުމަށް ކުރި މަސައްކަތެއް ނާކާމިޔާބުވުމާ ގުޅިގެން އިއްވާފައިވާ ހުކުމުގެ އިސްތިއުނާފު މަރުހަލާ ގައި ގޭބަންދުގައި ހުރި ކުރީގެ ރައީސް، ފިލުމުގެ މަޤްސަދުގައި އޭނާގެ ފައިގައި ހަރުކޮށްފައިވާ މޮނިޓަރު މަސައްކަތް ނުކުރާ ގޮތް ހަދަން މަސައްކަތްކޮށްފައިވާ ކަމަށެވެ.

ކޯޓުން އާންމުކުރި ވީޑިއޯއެއްގައި، ބޮލްސޮނާރޯ ވަނީ "ވާ ގޮތް ބަލާލުމަށް" އެ މޮނިޓަރުގެ ބްރޭސްލެޓަށް ވެލްޑިންގ ރޮޑެއް ބޭނުންކޮށްގެން ބަދަލު ގެންނަން މަސައްކަތް ކުރިކަމަށް އެއްބަސްވެފަ އެވެ.

އެ ވީޑިއޯ އިން ދައްކާ ގޮތުގައި، ކުރީގެ ރައީސް ގެ ފައިގައި ހަރުކޮށްފައިވާ ޓެގް ވަނީ އަނދާ ވަރަށް ބޮޑަށް ހަލާކުވެފަ އެވެ.

ސުޕްރީމް ކޯޓުގެ ފަނޑިޔާރު އެލެގްޒެންޑްރޭ ޑި މޮރައިސް ވިދާޅުވީ ބޮލްސޮނާރޯ ބަންދުކުރީ ރައްކާތެރިކަމުގެ ފިޔަވަޅެއްގެ ގޮތުން ކަމަށެވެ. އަދި އެ އާލާތް ހަލާކު ވުމުން ބޮލްސޮނާރޯ ގޭބަންދުގައި ހުރިކަން ފުލުހުންނަށް މޮނިޓަރ ކުރުމަށް ހުރަސް އެޅިދާނެ ކަމަށް ވިދާޅުވި އެވެ.

ފަނޑިޔާރު ވިދާޅުވީ އެކަމުގެ ސަބަބުން އޭނާ ފިލައިފާނެ ކަމަށް ދެކޭ ކަމުގައެވެ.

ބޮލްސޮނާރޯގެ ވަކީލުން ބުނެފައިވަނީ ފުލުހުންގެ ބެލުމުގެ ދަށުގައި ބެހެއްޓުމަށް ކުރި އަމުރު އިސްތިއުނާފު ކުރާނެ ކަމަށެވެ.

ބޮލްސޮނާރޯ، 2022 ވަނަ އަހަރުގެ ރިޔާސީ އިންތިޚާބު ގައި ލުއިޒް އިނާޝިއޯ ލޫލާ ޑަ ސިލްވާ އަތުން ބަލިވުމަށްފަހު، ބަޣާވާތެއް ރޭވުމުގެ ކުށުގައި ސެޕްޓެމްބަރު މަހު 27 އަހަރާއި ތިން މަހުގެ ޖަލު ހުކުމެއް ކޮށްފައިވެއެވެ. 2023 ވަނަ އަހަރު ލޫލާ ރައީސްކަމާ ހަވާލުވުން ހުއްޓުވުމަށް ރޭވި ރޭވުމުގެ ލީޑަރަކީ އަދި އެންމެ ބޮޑު މަންފާ ލިބޭ ފަރާތަކީ ކުރީގެ ސިފައިންގެ ކެޕްޓަން ބޮލްސޮނާރޯ ކަމަށް ވަނީ ފާހަގަކުރެވިފައެވެ.

މި ރޭވުމުގެ ތެރޭގައި ލޫލާ އާއި، އޭނާގެ ނައިބު ރައީސް ގެރާލްޑޯ އަލްކްމިން އާއި، މޮރޭސް އަވަހާރަކޮށްލުމުގެ ރޭވުމެއްވެސް ހިމެނޭކަމަށް ތުހުމަތު ކުރެވެއެވެ.

ނަމަވެސް، ބޮލްސޮނާރޯގެ އިސްތިއުނާފުގެ މަރުޙަލާތައް ނިމިފައިނުވާތީ، އެ މައްސަލާ ގައި އޭނާ ފުލުހުންގެ ބެލުމުގެ ދަށަށް ގެނައުމަށް ކޯޓުތަކުން އަދި ފަހުގެ އަމުރެއް ނެރެފައެއް ނުވެއެވެ.

ހޮނިހިރު ދުވަހު ނެރުނު އޭނާގެ ޙުކުމުގައި ވަނީ ބޮލްސޮނާރޯ ދިރިއުޅޭ ގެޔާ އެމެރިކާގެ އެމްބަސީއާ ވަރަށް ކައިރިކަން ފާހަގަކޮށް، އޭނާ ސިޔާސީ ހިމާޔަތް ހޯދުމުގެ ފުރުސަތު ބޮޑުކަން ބަޔާންކޮށްފައެވެ.

ބޮލްސޮނާރޯ އަކީ އެމެރިކާގެ ރައީސް ޑޮނާލްޑް ޓްރަމްޕްގެ އެކުވެރިއެކެވެ. ޓްރަމްޕް ވަނީ މި މައްސަލަ އަކީ ސިޔާސީ ކަމެއް ކަމަށް ވިދާޅުވެ، މައްސަލައާ ގުޅިގެން ބްރެޒިލްއާ ދެކޮޅަށް ދަތިކުރުމުގެ ފިޔަވަޅުތައް އަޅުއްވާފައެވެ.

ކޯޓުން ވަނީ ބޮލްސޮނާރޯ މީގެ ކުރިން ބްރެޒީލިއާ ގައި ހުންނަ އާޖެންޓީނާގެ އެމްބަސީއިން ސިޔާސީ ހިމާޔަތް ހޯދުމަށް ވިސްނާފައިވާކަމުގެ ހެކިވެސް ފާހަގަކޮށްފައެވެ.

ކޯޓުން ވަނީ މޮނިޓަރަށް ލިބުނު ގެއްލުމާ ބެހޭގޮތުން 24 ގަޑިއިރު ތެރޭގައި ސަބަބު ބަޔާންކުރުމަށް ބޮލްސޮނާރޯ ގެ ވަކީލުންނަށް ފުރުސަތު ދީފަ އެވެ.

ކޯޓުން ވަނީ ބޮލްސޮނާރޯ އަށް މީޑީއާ އަށް އިންޓަރވިއު ނުދިނުމަށް ވެސް އަންގާފަ އެވެ.