މެންޗެސްޓަރ ޔުނައިޓެޑަށް ކުޅެމުން އަންނަ އިންގްލެންޑުގެ މާކަސް ރަޝްފޯޑު، ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށް ބަދަލުވާ ކަމަށް ބުނެ ދެކެވެމުންދާ ވާހަކަތަކާ ގުޅިގެން، އެ ޓީމުގެ ކޯޗު އެރިކް ޓެން ހާގް ހިތްހަމަ ނުޖެހިއްޖެ އެވެ.
ބައެއް މީޑިއާ ތަކުގައި ބުނެފައިވާ ގޮތުން ޕީއެސްޖީން އަންނަނީ ރަޝްފޯޑު ހޯދުމުގެ ޝައުޤުވެރިކަން ފާޅުކުރަމުންނެވެ. އެއީ މި ސީޒަނަށްފަހު ޕީއެސްޖީގެ އެންމެ މުހިންމު އެއް ކުޅުންތެރިޔާ، ފްރާންސްގެ ކީލިއަން އެމްބާޕޭ އެ ކުލަބު ދޫކޮށްލަން ނިންމާފައިވާތީ ކަމަށް ވެސް ރިޕޯޓުތައް ބުނެ އެވެ. އެހެންކަމުން އެމްބާޕޭގެ ބަދަަލަށް ޕީއެސްޖީން ގެންނަން ބޭނުން ވަނީ ރަޝްފޯޑު ކަމަށް ވެސް ވަނީ ބުނެފަ އެވެ.
އެކަމާ ގުޅޭ ގޮތުން ވާހަކަ ދައްކަމުން ޓެން ހާގް ބުނީ، މިހާރު މިވަގުތު ރަޝްފޯޑު ވިއްކާލުމުގެ އެއްވެސް ވިސްނުމެއް ޔުނައިޓެޑުން ގެން ގުޅޭ ނަމަ، މިދިޔަ ސީޒަނުގައި އޭނާގެ އެއްބަސްވުން އައު ކުރަންވީ ސަބަބެއް ނެތް ކަމަށެވެ. ހަމައެހެންމެ ޔުނައިޓެޑުން މުސްތަޤުބަލަށް ކުރަމުން އަންނަ މަސައްކަތުގަައި ރަޝްފޯޑަކީ ވަރަށް މުހިންމު ކުޅުންތެރިޔަކަށް ވާން ޖެހޭނެ ކަމަށާއި، އެއީ ޔުނައިޓެޑުން ނުދައްކާ ބާއްވާނެ ވާހަކައެއް ނޫން ކަމަށް ވެސް އޭނާ ބުންޏެވެ.
ޔުނައިޓެޑުން 2015 ވަނަ އަހަރު ސީނިއާ ކެރިއަރު ފެށި ރަޝްފޯޑު ވަނީ، އެ ކުލަބުގެ އެއްބަސްވުން އައު ކޮށްފަ އެވެ. އެ ކުލަބާއެކު އޭނާ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. ރަޝްފޯޑު ވަނީ މިހާތަނަށް ޔުނައިޓެޑަށް ކުޅެދިން 393 މެޗުގައި 130 ލަނޑު ޖަހައިފަ އެވެ. އޭނާ އަކީ ޔުނައިޓެޑުގައި ޓެން ހާގް އެންމެ އިސްކަން ދެމުން އަންނަ އެއް ކުޅުންތެރިޔާ އެވެ.
