އަލްއަޤްޞާ މިސްކިތަށް ވަންނަ މައި 3 ގޭޓެއްގައި އިސްރާއީލުން ހުރަސްތަކެއް އަޅައިފި
15 މާރިޗު 2024 | ހުކުރު 16:54އުރުދުންގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ އިސްރާއީލުގެ މި ފިޔަވަޅަކީ ނުރައްކާތެރި އަދި ބަލައިގަނެވޭނެ ފިޔަވަޅެއް ނޫން ކަމަށް
އަލްއަޤްޞާ މިސްކިތް ކޮމްޕައުންޑްގެ ކިންގް ފައިސަލް ގޭޓުގައި އިސްރާއީލު ސިފައިން ދަގަނޑު ކޭޖެއް ބަހައްޓާފައިވާ މަންޒަރެއް
އިސްރާއީލުން ހިފާފައިވާ އިރުމަތީ ގުދުސްގައި ހުންނަ އަލްއަޤްޞާ މިސްކިތަށް ވަންނަ މައި ތިން ގޭޓެއްގައި އިޒްރޭލު ފުލުހުން ހުރަސްތަކެއް އެޅުމުގެ ސަބަބުން މުސްލިމުން އެމިސްކިތަށް ވަނުމަށް އިތުރު ހުރަސްތަކެއް ކުރިމަތިވަމުންދާކަމަށް އަނަޑޯލޫ ނިއުސް އެޖެންސީން ބުނެއެވެ.
ހިފާފައިވާ ގުދުސް ސިޓީގެ އިސްލާމިކް އެންޑޯމަންޓްސް ޑިޕާޓްމަންޓް، ވަޤްފް އިން އިއްޔެ ނެރުނު ބަޔާނެއްގައި ބުނީ ދަގަނޑު ހުރަސްތައް ބަހައްޓާފައިވަނީ ރަސްގެފާނު ފައިސަލް އާއި އަލްޣަވަންމެހް އަދި އަލްހާދީދުގެ ދޮރުމަތީގައި ކަމަށާއި އެއީ ނުރައްކާތެރި އަދިއެފަދަ ފިޔަވަޅެއް އަޅައިފާނެ ކަމަށް ހީވެސް ނުކުރާވަރުގެ ފިޔަވަޅެއް ކަމަށެވެ.
އުރުދުން އާއި ފަލަސްތީނުން ވެސް ވަނީ އިޒްރޭލުން މިސްކިތަށް ވަނުމަށް ހުރަސް އެޅުމުން އެކަން ކުށްވެރިކޮށްފައެވެ.
އުރުދުންގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ އިސްރާއީލުގެ މި ފިޔަވަޅަކީ ނުރައްކާތެރި އަދި ބަލައިގަނެވޭނެ ފިޔަވަޅެއް ނޫން ކަމަށެވެ.
ހިފާފައިވާ އިރުމަތީ ގުދުސްގެ މައްޗަށް އިސްރާއީލަށް އެއްވެސް ސިޔާދަތެއް ނޯންނާނެ ކަމަށާއި އަލްއަޤްޞާ މިސްކިތަށް ނަމާދަށް މީހުން ވަނުމަށް އެއްވެސް ހުރަހެއް އެޅުމުގެ އިހްތިޔާރެއް ނޯންނާނެ ކަމަށާއި، އުރުދުންގެ ރަސްގެފާނަކީ ގުދުސްގައި މުސްލިމުންނާއި ކްރިސްޓިއަނުންގެ މާތް ތަންތަން ބެލެހެއްޓުމުގެ ރަސްމީ އަދި ބައިނަލްއަގްވާމީ ގޮތުން ބަލައިގަންނަ ބެލެނިވެރިއެއް ކަމަށް އެ މިނިސްޓްރީން ބުންޏެވެ.
އަދި އިޒްރޭލުން ބައިނަލްއަގްވާމީ ގާނޫނުތަކާ ހިލާފަށް ހިންގަމުންދާ އަމަލުތައް ހުއްޓުވުމުގެ ޒިންމާ އުފުލުމަށް ބައިނަލްއަގުވާމީ މުޖުތަމައުއަށް ގޮވާލާފައިވެއެވެ.
ފަލަސްތީނުގެ ޚާރިޖީ ވުޒާރާއިން ވެސް ވަނީ އިޒްރޭލުން ހުރަސްތައް ހަރުކޮށްފައިވާތީ އެކަން ކުށްވެރިކޮށް، މިއީ އަލްއަޤްޞާ މިސްކިތުގެ ތާރީޚީ، ޤާނޫނީ އަދި ސިޔާސީ ޙަޤީޤަތް ބަދަލުކުރުމަށް އެޅި ފިޔަވަޅެއްކަމަށް ބުނެފައެވެ.
އަދި ހުރަސްތައް އެޅުމަކީ ބައިނަލްއަގްވާމީ ގާނޫނުތަކާ ކަނޑައެޅިގެން ހިލާފު ކަމެއް ކަމަށާއި އިސްރާއީލުގެ އެ އަމަލުތަކަކީ އަޅުކަންކުރާ ތަންތަނަށް ވެރިވެގަތުމުގެ ގޮތުން ހިންގަމުންދާ އަމަލުތަކެއް ކަމަށް އެ ޖަމިއްޔާއިން ދެކެއެވެ.
އެ ޖަމިއްޔާއިން ވަނީ ގުދުސް އާއި އެގައުމުގެ ކްރިސްޓިއަން އަދި މުސްލިމުންގެ ހިޔާވަހިކަމަށް އިސްރާއީލުން އަރައިގަތުން ހުއްޓުވުމަށް ބައިނަލްއަގުވާމީ ނުފޫޒު ފޯރުވުމަށް ގޮވާލާފައެވެ.
ހަމާސް ޖަމާއަތުން އިސްރާއީލުގެ މި ފިޔަވަޅަށް ވަރަށް ބޮޑަށް ފާޑުކިޔައި ބުނީ މިއީ ރަމަޟާން މަހު އަލްއަޤްޞާ މިސްކިތަށް ނަމާދަށް ދާ މީހުން ހުއްޓުވުމަށް ކުރާ ނުބައި މަސައްކަތެއް ކަމަށެވެ.
އިސްރާއީލުގެ އަސްކަރިއްޔާއިން މިދިޔަ ހޯމަ ދުވަހު ވަނީ ރަމަޟާން މަހު ހުކުރު ނަމާދު ކުރުމަށް، ހިފާފައިވާ ހުޅަނގު އައްސޭރިން އިރުމަތީ ގުދުސްއަށް ފަލަސްތީނު މީހުން އެތެރެވުން ހުއްޓުވާފައިވާކަން އިއުލާނުކޮށްފައެވެ.
އެ އެންގުންތަކުގައިވާ ގޮތުން ރަމަޟާން މަހު ގުދުސްއަށް ވަދެވޭނީ އުމުރުން 55 އަހަރުން މަތީގެ ފިރިހެނުންނާއި 50 އަހަރުން މަތީގެ އަންހެނުންގެ އިތުރުން ދިހަ އަހަރުން ދަށުގެ ކުޑަކުދިންނަށެވެ.
އަލްއަޤްޞާ އޮންނަ އިރުމަތީ ގުދުސް އިސްރާއީލުން ހިފާފައިވަނީ 1967 ވަނަ އަހަރުގެ ޢަރަބި-އިސްރާއީލު ހަނގުރާމައިގައެވެ.
