ޓިކްޓޮކް މަނާކުރަން ހުށަހެޅި ހުށަހެޅުމަށް އެމެރިކާގެ ބޮޑު ޔަހޫދީ ޖަމާއަތަކުން މަރުހަބާ ކިޔައިފި
އެމެރިކާގައި ޓިކްޓޮކް ބޭނުންކުރާ މީހުންގެ އަދަދު 170 މިލިއަނަށް އަރާ
އެމެރިކާއިން ޓިކްޓޮކް މަނާކުރުމަށް ކުރަމުންދާ މަސައްކަތް ދުވަހެއް ދުވަހަކަށް ދަނީ އިތުރުކުރަމުން
އެމެރިކާގައި ޓިކްޓޮކް މަނާކުރަން ހުށަހެޅި ހުށަހެޅުމަށް އެމެރިކާގެ ބޮޑު ޔަހޫދީ ޖަމާއަތަކުން މަރުހަބާ ކިޔައިފިއެވެ.
ޗައިނާގެ ހިއްސާ އޮންނަ ޓިކްޓޮކް މަނާކުރަން އެމެރިކާގެ ހައުސް އޮފް ރެޕްރެޒެންޓޭޓިވްސް އިން ހުށަހެޅި ބިލު ދުނިޔޭގެ އެކި ކަންކޮޅުތަކުގައި ސުރުހީތަކަށް އަރާފައިވާއިރު، އިޒްރޭލަށް ތާއީދުކުރާ ފަރާތްތަކުން އެ ހުށަހެޅުއްވުމަށް މަރުހަބާ ކިޔަމުން ދަނީ އެ ޕްލެޓްފޯމްގައި "އެންޓިސެމިޓިކް ކޮންޓެންޓް" އުފެދިފައިވާ ކަމަށް ބުނެއެވެ.
އެ ގައުމުގެ މިނިވަން ޔަހޫދީ ޖަމާއަތްތަކުގެ 350 އަށް ވުރެ ގިނަ ޖަމާއަތް ތަމްސީލުކުރާ އެމެރިކާގެ ޔަހޫދީ އަމްބްރެލާ ޖަމިއްޔާއެއް ކަމަށްވާ ޔަހޫދީ ފެޑެރޭޝަންސް އޮފް ނޯތު އެމެރިކާ (ޖޭއެފްއެންއޭ) އިން ބުދަ ދުވަހު ނެރުނު ރަސްމީ ބަޔާނެއްގައި ވަނީ އެ ކަމަށް ތައުރީފުކޮށްފަ އެވެ.
އެ ޖަމާއަތުން ބުނީ ޔަހޫދީ މުޖުތަމައުތަކަށް މިއަދު ދިމާވެފައިވާ އެންމެ މުހިންމު އެއް މައްސަލައަކީ އެންޓިސެމިޓިޒަމް ވަރަށް ބޮޑަށް އިތުރުވުން ކަމަށާއި، އެންޓިސެމިޓިޒަމްގައި މިހާތަނަށް އެންމެ ބޮޑު ކުށްވެރިއަކީ ޓިކްޓޮކް ކަމަށެވެ.
ސީއީއޯ އެރިކް ފިންގާހަޓް ވިދާޅުވި މިއަދުގެ ވޯޓުން ފެނިގެން ދިޔައީ ޓިކްޓޮކްގެ ސަބަބުން ޔަހޫދީ މުޖުތަމައުތަކަށް ނަފުރަތު އުފެދޭ މެސެޖުތައް ނުފޯރުވޭނެ ކަން ކަށަވަރު ކުރުމަށް އޮތް ވަރުގަދަ، ބައިޕާޓިޝަން ތާއީދުކަމަށެވެ. އަދި މި ގާނޫނު އަވަހަށް ބަލައިގަނެ ފާސްކުރުމަށް ސެނެޓުން އިލްތިމާސް ކުރާކަމަށްވެސް އޭނާ ވިދާޅުވިއެވެ.
ފެޑެރޭޝަންސް ގްރޫޕުން މަސައްކަތް ކުރަނީ ޓިކްޓޮކްގެ ވެރިޔާ ބައިޓްޑާންސަށް އެ އެޕްލިކޭޝަންގެ އެމެރިކާގެ އެސެޓްތައް ވިއްކާލަން ނުވަތަ އެ ގައުމުގައި މުޅިން މަނާކުރުމަށް މަޖުބޫރު ކުރުމަށެވެ.
އެމެރިކާގައި ޓިކްޓޮކް ބޭނުންކުރާ މީހުންގެ އަދަދު 170 މިލިއަނަށް އަރާއިރު، އޭގެ ތެރެއިން ގިނަ ބަޔަކު ދިރިއުޅުމަށް މި އެޕްލިކޭޝަން ބޭނުންކުރާއިރު، އެ އެޕްލިކޭޝަން މަނާކުރުމާ ދެކޮޅަށްވެސް އެތަބަޔަކު ދަނީ އަޑުއުފުލަމުންނެވެ. އެގޮތުން އެމެރިކާގެ ގާނޫނު ހަދާ މަޖިސްގެ މެމްބަރުންގެ ފޯނުތަކަށް ކެނޑިނޭޅި ފޯނުކޯލްތައް އަންނަ ކަމަށް ރިޕޯޓްތައް ބުނެއެވެ.
